1 Samuele 1
1
Elikana ni lubasi lwa hae kwa Shilo
1Ne ku na ni Mueferaimi ya n'a bizwa Elikana, ya n'a yahile mwa munzi wa Rama, mwa naha ya malundu ya Eferaimi. I n'e li mwan'a Jerohami, muikuly'a Elihu wa lusika lwa Tohu, wa mushiku wa Zufi. 2Elikana n'a nyezi basali ba babeli, bo Anna ni Penina. Penina n'a na ni bana, kono Anna n'a si na. 3Ka mwaha ni mwaha, Elikana n'a zwanga mwa munzi wa habo, ku y'o lapela, ni ku y'o ezeza Mulena ya Maata Kaufela sitabelo kwa Shilo, ko ne ku inzi bo Hofini ni Finehasi, bana ba Eli. Bubeli bwa bona n'e li baprisita ba Muñ'a Bupilo. 4Kamita Elikana ha n'a eza sitabelo, n'a fanga Penina ni bana ba hae liabelo za bona. 5Kono haili Anna, yena n'a fiwanga kabelo ye nde, ye tuna. N'a mu lata hahulu nihaike Muñ'a Bupilo n'a mu timile lupepo. 6Penina, muhalizw'a hae, n'a mu kataza ni ku mu filikanya, kakuli Muñ'a Bupilo n'a si ka mu fa bana. 7Kwa ba cwalo ka silimo ni silimo. Mo ne ba yelanga kwa ndu ya Muñ'a Bupilo, Penina n'a filikanyanga Anna hahulu, mane fokuñwi a ba a lile, mane a hane ni ku ca. 8Munn'a hae, yena Elikana, n'a mu buzanga kuli, “Anna, kanti u lilelañi? Kiñi ha u sa ci? Kikabakalañi ha u swabile nako kaufela? Kikuli na, ha ni fiti bana ba lishumi ku wena, nji?”
Tapelo ya Anna
9Ka nako ye ñwi, kwa Shilo, ha ba se ba felize ku ca, Anna a yema. Muprisita Eli, n'a inzi mwa sibaka sa hae kwatuko a munyako wa Tempele ya Muñ'a Bupilo. 10Anna n'a filikani hahulu, mi n'a lila a tomohile pilu, ha n'a nz'a lapela ku Muñ'a Bupilo. 11#Lipa 6.5 A itama ka luci, a li, “Mulena ya Maata Kaufela, u ni talime, na, mutang'a hao! Bona manyando a ka, mi u ni hupule! U si ke wa ni libala. Haiba u ka ni fa mwana wa mushimani, ni sepisa kuli ni ta ku ketela yena, kuli a ku sebeleze mwa bupilo bwa hae kaufela, mi h'a na ku kutiwa milili.”
12Anna a zwelapili ku lapela ku Muñ'a Bupilo nako ye telele, mi Eli n'a talimezi milomo ya hae. 13N'a lapela a kuzize. Milomo ya hae n'e nyanganya, kono n'a sa tumusi linzwi. Cwale Eli a hupula kuli mwendi u kozwi ki bucwala. 14A li ku yena, “Tuhela ku iponisa kuli u kozwi! Tuhela ku nwa, mi u cinale!”
15Yena a alaba, a li, “Batili, shangwe, ha ni si ka kolwa. Ha ni si ka nwa ni ku nwa! Ni zielehile, mi ni lapela ni nze ni fitisa manyando a ka ku Muñ'a Bupilo. 16U si ke wa hupula kuli ni musali ya si na tuso. Ne ni nze ni lapela cwalo kakuli ni utwa butuku hahulu.”
17Eli a li, “Zamaya ka kozo, mi Mulimu wa Isilaele a ku fe s'o mu kupile.”
18A alaba, a li, “U ni hupulange ka sishemo.” Kih'a zamaya. Cwale a y'o ca lico, mi maswabi a hae a fela.
Ku pepwa kwa Samuele ni ku tahiswa kwa hae
19Habusa kakusasana, Elikana ni lubasi lwa hae ba pakelela ku y'o lapela Muñ'a Bupilo. Kiha ba kutela kwa hae mwa Rama. Nako ha i se i fitile, Muñ'a Bupilo a alaba tapelo ya Anna. 20A itwala, mi a pepa mwana wa mushimani. A mu beya libizo la Samuele, mi a talusa, a li, “Ni mu kupile ku Muñ'a Bupilo.”
21Elikana ni lubasi lwa hae ba ya kwa Shilo ku y'o fitisa sitabelo sa silimo ku Muñ'a Bupilo hamoho ni sona sitabelo s'a n'a sepisize. 22Kono Anna n'a si ka ya. A bulelela munn'a hae, a li, “Mwana a s'a kwa feela, kihona ni ta mu isa kwa ndu ya Mulimu, kw'a ta y'o ina bupilo bwa hae kaufela.”
23Elikana a alaba, a li, “Eza s'o hupula kamukana kuli ki se sinde, mi u ine mwa hae ku fitela u mu kwisa. Muñ'a Bupilo a tiise sepiso ya hao kuli ku be cwalo.” Cwale Anna a ina kwa hae a nz'a babalela mwan'a hae.
24Ha s'a kwisize, Anna a mu isa kwa Shilo. Ba soteza nkomwana ya poho ye na ni lilimo ze talu, sizuma sa bupi ni piza ya waine. A nga mwana niha n'a sa li yo munyinyani cwalo, mi a mu isa kwa ndu ya Muñ'a Bupilo kwa Shilo. 25Ba sin'o bulaya pohwana, ba isa mwana ku Eli. 26Anna a li ku yena, “U ni swalele, muñ'a ka. Kana ha u ni hupuli? Ki na musali y'o kile wa bona a yemi fa, a nz'a lapela ku Muñ'a Bupilo. 27Ne ni mu kupile yena mwana yo, mi u ni file se ne ni kupa. 28Cwale ni til'o mu fa Muñ'a Bupilo. U ta ba wa Muñ'a Bupilo nako ya ku pila kwa hae kamukana.”
Cwale ba lapela Muñ'a Bupilo hona mo.
Currently Selected:
1 Samuele 1: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.