2 Joani 1
1
1Liñolo le li zwa ku na, yo muhulu. Li ñolelwa mina mufumahali ya ketilwe ki Mulimu ni bana ba hae be ni lata luli. Ha si na, ni li nosi, ya mi lata, kono ni bona kaufela ba ba ziba niti. 2Niti yeo i inzi ku luna, mi i ta ina ni luna kuya kuile.
3Sishemo ni makeke ni kozo, ze zwa ku Mulimu Ndate ni ku Jesu Kreste Mwan'a hae, li be ni luna ba ba lumela ka mukwa wa niti ni ba ba latana.
Niti ni lilato
4Ku ni tabisize hahulu ku fumana kuli bana ba hao ba bañwi ba mwa niti, sina Ndate h'a lu laezi. 5#Joa 13.34; 15.12, 17 Mi cwale na ku kupa, wena mufumahali, kuli a lu lataneñi kaufel'a luna. Ye, ha si taelo ye nca ye ni ku ñolela. Ki taelo ye lu sa li lu i fumana kwa makalelo. 6Lilato, le ni bulela ka za lona, li talusa kuli lu swanezi ku pila lu nze lu mamela litaelo za Mulimu. Mi taelo, sina mo mu i utwezi kwa makalelo, kikuli mu pile ka ku latana.
7Bapumi ba bañata ba hasanezi mwa lifasi kaufela, ili batu ba ba bulela kuli Jesu Kreste n'a si ka ba mutu. Mutu ya cwalo ki mupumi, mi ki sila sa Kreste. 8Cwalehe, mu tokomele kuli mu si ke mwa sinyehelwa ki musebezi o mu ezize, kono mu fumane mupuzo wa mina ka ku tala.
9Mutu kaufela ya sa buluki lituto za Kreste, kamba ya li fiteleza, h'a pili ni Mulimu. Haili ya buluka lituto, yena u na ni Ndate ni Mwana. 10Haiba mu ka telwa ki mutu ya sa luti cwalo, mu si ke mwa mu amuhela mwa mandu a mina, mane mu hane ku mu lumelisa. 11Ya mu lumelisa kaufela u lumelelana ni yena mwa bumaswe bw'a eza.
Manzwi a mafelelezo
12Niha ni sa na ni litaba ze ñata, ha ni lati ku mi ñolela zona fa pampili ni ka enge, kakuli ni na ni sepo ya ku t'o mi potela, ni ku t'o ambola ni mina ka mulomo, ili kuli tabo ya luna i be tabo ye tezi.
13Bana ba mwanahenu, ya ketilwe ki Mulimu ni yena, ba ku lumelisa.
Currently Selected:
2 Joani 1: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.