Hagai 2
2
Bunde bwa Tempele ye nca
1Ka lizazi la bumashumi a mabeli ka li li liñwi la kweli ya busupa ka sona silimo seo, Muñ'a Bupilo a bulela hape ka mupolofita Hagai. 2A bulelela Hagai ku zibisa Zerubabele mubusisi wa naha ya Juda, muprisita yo muhulu Joshua, ni sicaba kaufela, a li, 3#Ezra 3.12 “Kana ku na ni yo muñwi mwahal'a mina ya sa hupula bunde bwa Tempele ya pili, nji? I bonahala cwañi ku mina ka nako ye? I bonahala kuli inge ha si se siñwi ku mina. 4Kono cwale u si ke wa zwafa, Zerubabele!” ku bulela Muñ'a Bupilo. “U si ke wa zwafa, muprisita yo muhulu Joshua mwan'a Jozadaki. Mu si ke mwa zwafa, batu kaufela ba naha, kakuli ni na ni mina,” ku bulela Muñ'a Bupilo. 5#Mut 29.45-46 Ha mu zwa mwa Egepita, ni mi sepisize ka luci kuli ni ka ba ni mina nako kaufela. Ni sa na ni mina. Cwalehe, mu si ke mwa saba.
6 #
Maheb 12.26
“S'a bulela Muñ'a Bupilo ya Maata Kaufela ki se, ‘Ku si ka fita nako ye telele ni ka nyanganyisa lihalimu ni lifasi, mubu ni liwate. 7Ni ka shandaula macaba kamukana, bufumu bwa ona bu ka tiswa kwanu, mi Tempele i ka tala kanya. 8Silivela ni gauda ya lifasi kaufela ki za ka,’ ku bulela Muñ'a Bupilo ya Maata Kaufela. 9‘Tempele ye nca i ka kateleha hahulu ku fita ya kale,’ ku bulela Muñ'a Bupilo ya Maata Kaufela. Mo mwa Jerusalema ni ka fa batu ba ka bupilo bo bunde ni kozo,’ ku bulela Muñ'a Bupilo ya Maata Kaufela.
Mupolofita u shemaeta ni baprisita
10Ka lizazi la bumashumi a mabeli ka a mane mwa kweli ya busupa ni ze peli ya silimo sa bubeli sa puso ya Mulena Dariusi, Muñ'a Bupilo ya Maata Kaufela a bulela hape ku mupolofita Hagai. 11A li, “Buza baprisita ka za mulao wo o li, 12‘Haiba mutu a ka nga situnula sa nama ya sitabelo se si kenisizwe, mi a si lwala mwa siapalo sa hae, haiba siapalo seo si ta ngunyuta buhobe, sico se si apehilwe, waine, mafula a olive, kamba sico sifi ni sifi, kana lico zeo kaufela li ka keniswa ki situnula seo, nji?’ ”
Puzo ha i se i buzizwe, baprisita ba alaba, ba li, “Batili.”
13 #
Lipa 19.11-22
Cwale Hagai a buza, a li, “Lu bulele cwana lu li haiba mutu a silafezi ka ku swala situpu, cwale h'a ka swala se siñwi sa zona lico ze, kikuli ni zona li ka silafala, nji?”
Baprisita ba alaba, ba li, “Ee.”
14Cwale Hagai a li, “Muñ'a Bupilo u li ki nto ye swana ni kwa batu ba sicaba se, ni kwa linto kaufela ze ba fumana. Mi cwale lika kamukana ze ba tisa fa katala li silafezi.”
Muñ'a Bupilo u ba sepisa limbuyoti
15Muñ'a Bupilo u li, “Kana ha mu lemuhi se si ezahalile ku mina? Mu lemuhe hande se si ezahalile ku mina batu pili mu si ka kala ku yaha Tempele ya Muñ'a Bupilo sinca. 16Ne mu yanga fa libunda la mabele ka sepo ya kuli mu ka fumana lico ze ñata ze ka likana ni lizuma ze mianda ye mibeli, kono ne ku fumaneha feela mwanda u li muñwi. Ne mu yanga ku y'o ka waine ye likana litikanyo ze mwanda mwa sibulukelo, kono ne mu fumananga feela ze mashumi a mane. 17Ni lumezi poli ni silami ni simbwewewe ku t'o sinya ze ne mu bata ku lima kaufela, kono nihakulicwalo ha mu si ka baka, ku bulela Muñ'a Bupilo.
18“Kacenu ki lizazi la ku feleleza mutumo wa Tempele ya Muñ'a Bupilo, kweli ya busupa ni ze peli ha i se i na ni mazazi a mashumi a mabeli ni a mane. Mu lemuhe se si ta ezahala ku kala cwale. 19Niha ku si na mabele a siyezi, ni likota za veine, za feiga, za ligaraneti ni za olive ha li si ka beya miselo kale, nihakulicwalo ku zwa cwale ni ka mi tohonolofaza.”
Sepiso ya Muñ'a Bupilo ku Zerubabele
20Ka lona lizazi leo la bumashumi a mabeli ni a mane mwa kweli, Muñ'a Bupilo a fa manzwi hape ku Hagai. 21A li, “Bulelela Zerubabele, mubusisi wa naha ya Juda, kuli se ni bata ku nyanganyisa lifasi ni lihalimu. 22Ni ka felisa mibuso ni maata a yona. Ni ka wisaka likoloi za ndwa ni bazamaisi ba zona. Lipizi li ka shwa, mi bapahami ba zona ba ka bulayana.
23“‘Ka lona lizazi leo,’ ku bulela Muñ'a Bupilo ya Maata Kaufela, ‘ni ta ku nga wena mutang'a ka Zerubabele, mwan'a Shealitiele,’ ku bulela Muñ'a Bupilo. ‘Ni ta ku keta kuli u buse ka libizo la ka. Ki wena ye ni ketile,’ ku bulela Muñ'a Bupilo ya Maata Kaufela.”
Currently Selected:
Hagai 2: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.