Nehemia 13
13
Maisilaele ba kauhana ni balicaba
1 #
Mul 23.3-5
Ka yona nako yeo Mulao wa Mushe wa balelwa batu, mi ba t'o fita fa timana fo ku ñozwi kuli ha ku na Muamoni kamba Mumoabi ya lumelezwi ni kamuta ku kopana ni batu ba Mulimu. 2#Lipa 22.1-6 Libaka n'e li kuli batu ba Amoni ni ba Moabi ne ba si ka fa Maisilaele lico kamba mezi mwa musipili wa bona ha ba zwa kwa Egepita. Bakeñisacwalo, ba lifa Baalami mali kuli a kute Isilaele, kono Mulimu wa luna a fetula sikuto seo mbuyoti. 3Sicaba sa Isilaele ha si utwa mulao wo u baliwa, sa zwisa balicaba kamukana mwahal'a sona.
Lipetuho ze ezizwe ki Nehemia
4Muprisita Eliashibi, ya n'a babalela mandu a libyana za Tempele, n'a kile a pilisana hande ni Tobia ka nako ye telele. 5A lumelela Tobia ku sebelisa muzuzu o muñwi o mutuna o n'o lukela ku itusiswa feela kwa ku buluka limpo za mabele ni insense, libyana za ku sebelisa mwa Tempele, limpo za baprisita, ni kalulo ya bulishumi ya mabele, waine, ni mafula a olive a fiwanga Malivi, baopeli ni balibeleli ba Tempele. 6Zeo ha ne li ezahala cwalo, na, ne ni li siyo mwa Jerusalema, kakuli Mulena Aritazerisi h'a inzi fa lubona mwa Babilona ka lilimo ze mashumi a malalu ka ze peli ne ni kutile ku y'o mu bihela litaba. Mwamulaho a nakonyana feela, na fiwa sibaka. 7Cwale na kutela kwa Jerusalema. Kwateñi na y'o komoka hahulu ku bona kuli Eliashibi n'a lumelezi Tobia ku sebelisa muzuzu o muñwi wa mwa Tempele. 8Na halifa hahulu, mi na nepakela lika za Tobia kaufela kwande. 9Na fa litaelo kuli mizuzu kaufela i keniswe, mi lisebeliso za mwa Tempele, mabele a limpo ni insense li kutisezwe mwateñi.
10 #
Mul 12.19
Hape, na utwa kuli Malivi ni baopeli ba mwa Tempele ne ba zwile mwa Jerusalema, mi ne ba ikezi kwa masimu a bona, kakuli batu ne ba si ka ba fa ze ne ka kona ku ba pilisa. 11Na kalimela hahulu manduna ka ku tuhela batu ba hasana mwa Tempele. Na kutiseza Malivi ni baopeli mwa Tempele, mi na ba beya fa misebezi ya bona. 12#Mala 3.10 Cwale batu ba Isilaele kaufela ba tisa likalulo za bona za bulishumi za lico, mabele, waine, ni mafula a olive mwa mandu a lipulukelo za Tempele. 13Na beya batu bao ba ba tatama ku zamaisa mandu a lipulukelo, ili bo Shelemia muprisita, Zadoki sizibi sa Mulao, ni Pedaya yo muñwi wa Malivi. Hanani, mwan'a Zakuri, ili muikulu wa Matania, n'a na ni ku ba mutusi wa bona. Ne ni ziba kuli batu bao ne ba sepahala, ni kuli ba ta abela hande babeleki bahabo bona lico.
14Hupula, Mulimu wa ka, lika kamukana ze ni ezelize Tempele ya hao ni lisebelezo za mwateñi.
15 #
Mut 20.8-10; Mul 5.12-14; Jer 17.21-22 Ka yona nako yeo, na bona batu mwa Juda ba hamula litolwana za veine ka la Pumulo. Ba bañwi ne ba paheka mabele, waine, makocela a lifeiga, ni lika ze ñwi fa limbongolo za bona ku li isa kwa Jerusalema. Na ba kalimela kuli ba si ke ba li lekisa ka lona lizazi leo. 16Batu ba bañwi ba ba ne ba zwa mwa munzi wa Tire ne ba yahile mwa Jerusalema, mi ba tisa litapi ni mifuta-futa ya libyana ku t'o li lekisa ka la Pumulo. 17Na kalimela baeteleli ba Majuda, mi na ba bulelela, na li, “A mu bone bumaswe bo mu eza! Mu silafaza Lizazi la Pumulo. 18Kikabakaleo Mulimu ha n'a utwisize bo kukw'a mina butuku ka ku sinya munzi wo. Mi nihakulicwalo mu sa tisa hape buhali bwa Mulimu fahalimw'a Isilaele ka ku silafaza Lizazi la Pumulo.”
19Na fa litaelo kuli kwa makalelo a lizazi le liñwi ni le liñwi la Pumulo, ku sa ba feela swalala, minyako ya munzi i swanezi ku kwaliwa, mi i si ke ya kwalulwa hape ku fitela la Pumulo i fela. Na beya batu ba ka ba bañwi kwa minyako, ku bona kuli ku si ke kwa tiswa se siñwi mwa hae ka la Pumulo. 20Hañwi kamba habeli, balekisi ba ba ne ba lekisa lika za mifuta-futa ba kile ba lobala kwand'a mamota a munzi ka la Butanu. 21Na ba kalimela, na li, “Ha ku na tuso ku libelela feela cwalo ku fitela lizazi li pazula. Haiba mu ka lika ku eza cwalo hape, ni ka mi tama.” Ku zwa hona fo, ha ba si ka kuta hape ka la Pumulo. 22Na laela Malivi kuli ba ikenise, mi ba y'o libelela minyako ku bona kuli lizazi la Pumulo li bulukiwa li nze li kenile.
Oho Mulimu, u ni hupule ni ka zona zeo cwalo, mi u ni buluke kabakala lilato la hao le lituna.
23 #
Mut 34.11-16; Mul 7.1-5 I sa li ka yona nako yeo, na lemuha hape kuli banna ba Majuda ba bañata ne ba nyezi basali ba kwa Ashidodi, Amoni ni Moabi. 24Licika la bana ba bona ne ba bulela puo ya Siashidodi kamba puo ye ñwi, mi ne ba sa zibi ku bulela puo ya luna. 25Na kalimela batu bao mane na be na ba kuta. Na ba nata, mi na ba kumula milili. Na ba hapeleza ku itama ka libizo la Mulimu kuli, i ka ba bona kamba bana ba bona, ba si ke ba nyalana hape ni balicaba. 26#2 Sam 12.24-25; 1 Male 11.1-8 Na ba bulelela, na li, “I n'e li basali ba balicaba ba ba ne ba kenyize Mulena Salumoni mwa sibi niha n'a li yo mutuna ku fita ufi ni ufi wa malena ba macaba a mañwi, mi nihaike Mulimu n'a mu lata, mane a be a mu eza mulena wa Isilaele kaufela. 27Kana kikuli lu ta latelela mikwa ya mina ye maswe, mi lu hanyeze Mulimu wa luna ka ku nyala basali ba balicaba, nji?”
28 #
Neh 4.1
Joyada n'e li mwan'a muprisita yo muhulu Eliashibi, kono yo muñwi wa bana ba Joyada a nyala mwan'a Sanibalati ya n'a zwa mwa munzi wa Beti-Horoni. Kabakaleo na mu zwisa mwa Jerusalema.
29Mulimu, hupula mo ne ba silafalelize batu bao situlo sa buprisita ni bulikani bo n'o isweli ni baprisita hamoho ni Malivi.
30Ni kenisize batu ku za balicaba kamukana. Ni lukiselize baprisita ni Malivi milao kuli mutu ni mutu a zibe musebezi wa hae. 31Ni lukisize ka mo li ka tisezwanga likota za ku cisisa limpo ka linako ze lukela, ni ka limpo za mutamuno wa mabele, ni ka za mutamuno wa miselo ye buzwize cwalo.
Oho Mulimu, hupula ze kamukana, mi u ni eze hande.
Currently Selected:
Nehemia 13: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.