BELE 14
14
Daniele ni baprisita ba Bele
1Mulena Asitagesi ha s'a shwile a yolwa ki Sirusi wa Peresia. 2Daniele n'e li mulikan'a hae yo mutuna, ya n'a utwana hahulu ni yena ku fita balikani ba hae kaufela. 3#Isa 46.1; Jer 51.44 Mwa Babilona ne ku na ni mulimu wa siswaniso ya n'a bizwa Bele ya n'a beelwanga litikanyo ze lishumi ka ze peli za bupi bwa buloto bo bu nekile hahulu, lingu ze mashumi a mane, ni litikanyo ze silezi za waine. Zeo kaufela ne li eziwanga litabelo ka zazi ni zazi. 4Ni yena mulena ne li wa kwateñi, mane n'a yanga ku y'o lapela siswaniso seo ka zazi ni zazi. 5Daniele, yena, n'a lapela Mulimu wa habo. Mulena a buza Daniele, a li, “Kiñi ha u sa lapeli Bele?”
Daniele a mu alaba, a li, “Ha ni lapeli liswaniso ze ezizwe ka mazoho a batu. Ni lapela Mulimu ya pila, ya ezize lihalimu ni lifasi, ya na ni maata fahalimw'a libupiwa kaufela ze pila.”
6Mulena a li, “Cwale wa lumela kuli Bele ha si mulimu ya pila? Ha u koni ku bona mw'a cela ni ku nwa ka zazi ni zazi?”
7Daniele a seha, mi a li, “Mulen'a ka, u si ke wa pumiwa. Ki lizupa feela mwahali, kwande ki sipi, mi a li ku ba a sa ci kamba ku nwa se siñwi.”
8Nto ye ya nyemisa mulena. A biza baprisita ba hae, mi a li, “Mu ni bulelele, ki mañi ya canga lico ze kaufela. Ha mu sa buleli hande, mwa shwa. Hape mu ni bonise mw'a cela mi ni kolwe luli. Fohe ni ta bulaya Daniele bakeñisa ku nyefula Bele.”
9Daniele a li ku mulena, “Ku eziwe sina m'o bulelezi.”
Ne ku na ni baprisita ba mashumi a supile ku sa balwi basali, ni bana ba bona.
10Mulena a ya mwa tempele ya Bele, a na ni Daniele. 11Baprisita ba Bele ba li ku yena, “Mulena, cwale luna lwa zwa, mi lu ta ku siya. U lukise lico ni waine mi u li siye mwateñi. Ku tuha fo u kwale munyako mi u beye fateñi silamatela sa poniso ya hao. Cwale ha u ka taha kamuso kakusasana wa t'o fumana lico li si ka ciwa ki Bele, u lu bulaye. Haiba li cilwe u bulaye Daniele, lihata yani.” 12Ne ba bulela cwalo kakuli ne ba sepile munyako o muñwi o n'o sa zibwi. Munyako wo, ki o ne ba ikezelize mwatas'a tafule, kuli ba n'o fitanga mwateñi ka zazi ni zazi ku t'o nga lico za litabelo.
13Baprisita ba ile, mi mulena u beile lico za Bele. 14Daniele a bulelela batu ba hae ku beya mufuse fa bulilo bwa tempele kaufela ku si na ya n'a bona, haisi feela mulena. Cwale ba zwa mwateñi, ba kwala munyako, mi mulena a beya silamatela kwa munyako.
15Cwale ka bona busihu bo baprisita ba taha ni basali ba bona ni bana, sina kamita, mi ba ca ni ku nwa lico kaufela.
16Habusa i sa li kakusasana mulena ni Daniele ba pakela.
17Mulena a buza Daniele, a li, “Kikuli silamatela si pumehile?”
Yena a mu alaba, a li, “Si sa lukile, mulena.”
18Cwale mulena a kwalula munyako, a talima kwa tafule mi a komoka hahulu, a li, “Oho Bele, u yo mutuna hahulu, mi ha u pumi mutu.”
19Kono nihakulicwalo Daniele a seha. A hanisa mulena ku ya hahulu mwahali, a li, “Talima fa bulilo mi u bone mitala ye.”
20Mulena a li, “Ni bona mahutu a banna, basali, ni banana!” 21Ka bunyemi a laela kuli baprisita ba swaliwe hamoho ni basali ni bana ba bona. Cwale ba mu bonisa munyako o n'o sa zibwi, o ne ba kenelanga ku t'o zwisa za fa tafule. 22Mulena a laela kuli ba bulaiwe, a fa Daniele Bele, mi yena a mu tuba hamoho ni tempele.
Daniele u bulaya sibatana
23Mwa Babilona ne ku na ni sibatana se situna, mi ni sona ne si lapelwa. 24Mulena a li ku Daniele, “Ha u na ku ni bulelela kuli yo ha si mulimu ya pila. Bona, wa pila, wa ca mi wa nwa. Cwale ha u koni ku latula kuli ha si mulimu luli. Mu lapele.”
25Daniele a li, “Ni lapela Mulena Mulimu wa ka, yo ili Mulimu ya pila. Mulena, ni kupa kuli u ni lumelele ku bulaya noha ye, ni si na mukwale kamba mulamu.”
26Mulena a li, “Na lumela kuli u eze cwalo.”
27Cwale Daniele a nga mafula a tala ni milili, a li bilisa hamoho. A li bupa mañende ni ku a fa sibatana kuli si ce. Sona sa a miza mi sa pazuha. Cwale Daniele a li, “A mu bone nto ye ne mu lapela!”
28Ba Babilona ha ba utwa ka za taba yeo, ba nyema hahulu. Ba kala ku toya mulena, ba li, “Mulena s'a fetuhile Mujuda. U lumelezi kuli Bele a zwisiwe, ni ku bulaya sibatana, mane hape u bulaile ni baprisita.” 29Cwale ba ya ku yena, ba li, “U lu fe Daniele. Ha u sa ezi cwalo, lu ta bulaya wena ni lubasi lwa hao.” 30Ba mu hapeleza ka tata kuli mane a lumela ku ba fa Daniele.
Daniele mwa musima wa litau
31 #
Dan 6.16-24
Ba nepela Daniele mwa musima wa litau, mi a ina mwateñi mazazi a silezi. 32Mwa musima mo ne ku na ni litau ze supile ze ne li fiwanga litupu za batu ze peli ni lingu ze peli ka zazi ni zazi, kono ka ona mazazi ao, ne li si ka fiwa se siñwi, ili kuli li ce Daniele.
33Cwale mupolofita Habakuki n'a li mwa Judea. N'a apeha busunso ni ku pumaka mahobe bunyinyani. A a beya mwa sizuma mi a' iseza bakutuli ba ba ne ba kutula lico kwa masimu. 34H'a li mwa nzila, lingeloi la Muñ'a Bupilo la li ku yena, “U ise lico z'o lwezi kwa Babilona, u y'o li fa Daniele ya mwa musima wa litau.”
35Habakuki a alaba, a li, “Mulena, na li ku ba ni sa boni Babilona mi ha ni zibi se siñwi ka za musima wo.”
36 #
Ezek 8.3 Lingeloi la mulena la mu swala kwa milili, la mu nanula, la mu isa kwa Babilona ka maata a lona mi la y'o mu lulela fa mulomo wa musima. 37Habakuki a huweleza, a li, “Daniele! Daniele! Nga lico z'a ku tiselize Mulimu.”
38Cwale Daniele a li, “Oho Mulimu, kanti n'o sa ni hupula, mi wena ha u si ka hana ba ba ku lata.” 39Cwale a yema, a ca lico, mi i sa li ka yona nako yeo lingeloi la nga Habakuki, la mu kutisa kwa naha ya habo.
40Ka lizazi la busupa mulena a taha ku t'o lila Daniele. H'a fita fa musima, a talima mwahali mi a bona Daniele a sa iketile hande. 41Mulena a huweleza, a li, “U yo mutuna, Mulena Mulimu wa Daniele, mi ha ku na mulimu yo muñwi haisi wena feela!” 42Cwale a zwisa Daniele mwa musima mi a laela kuli ba ba ne ba lelile ku timeza Daniele ba latelwe mwateñi. Kwa ezwa cwalo mi ba ciwa ki litau kaufel'a bona, mulena a nz'a talimezi.
Currently Selected:
BELE 14: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.