Daniele 2
2
Tolo ya Nebukadenezare
1Mwa silimo sa bubeli sa puso ya Nebukadenezare, yena a lola tolo. Ya mu kataza hahulu mane a palelwa ni ku lobala. 2#Sim 41.8 Cwale kiha s'a lumelela linuhi za hae, ba mabibo, balauli ni liñaka kuli ba t'o mu taluseza tolo yeo. Ba taha ku t'o yema fapil'a mulena. 3A li ku bona, “Ne ni na ni tolo ye ni kataza. Cwale ni bata ku ziba se i talusa.”
4Ba alaba mulena ka puo ya Sisiria, ba li, “Muñ'a ka u pile. Lu bulelele tolo ya hao, mi lu ta ku taluseza yona.”
5Mulena a li kwa liñaka, “Ni se ni lelile kuli haiba mu ta palelwa ku ni bulelela se ni lolile ni taluso ya sona, ni ta mi kabela lilama-lama mi mandu a mina a ta ba matota. 6Kono ha mu ta ni bulelela tolo ni taluso ya yona, fohe ni ta mi fa limpo ni likute le lituna. Cwalehe, kifo, a mu ni bulelele tolo ni se i talusa.”
7Hape ba alaba mulena, ba li, “Haiba muñ'a luna a ka lu bulelela tolo yeo, lu ka i talusa.”
8Ka yona nako yeo mulena a alaba, a li, “Ki mona mo ne ni hupulela! Mu lika ku ekeza nako, kakuli mu bona hande kuli ni se ni fitile kwa mafelelezo a mulelo wa ka. 9Haiba mu sa ni buleleli tolo, kaufel'a mina mu ta fiwa katulo ye swana. Mu lumelelani mwahal'a mina ku t'o ni puma mane ni be ni cince muhupulo wa ka. A mu ni bulelele tolo yeo pili, mi fohe ni ta ziba kuli mwa kona ku ni taluseza yona.”
10Liñaka ba alaba, ba li, “Ha ku na nihaiba a li muñwi fafasi ya ka bulelela muñ'a ka s'a bata ku ziba. Batili mulena, nihaikaba yena yo mutuna ka ku fitisisa, ya na ni maata, ya kile a fitisa kupo ye cwalo kwa linuhi, ba mabibo ni kwa liñaka za hae, h'a yo shangwe. 11S'a lu kupa, muñ'a luna, si tata hahulu, mane ha ku na mutu ya ka si eza haisi milimu, mi milimu yeo ha i pili ni batu.”
12Ka kalabo yeo, mulena a halifa mi a laela pulao ya baelezi ba mulena kamukana mwa Babilona. 13Cwale taelo ya fitiswa ku bona kaufela hamohocwalo ni Daniele ni balikani ba hae.
Mulimu u bonisa Daniele taluso ya tolo
14Cwale ka butali, Daniele a ya ku Arioki, muzamaisi wa balibeleli ba mulena, ya n'a laezwi ku eza lipulao zeo. 15A buza Arioki, a li, “Kikabakalañi mulena h'a tisa taelo ye sabisa cwalo?” Mi Arioki a bulelela Daniele se ne si ezahalile.
16Cwale Daniele a ya kapili mi a kupa mulena kuli ku liyehiswe hanyinyani ili kuli yena a y'o bulelela mulena se si taluswa ki tolo. 17Cwale Daniele a kutela kwa hae mi a y'o bulelela balikani ba hae bo Hanania, Mishaele ni Azaria se si ezahalile. 18A ba bulelela kuli ba lapele, ili ku kupa musa ku Mulimu wa lihalimu, kuli a ba taluseze kunutu ye patilwe ili kuli ba si ke ba bulaiwa hamohocwalo ni baelezi ba bañwi ba mwa Babilona. 19Cwale, ka bona busihu bo, Daniele a sinulelwa kunutu yeo mwa pono, mi a lumba Mulimu wa mwa lihalimu, a li,
20“Ku lumbwe libizo la Mulimu
kamita ni mita
kakuli u butali ni maata.
21U laula linako ni likweli
za mwaha.
U yolisa malena ni ku tulula malena.
U fa batu ngana ni kutwisiso.
22U zibahaza lika ze sa zibwi
ni za likunutu,
mi u ziba ze patilwe mwa lififi.
U potolohilwe ki liseli.
23Na ku lumba ni ku ku kuteka,
Mulimu wa bo kukw'a luna.
U ni file ngana ni maata.
U alabile tapelo ya ka
ni ku lu bonisa se lu ta bulelela
mulena.”
Daniele u bulelela mulena tolo ni ku i talusa
24Daniele kih'a ya ku Arioki, ya n'a filwe maata ki mulena a ku bulaya baelezi ba Mababilona, mi a li, “U si ke wa ba bulaya. Ni ise ku mulena, mi ni ta y'o mu bulelela taluso ya tolo ya hae.”
25Cwale Arioki a isa Daniele kapili fapil'a mulena mi a bulelela mulena, a li, “Ni fumani kuli yo muñwi wa bahapiwa ba Majuda u kona ku bulelela muñ'a ka taluso ya tolo yeo.”
26Mulena a li ku Daniele ya n'a zibwa ka la Beliteshazare, “Kana wa kona ku ni bulelela se ni lolile ni taluso ya sona, nji?”
27Daniele a alaba, a li, “Muñ'a ka, ha ku na ñaka, wa mabibo, sinuhi mane nihaili bona babali ba linaleli ya ka kona ku ku bulelela taba yeo. 28Kono, ku na ni Mulimu mwa lihalimu, ya patulula ze patilwe. Ki yena ya zibisize muñ'a ka Mulena Nebukadenezare ze ta ezahala kwapili. Tolo yeohe, ki ye. N'e li pono y'o n'o boni u nz'o lobezi.
29“Muñ'a ka ha n'a lobezi, u lolile ka ze sa taha, mi Mulimu ya patulula likunutu, u mu bonisize ze ta ezahala. 30Cwale kunutu ye, ni i patululezwi isiñi kabakala kuli ni fita batu ba bañwi kwa butali, kono kikuli, wena muñ'a ka, u zibe taluso ya tolo ya hao, mi u utwisise mihupulo ye tile ku wena.
31“Muñ'a ka, mwa pono ya hao u boni siswaniso se situna si yemi fapil'a hao. N'e li se si benya-benya, ni ku sabisa hahulu. 32Toho ya sona ne i swana ni gauda ye nde hahulu. Sifuba ni miambo ya sona ne i ezizwe ka silivela, mi liteka ni linoka za sona ne li ezizwe ka kopa. 33Lilupi ni linumbu za sona ne li ezizwe ka sipi, mi mahutu ona n'a ezizwe ka sipi ni lizupa. 34Ha n'o sa si talimezi cwalo, kwa wa licwe le li si na se si li wisize, la t'o nata fa mahutu a siswaniso a lizupa ni sipi, mi la a pyata-pyata. 35Hona foo, sipi, lizupa, kopa, silivela, ni gauda za loba-lobeha mi za ba sina muuku wa mwa sihoto nako ya matabula. Za fefulwa ki moya kamukan'a zona, u sa siyi nihaili mutala feela. Kono licwe la hula ku fetuha lilundu le li kwahezi lifasi kaufela.
36“Ye, ki yona ye n'e li tolo. Cwale ni ta bulelela muñ'a ka se i talusa. 37Muñ'a ka, u yo mutuna ku fita malena kamukana. Mulimu wa kwa lihalimu u ku ezize mulena mi u ku file maata ni likute. 38U ku ezize mubusi wa lifasi mo ku na ni batu ni lifolofolo kaufela ni linyunywani. Ki wena toho ya gauda. 39Mwamulaho a hao ku ta ba ni mubuso o muñwi, o si ke wa ba o mutuna sina wa hao, mi mwamulaho a wo, ku ta ba ni wa bulalu, ili wa kopa, o ta busa lifasi kamukana. 40Mi cwale ku ta ba ni mubuso wa bune, o tiile sina sipi. Sina sipi mo i pyatela ni ku sila lika kaufela, u ta pyata ni ku sila mibuso ye i tangetile kaufela. 41Hape u boni kuli mahutu ni minwana ki ya lizupa ni sipi. Fo ku talusa kuli i ta ba mubuso o kauhani. U ta ba ni maata a sipi neku le liñwi, kakuli ku na ni sipi ye kopanyizwe ni lizupa. 42Kalulo ye ñwi ya minwana ki ya lizupa mi ye ñwi ki ya sipi, ku talusa kuli mubuso u ta ba ni maata, kono u tubeha kapili. 43U boni hape kuli sipi ne i kopanyizwe ni lizupa. Babusi ba mubuso wo ba ta lika ku kopana ka ku nyalelana, kono ha ba na ku kona, sina sipi mo i sa kopaneli hande ni lizupa. 44Ka nako ye ba busa malena bao, Mulimu wa lihalimu u ta toma mubuso o si ke wa fela. Mubuso wo ha u na ku komiwa, kono u ta feza mibuso yeo kaufela, ona u ine kuya kuile. 45U boni mo li kolomokezi licwe ku zwa fa lilundu ku si na ya li nyanganyisize, ni mo li natezi siswaniso se si ezizwe ka sipi, kopa, lizupa, silivela ni gauda. Mulimu yo mutuna u bulelela wena muñ'a ka se si ta ezahala ka nako ye taha. Ni ku taluselize hande-nde tolo ya hao, mi ni ku file taluso ya yona ya niti.”
Mulena u fa Daniele mupuzo
46Cwale Mulena Nebukadenezare a kubama fapil'a Daniele mi a laela kuli a ezezwe litabelo ni limpo. 47Mulena a li, “Mulimu wa hao ki yo mutuna hahulu ku fita milimu ye miñwi kamukana, Mulena wa malena, mi ili yena mupatululi wa ze patilwe, kakuli wena u konile ku talusa kunutu ye.” 48Cwale kiha s'a y'o fa Daniele situlo se situna, a mu fa limpo ze ñata ze nde, mi a mu beya ku zamaisa naha ya Babilona. 49Ka kupo ya Daniele, mulena a beya Shadrake, Meshaki ni Abedi-Nego ku talima litaba za naha ya Babilona, mi Daniele yena a siyala cwalo mwa kuta ya bulena.
Currently Selected:
Daniele 2: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.