Mashitanguti 31
31
Kelezo ku mulena
1Mulena Lemuele n'a bulelezwi manzwi a ki m'ahe, a li,
2“Wena mwan'a ka ye ni lata, u kalabo kwa litapelo za ka. Ni ka ku bulelela sifi? 3U si ke wa sinyeza maata a hao kaufela kwa basali, ni mali a hao kaufela ku bona. Ba felize malena. 4Teelezahe, Lemuele. Malena ha ba lukeli ku nwa waine, kamba ku ba ni takazo ya ze kola. 5Ha ba nwa, ba libala milao, mi ha ba isi pilu kwa liswanelo ze tokwiwa ki batu. 6U fe batu ba ba shwa ze kola. U fe ba ba mwa maswabi waine. 7Ba tuhele ba nwe, mi ba libale bubotana ni maswabi a bona.
8“Bulela mwa sibaka sa batu ba ba sa koni ku ipulelela. Sileleza liswanelo za ba ba sa ikoneli kamukana. 9Bulela mwa sibaka sa bona, mi u be muatuli ya lukile. Sileleza liswanelo za babotana ni ba shebile.”
Musali ya lukile
10Musali ya lukile u fitela kwahule macwe a butokwa, kono ku tata cwañi ku mu fumana!
11Munn'a hae u beya sepo ya hae ku yena, mi h'a na ku ba mubotana.
12H'a sa pila, u mu eza hande, mi ha mu utwisi butuku.
13U ipatehisa ka ku eza bwanda ni masila.
14U tisa lico mwa hae ili ze zwa kwahule, sina lisepe za balekisi mo li ezeza.
15U zuha li si ka pazula ku lukiseza lubasi lwa hae lico ni ku bulelela babeleki ba basizana ze ba swanezi ku eza.
16U talima simu, mi wa i leka. Ka mali a fumani u eza simu ya likota za veine.
17U sebeza ka tata, u na ni maata, mi ki muikoneli.
18Wa ziba butokwa bwa sika s'a eza, mi u sebeza ni busihu.
19U ikotela bwanda mi u itukela masila a hae.
20U utwela babotana ni ba ba shebile butuku.
21H'a na taba niha ku bata, kakuli lubasi lwa hae lu na ni liapalo ze futumala.
22U eza likubo za fa mumbeta, mi u eza masila a mande a liapalo za hae za mubala o mupuzwa.
23Munn'a hae u zibahala hande. Ki yo muñwi wa ba bahulu ba munzi.
24U eza liapalo ni makanda, mi u li lekisa kwa balekisi.
25U maata, mi wa kutekeha, mi h'a sabi ze ka taha kwapili.
26U bulela ka butali, mi u na ni litaelo ze sepahala.
27U patehile nako kaufela, mi u tokomela ze tokwiwa ki lubasi lwa hae.
28Bana ba hae ba bonisa tabo ya bona, mi munn'a hae wa mu lumba.
29Munna u li, “Basali ba bañata ki basali ba ba lukile, kono wena wa ba fita, kaufel'a bona.”
30Bunde bwa siyemo bwa puma ni bunde bwa sifateho bwa fela, kono musali ya saba Muñ'a Bupilo u lukela ku lumbiwa.
31Mu mu kuteke ka z'a ezize kamukana. U lukela ku kutekiwa ki mañi ni mañi.
Currently Selected:
Mashitanguti 31: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.