1 Samuele 2
2
Buitumelo bwa Anna
1 #
Luk 1.46-55
Anna a lapela, a li,
“Muñ'a Bupilo u talize pilu ya ka
ka tabo.
Ni tabile kabakala s'a ezize.
Ni seha lila za ka.
Ni na ni tabo
kakuli Mulimu u ni tusize.
2“Ha ku na ya kenile
sina Muñ'a Bupilo.
Ha ku na ya swana ni yena.
Ha ku na musilelezi ya swana
ni Mulimu wa luna.
3Tuhela ku itumba kwa hao.
U kuzise manzwi a hao
a buikuhumuso.
Kakuli Muñ'a Bupilo
ki Mulimu ya ziba lika kaufela,
mi u atula ze ba eza batu kamukana.
4Buta bwa masole ba ba maata
bu lobehile,
kono ba ba fokola ba fumana maata
hape.
5Ba ba utehile hande se ba sebeleza lico,
kono ba ba lapile ha ba sa tola
ba lapa hape.
Musali wa mumba u pepile bana
ba supile,
kono ya pepile ba bañata,
u siyezi a si na.
6 #
But 16.13; Tob 13.2 Muñ'a Bupilo wa bulaya,
mi wa pilisa.
U isa batu kwa naha ya bafu,
mi hape wa ba kutisa.
7U shebisa batu ba bañwi,
mi ba bañwi wa ba fumisa.
U kokobeza ba bañwi,
mi ba bañwi wa ba hulisa.
8U zwisa babotana mwa liluli,
mi u cimbula linjebwe mwa bumai
bwa bona.
U ba eza balikani ba malena,
mi u ba beya mwa libaka ze kutekeha.
Mitomo ya lifasi ki ya Muñ'a Bupilo.
U yahile lifasi kamukana fahalimw'a
yona.
9“U sileleza bupilo bwa batu ba hae
ba ba sepahala,
kono ba ba maswe ba likelela
mwa lififi.
Mutu h'a koni ku tula ka maata a hae.
10Lila za Muñ'a Bupilo li ta bulaiwa.
U ta ba lumiseza mishika,
a li kwa lihalimu.
Muñ'a Bupilo u ta atula lifasi
kamukana.
U ta fa mulena y'a iketezi maata.
Mupulusi y'a iketezi,
u ta mu fa maata a ku tula.”
11Cwale Elikana a kutela kwa hae mwa Rama, kono mushimani yena, a siyala mwa Shilo, mi a sebeleza Muñ'a Bupilo mwa pabalelo ya muprisita Eli.
Bana ba Eli
12Bana ba Eli n'e li batu ba ba maswe hahulu. Ne ba si na taba ni Muñ'a Bupilo. 13Ne ba sa tokomeli milao bakeñisa ze batiwa ki baprisita kwa batu. Kono ne ba eza kuli mutu ha n'a tisa sitabelo sa hae, mutang'a muprisita n'a taha a sweli tabisa ya meeno a malalu. Ha ku na taba haiba nama n'e sa buzwa. 14N'a kenya tabisa mwa piza, mi sifi ni sifi se ne si taha kwa tabisa n'e li sa muprisita. Kihona mo ne ba ezeza kwa Shilo cwalo kwa Maisilaele kaufela ba ba ne ba t'o ezezanga kwateñi litabelo. 15Fahalimw'a zeo, lisuzo niha ne li si ka zwiswa kale ni ku ciswa, mutang'a muprisita n'a taha ku t'o li ku mutu ya n'a eza sitabelo, “Ni fe nama ya muprisita ya ku besa. H'a na ku amuhela ku wena nama ye apehilwe. U bata feela ya butala.”
16Haiba mutu n'a ka alaba, a li, “Tuhela, lu cise lisuzo pili, kihona u ta nga z'o bata,” mutang'a muprisita n'a ka li, “Batili! Ni fe yona hona fa! Haiba u sa ni fi, ni ta ikungela yona ka maata!”
17Sibi sa bana ba Eli seo, n'e li se si maswe ka ku fitisisa fapil'a Muñ'a Bupilo, kakuli ne ba shwaula sitabelo s'a n'a ezezwa.
Samuele mwa Shilo
18Mushimani yo, Samuele, a zwelapili ku sebeleza Muñ'a Bupilo niha n'a sa li mwanana cwalo, mi n'a apalanga efoda, ili siapalo sa fa sifuba sa bwanda bwa line. 19M'ahe n'a mu lukelanga siapalonyana se sitelele, ka mwaha ni mwaha, mi n'a mu isezanga sona ha n'a ya ni munn'a hae ku y'o eza sitabelo sa silimo ni silimo. 20Eli n'a fuyaulanga Elikana ni musal'a hae, mi n'a li ku Elikana, “Muñ'a Bupilo a ku fe bana ba bañwi ku yena musali yo, ba ba ta nga sibaka sa Samuele y'o file Muñ'a Bupilo.”
Mi ku zwa fo ne ba kutela kwa hae.
21Muñ'a Bupilo a tohonolofaza Anna, mi a ba ni bashimani ba balalu ni basizana ba babeli. Mushimani yo, Samuele, a hulela mwa musebezi wa Muñ'a Bupilo.
Eli ni bana ba hae
22Eli n'a s'a supezi hahulu. N'a nz'a utwanga ze ne eziwa kamukana ki bana ba hae kwa Maisilaele, ni kuli mane ne ba lobalanga ni basali ba ba ne ba sebeza kwa munyako wa Tende ya Mulimu. 23Kiha s'a li ku bona, “Kiñi ha mu eza lika ze cwana? Batu kaufela ba ni bulelela ze maswe ze mu eza. 24A mu li tuhele, bana ba ka! Zeo, ki zona likezo za mina ze maswe ze ba bulela batu ba Muñ'a Bupilo! 25Haiba mutu a foseza yo muñwi, Mulimu wa kona ku mu yemela. Kono ya ka yemela mutu ya foseza Mulimu ki mañi?”
Kono ne ba sa isi pilu ku z'a n'a ba bulelelanga ndat'a bona, kakuli Muñ'a Bupilo n'a s'a lelile ku ba bulaya.
26 #
Litu 46.13;
Luk 2.52
Haili ka mushimani yo Samuele yena n'a hula cwalo a nz'a latiwa ki Mulimu ni batu.
Bupolofita ka lubasi lwa Eli
27Kwa taha mupolofita ku Eli ya n'a tisa manzwi a Muñ'a Bupilo, a li, “Kukw'a hao Aruni, ni lubasi lwa hae, ha ne ba sa li batanga ba Faro mwa Egepita, na iponahaza ku yena. 28#Mut 28.1-4; Malivi 7.35-36 Na keta ba lusika lwa hae ku ba baprisita ba ka mwahal'a Maisilaele kamukana. Na ba ketela ku t'o sebeza kwa katala ka ka, ku cisa miinko, ni ku apalanga efoda ye kenile ye bonisa tato ya ka. Hape na ba fa ni tukelo ya ku nga kalulo ye ñwi kwa litabelo ze cisezwa fa katala. 29Cwalehe, mu talimelañi ka takazo litabelo ni limpo za ka ze ni laezi? Kikabakalañi, Eli, ha u kuteka bana ba hao ku fita na, ka ku ba liselela ba inunisa ka likalulo ze nde kaufela za litabelo e ni fiwa ki batu ba ka? 30Na, Muñ'a Bupilo, Mulimu wa Isilaele, ne ni sepisize kale kuli lubasi lwa hao, ni ba mushiku wa hao, ki bona ba ba ka ba baprisita ba ka nako kamukana. Kono cwale ni bulela kuli ha ni sa lata cwalo ni hanyinyani! Kabakaleo ni ta kuteka ba ba ni kuteka, haili ba ba ni shwaula bona ni ta ba nga ka bunyinyani. 31Cwale, bona! Nako ya ta, ye ni ta bulaya micaha kaufela mwa lusika lwa hao ni ba mushiku wa hao kaufela, kuli mane ku si ke kwa ba ni mutu ya ta supala. 32U ta nyanda, mi u ta ñenehela limbuyoti kaufela ze ni ta fa Maisilaele ba bañwi, kono mwa lubasi lwa hao, ha ku na ya ka pila mane a supale. 33Nihakulicwalo yo muñwi wa baikulu ba hao ni ta mu pilisa, mi u ta ni sebeleza a be muprisita. Kono wena u ta ba sibofu, wa felelwa ki sepo kaufela. Haili baikulyowe ba bañwi kamukana ba ta shwa monde. 34#1 Sam 4.11 Mi bana ba hao ba babeli, bo Hofini ni Finehasi, ha ba ta shwa zazi li li liñwi, taba ye i ta ku bonisa kuli se ni bulezi si ta ezahala. 35Ni ta keta muprisita ya ta sepahala ku na, mi a eza lika kamukana ze ni bata kuli a li eze. Ni ta mu fa baikulu ba ba ta na ba sebeza kamita fapil'a mulena ye ni iketezi. 36Ufi ni ufi wa lusika lwa hao ya ka banduka u ta ya ku muprisita yo ku y'o mu kupa mali ni lico, ni ku y'o kupa kuli a lumelelwe ku tusa baprisita, ili kuli a fumane sa ku ca.”
Currently Selected:
1 Samuele 2: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.