Estere 1
1
Mufumahali Vashiti u nyaziseza Mulena Asuerusi
1 #
Ezra 4.6
Asuerusi n'a li mulena mi n'a busa manaha a mwanda ka mashumi a mabeli ni manaha a supile, ku kalela kwa India mane ku y'o fita kwa Etiopia. 2N'a nz'a li fa situlo sa hae sa bulena mwa Shushani, muleneñi wa Peresia.
3Mwa silimo sa bulalu sa puso ya hae, a ezeza manduna ni babusisi ba hae kaufela mukiti. Bazamaisi ba limpi za Peresia ni Media kamukana ne ba li teñi, hamohocwalo ni babusisi ni batompehi ba mwa manaha mo. 4A eza poniso ya bunde ni buñata bwa bufumu bwa mwa mubuso wa hae ka likweli ze silezi, ili poniso ye komokisa ka bunde ni butuna bwa yona!
5Mwamulaho a zeo, mulena a ezeza batu kaufela ba mwa Shushani mukiti, ili bafumi ni babotana kamukwaoswana. Mukiti wo wa tanda sunda mutumbi, mi wa ezezwa mwa masimu a lipalisa a fapil'a ndu ya bulena. 6Lapa ne li kabisizwe ka masila a bwanda a lepelela, ili a masweu, a mubala wa ndilu, a tamezwi fa maseka a silivela kwa mihala ye minde ye il'o tama fa misumo ya macwe a masweu. Lipula za ku pumulela ze ezizwe ka gauda ni silivela ne li beilwe mwa lapa, ili lapa le ne li na ni bulilo bwa macwe a masweu ni a mafubelu ni a matala, a benya-benya. 7Ze nwiwa ne li nwelwa mwa likomoki za gauda, ko ne ku si na ye n'e swana ni ye ñwi, mi mulena n'a fana hahulu waine. 8Ne ku si ka tomiwa mulao wa ku nwa, kakuli mulena n'a laezi likombwa kuli mutu kaufela a nwe mw'a latela.
9Ka yona nako yeo Muoli Vashiti ni yena n'a ezeza basali mukiti mwa ndu ya bulena.
10Ka lizazi la busupa la mukiti, mulena n'a nz'a nwa a ikutwa a tabile, kiha s'a biza likombwa za hae za linumbulwa ze supile ba ba ne ba li fakaufi hahulu ni yena, ili bo Mehumani, Bizita, Haribona, Bigita, Abagita, Zetari, ni Karikasi. 11A ba laela ku y'o biza Muoli Vashiti, a nz'a apezi kuwani ya hae ya bulena. Muoli yo n'e li musali yo munde hahulu, mi mulena n'a bata ku bonisa manduna ni baenyi kaufela bunde bwa hae. 12Kono likombwa ha li y'o bulelela Muoli Vashiti taelo ya mulena, a hana ku taha. Taba yeo ya nyemisa mulena hahulu luli.
13N'e li mukwa wa mulena wa ku buzanga ba ba ziba hahulu mulao ni zamaiso. Cwale kiha s'a biza baelezi ba hae ba ba ne ba swanezi ku ziba se si lukela ku eziwa. 14Ba ba ne ba li fakaufi hahulu ni yena n'e li bo Karishena, Shetari, Adimata, Tareshishi, Meresi, Marisena ni Memukani, ili bona manduna ba supile ba manaha a Peresia ni Media ba ba ne ba sweli litulo ze pahami mwa mubuso, mi n'e li bona b'a n'a ka utwisisa kapili mulena, ha ba bulela. 15A li kwa batu bao, “Na, Mulena Asuerusi, ni laezi likombwa za ka ku y'o biza Muoli Vashiti, kono u hanile ku ni mamela! Kanti ka mulao lu swanezi ku eza cwañi ka yena?”
16Cwale Memukani kiha s'a taluseza mulena ni manduna ba hae, a li, “Muoli Vashiti h'a si ka shwaula mulena feela, kono u shwauzi ni bona manduna ba hae cwalo. Mane u shwauzi ni banna kamukana mwa naha! 17Mwa mubuso kamukana basali kaufela se ba ta nyaziseza banna ba bona ha ba ta utwa se si ezizwe ki muoli yo. Ba ta li, ‘Mulena Asuerusi n'a laezi Muoli Vashiti kuli a tahe ku yena, kono yena a hana.’ 18Basali ba Peresia ni Media ba ba se ba utwile kezo yeo ya muoli, ba ta be ba i bulezi manduna ba mulonga lizazi li si ka pazula kale. Kamukwaocwalo mifili-fili ni mahañi ha li na ku fela! 19Haiba kwa ku tabisa, muñ'a ka, u fe taelo ya kuli Vashiti a si ke a bonahala hape fapil'a mulena. Taba yeo i ñolwe mwa mulao wa Peresia ni Media, ili kuli i si ke ya fetulwa ni hanyinyani. Cwale situlo sa hae sa buoli si fiwe musali u sili ya lukile. 20Cwale taelo ya hao ha i se i zibilwe kai ni kai mwa mubuso wa hao o mutuna, fohe musali ni musali u ta kuteka munn'a hae, nih'a ka ba mufumi kamba mubotana.”
21Mulena ni manduna ba hae ba tabela muhupulo wo, mi mulena a eza se ne si hupuzwi ki Memukani. 22A lumela linzwi mwa naha ye ñwi ni ye ñwi ye mwa mubuso wa hae, ili ka puo ye bulelwa mwa naha yeo, a li munna kaufela ki yena toho ya ndu, mi kamita ki yena mufelelezi wa lika.
Currently Selected:
Estere 1: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.