Daniele 1
1
Micaha ya Maisilaele mwa kuta ya Nebukadenezare
1 #
2 Male 24.1; 2 Lita 36.5-7 Mwa silimo sa bulalu sa puso ya Jojakimi ha n'a li mulena wa Juda, Mulena Nebukadenezare wa Babilona a y'o lwanisa munzi wa Jerusalema mi a u beya mwahali. 2#2 Male 20.17-18; 24.10-16; 2 Lita 36.10; Isa 39.7-8 Muñ'a Bupilo a konisa Nebukadenezare ku hapa Jojakimi mulena wa Juda ni ku ikungela kwa tutu ya mwa Tempele. A nga ba ba hapilwe, a ba isa mwa tempele ya mulimu wa hae mwa Babilona, mi a beya bufumu bo bu hapilwe mwa pulukelo.
3Muñ'a Bupilo a laela Ashepanazi, nduna ye tuna, ku keta mwahal'a Maisilaele ba ba hapilwe mitangana ya lusika lwa bulena ni bana ba manduna. 4Ba ne ba lukela ku ba micaha ba bande, ba ba si ka holofala, ba ba na ni ngana, ba ba lutilwe hande, ili ba ba kona ku swala lituto kapili, kuli ba kone ku lumelelwa ku t'o sebeza mwa ndu ya bulena. Ashepanazi n'a swanezi ku ba luta ku bala ni ku ñola puo ya Mababilona. 5Mulena hape a fa litaelo kuli ka zazi ni zazi ba fiwe ona mufuta wo wa lico ni waine sina batu ba ndu ya bulena. Mwamulaho wa lilimo ze talu za ku lutiwa cwalo, ba ne ba swanezi ku t'o boniwa ki mulena. 6Mwahal'a ba ba ne ba ketilwe ne ku na ni Daniele, Hanania, Mishaele ni Azaria. N'e li ba lusika lwa Juda kaufel'a bona. 7Nduna ye tuna a ba fa mabizo a manca ili a bo Beliteshazare, Shadrake, Meshaki ni Abedi-Nego.
8Daniele a itukiseza kuli a si ke a isilafaza ka lico ni waine yeo ya bulena. Kiha s'a kupa nduna yo mutuna Ashepanazi kuli a mu tuse. 9Mi Mulimu a konisa Ashepanazi ku ba ni makeke ni mukekecima ku Daniele. 10Kono Ashepanazi a bulelela Daniele, a li, “Ni saba mulena. Ki yena ya laezi ze mu swanezi ku ca ni ku nwa, mi ha u si ke wa bonahala ku nuna sina micaha ba bañwi, mwendi a ka swana a ni bulaya.”
11Cwale Daniele a ya ku mulibeleli ya n'a beilwe ki Ashepanazi ku mu libelela yena ni ba bañwi ba balalu, a li, 12“Lu like mwa mazazi a lishumi, u nz'o lu fa feela miloho ni mezi a ku nwa. 13Cwalehe, kihona u ta lu likanya ni micaha ba ba ca za bulena, mi fo u ka iponela mo lu inezi.”
14A lumela ku ba lika cwalo mwa mazazi a lishumi. 15Nako ha i se i fitile, ba bonahala ku iketa mi ba tiile ku fita bao kamukana ba ba ne ba ca lico za bulena. 16Cwale mulibeleli a tuhela lico za bulena mi a ba fa miloho feela.
17Mulimu a fa micaha ba bane bao zibo ni bukwala mwa lituto za bona kaufela. Mi Daniele a mu fa kutwisiso mwa ku talima lipono ni litolo.
18Kwa mafelelezo a lilimo ze talu ze ne li tomilwe ki mulena, Ashepanazi a isa mitangana bao kaufela ku Nebukadenezare. 19Mulena a bulela ni bona kaufela, mi a fumana kuli Daniele, Hanania, Mishaele ni Azaria ne ba fita ba bañwi kamukana. Cwale ba ba lilama za ndu ya bulena. 20Ne ku si na puzo y'a n'a buza mulena, kamba butata bufi ni bufi bw'a n'a tisa, kono n'a fumana kuli ba bane ba, ne ba fitela kwahule linuhi ni ba mabibo kaufela ba ba ne ba li mwa mubuso wa hae. 21Daniele a ina cwalo ku fitela Sirusi a ba mulena wa Babilona.
Currently Selected:
Daniele 1: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.