1 Pitrosi 2
2
Licwe le li pila ni sicaba se si kenile
1Hakulicwalo, mu lisele bumaswe kaufela, bupumi ni buikuhumuso, muna ni lusinyo! 2Mu swane ni limbututu ze sa z'o pepwa. Mu nyolelwe nako kaufela mabisi a kenile a Moya, ili kuli ka ku a nwa, mu kone ku hula ni ku piliswa. 3#Lipi 34.8 Sina mo ku ñolezwi, “Mu se mu utwile bunde bwa sishemo sa Mulena.”
4Mu tahe ku Mulena, ku lona licwe le li pila, le li hanilwe ki bayahi, kono le li ketilwe, ili la butokwa, ki Mulimu. 5Ni mina mu tahe, mi mu t'o sebeliswa sina macwe a pila kwa ku yaha tempele ya moya. Mwateñi, mu ta ba sitopa sa baprisita ba ba kenile, bao musebezi wa bona i ta ba wa ku iseza Mulimu litabelo za moya ze ta amuheleha ku yena ka Jesu Kreste. 6#Isa 28.16 Ku ñozwi kuli,
“Ni ketile licwe la butokwa
le ni toma cwale mwa lilulu la Sione.
Ya ta lumela ku lona kaufela h'a na ku swaba ni kamuta.”
7 #
Lipi 118.22
Licwe le ki la butokwa hahulu ku mina ba ba lumela. Kono haili ku ba ba sa lumeli,
“Licwe le li hanilwe ki bayahi kuli ha li na tuso,
ki lona le li fetuhile licwe la mwa lilulu.”
8 #
Isa 8.14-15
Mi ku ñozwi hape kuli,
“Le, ki lona licwe fo ba ka sitatala batu,
licwe le li ta ba wisa.”
Ba sitatile kakuli ba hanile ku lumela linzwi. Yeo, i n'e li tato ya Mulimu ku bona.
9 #
Mut 19.5-6; Isa 43.20, 21; Mul 4.20; 7.6; 14.2; Tite 2.14; Isa 9.2 Kono mina mu lusika lo lu ketilwe, baprisita ba Mulena, sicaba se si kenile, batu ba Mulimu. Mu ketezwi ku talusa misebezi ye komokisa ya Mulimu, yena ya mi zwisize mwa lififi ku mi tisa mwa liseli la hae le li komokisa.
10 #
Hos 2.23
Pili ne mu si batu ba Mulimu, kono cwale mu sicaba sa hae. Pili ne mu sa zibi sishemo sa Mulimu, kono cwale mu si fumani.
Balumeli ba pile sina batanga ba Mulimu
11Balikani ba ka, na mi kupa, sina ha mu li bazwahule ba ba til'o koza feela mwa lifasi le, kuli mu kauhane ni litakazo ze maswe ze lwanisa moya. 12Mu be ni mikwa ye minde mwahal'a bahedeni, kuli niha ba ka mi tameleza kuli mu eza ze maswe, ba lemuhe ze nde ze mu eza, mi ka mukwa wo ba lumbe Mulimu zazi l'a ka taha.
13Kabakala Mulena, mu ipeye kwatas'a ba ba filwe maata a ku zamaisa, pili kwatas'a mulena, yena muzamaisi yo muhulu. 14Mu ipeye ni kwatas'a babusi ba ba lumilwe ki yena ku fa ba ba eza maswe mulatu ni ku lumba ba ba eza hande. 15S'a lata Mulimu kikuli mu kuzise ka likezo ze nde, ze mu eza, lipulelo za bukuba za batu ba ba sa zibi se siñwi. 16Mu pile sina batu ba ba lukuluhile. Nihakulicwalo, mu si ke mwa sebelisa tukuluho ya mina ku kwahela bumaswe, kono mu pile sina batanga ba Mulimu. 17Mu kuteke batu kaufela, mu late balumeli ba bañwi, mu sabe Mulimu, mi mu kuteke mulena.
Mutala wa manyando a Kreste
18Mina batanga, mu ipeye kwatas'a malen'a mina, mi mu ba bonise likute la mina kaufela, isiñi feela ku ba ba na ni sishemo ni musa, kono ni ku bona ba ba na ni buhali. 19Luli ki nto ye nde ku itiisa mwa manyando, ha lu nyandiswa ka ona niha lu si na mulatu, kakuli ki mw'a latela Mulimu. 20Mupuzo o mu ta fumana ki ufi ka ku itiisa ha mu natelwa ze mu fosize? Kono haiba mu itiisa mwa manyando, niha mu ezize hande, fohe ki nto ye nde fapil'a Mulimu. 21Ki sona s'a mi bizelize Mulimu, kakuli Kreste kasibili u mi nyandezi, mi u mi siyezi mutala, kuli mu hate mw'a hatile. 22#Isa 53.9 Ha ku na sibi s'a ezize, mi ha ku na ya mu utwile a bulela buhata ka mulomo wa hae. 23#Isa 53.7 Ha n'a tapaulwa, h'a si ka alaba ka litapa. Ha n'a nyandiswa, h'a si ka fumbela, kono a beya sepo ya hae ku Mulimu, muatuli ya lukile. 24#Isa 53.5 Kreste kasibili u lwezi libi za luna fa mubili wa hae, fa sifapahano, kuli lu shwe kwa sibi mi lu pile mw'a latela Mulimu. Ki ka mañiba a hae ha mu folisizwe. 25#Isa 53.6 Ne mu swana ni lingu ze latehile. Kono cwale mu kutiselizwe ku yena ya li mulisana ni mubuluki wa mioya ya mina.
Currently Selected:
1 Pitrosi 2: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.