Buka ya Pili ya Makabaeusi 3
3
1Cwale mwan'a hae Judeasi, ya n'a bizwa Makabaeusi, a mu yola. 2Banyani ba hae kaufela ba mu tusa, hamoho ni ba ba ne ba sebelisana ni ndat'ahe cwalo, mi ba lwana ndwa ya Isilaele ka lipilu za bona kaufela.
3A hulisa maata a sicaba sa habo.
A apala sisilelezo sa fa sifuba
sina mutabani,
mi a cakela liapalo za hae kaufela
za ndwa.
A lwana lindwa ze ñata
ka ku tatamana,
a nz'a sileleza makolo ka mukwale
wa hae.
4N'a swana sina tau mwa lindwa
za hae kaufela,
sina mwan'a tau ya lila ha s'a selile.
5A lelekisa ni ku bulaya bafetuheli,
mi a cisa ba ba ne ba nyandisa
sicaba sa habo.
6Bafetuheli ba balehiswa
ki ku mu saba,
ba likezo ze maswe kaufela ba zieleha,
mi tukuluho ya zwelapili mwa zamaiso
ya hae.
7A utwisa butuku malena ba bañata,
kono ba lusika lwa Jakobo
ba tabiswa ki misebezi ya hae,
mi kupuzo ya hae i fuyauzwi kuya kuile.
8A ya mwa minzwi kamukana ya Judea,
a yundisa ba ba maswe kamukana
ba ba ne ba li mwateñi,
mi a felisa buhali bo ne bu tahezi
Isilaele.
9Libizo la hae la bubana
ku isa kwa mafelelezo
mi a kopanya ba ba ne ba se ba bata
ku yunda.
Ku tula kwa pili kwa Judeasi
(2 Mak 8.1-7)
10Kono Apoloniusi a kopanya bahedeni ni mpi ye tuna ye zwa kwa Samaria ku t'o lwanisa Isilaele. 11Judeasi ha s'a utwa, a y'o mu katanyeza, a mu tula mi a mu bulaya. Buñata bwa holofala, mi ba ba ne ba bandukile ba baleha. 12Tutu ya bona ya hapiwa mi mukwale wa Apoloniusi wa ngiwa ki Judeasi, mi yena a itusisa ku lwana ka ona mwa bupilo bwa hae kaufela.
13Seroni muzamaisi wa makuta a Siria a utwa kuli Judeasi u kopanyize mpi ya balumeli ni batabani tota. 14A li, “Ni ka hulisa libizo la ka kuli ni kutekehe mwa mubuso haiba ni ka lwanisa Judeasi hamoho ni balateleli ba hae ba ba nyefula litaelo za mulena cwalo.” 15Kabakaleo a funduka hape, a na ni mpi ye ñwi ye maata ya bahedeni ku y'o mu tusa kwa ku kutiseza Maisilaele bumaswe. 16Seroni n'a s'a li kwa njetumuko ya Beti-Horoni, h'a y'o katanyezwa ki Judeasi a na ni banna ba sikai. 17Kono ba sa bona feela mpi ye tuna i ba sutelela, ba li ku Judeasi, “Lu ta kona cwañi ku lwanisa mpi ye tuna cwalo, lu li ba sikai feela? Lu katezi, mi ha ku na se lu cile kacenu.”
18Judeasi a alaba, a li, “Ku bunolo kuli batu ba bañata ba tulwe ki ba sikai feela. Sihulu ha ba lamulelwa ki Muñ'a Bupilo, i ka ba ba bañata kamba ba sikai, ki nto ye swana. 19Ku tula mwa ndwa ha ku yi ka buñata bwa batu, kono ki ka maata a zwa ku Mulimu. 20Ba t'o lu lwanisa ka moya wa buikuhumuso ni ku t'o lu bulaya ka matalu, hamoho ni basali ni bana ba luna, ni ku t'o lu tukuta. 21Kono lu lwanela bupilo ni milao ya luna! 22Mulimu u ka ba pyatela fapil'a luna. Cwale mu si ke mwa ba saba.”
23A sa feza feela ku bulela, a ba kenela mi a ba tabanisa ka sipundumukela mane Seroni ni mpi ya hae ba tulwa. 24Judeasi a ba tatama ku zwa kwa Beti-Horoni mane ku y'o fita mwa libala. Kwa shwa banna ba mianda ye supile ka u li muñwi, mi ba ba ne ba siyezi ba balehela mwa naha ya Mafilisita. 25Judeasi ni banyani ba hae ba kala ku sabiwa, mi sabo ye tuna ya kenela macaba a n'a bapani ni bona. 26Libizo la hae mane la y'o utwahala ku mulena, mi mwa macaba kamukana kwa bulelwa za Judeasi ni lindwa za hae.
Buitukiso bwa ku ya kwa Peresia ni Judea
27Litaba za lindwa zeo kaufela za t'o halifisa hahulu Antiokusi, mane a laela kuli makuta a mwa mubuso wa hae kaufela a kopane mi ya ba mpi ye maata hahulu. 28H'a kwalula pulukelo ya hae, a abela limpi za hae tuelo ya silimo kaufela, ni ku ba bulelela kuli ba itukiseze butata kaufela. 29Kono cwale a fumana kuli mali a mwa pulukelo ya hae n'a sa likani, ni kuli mali a mitelo ya mwa naha ya hae n'a fukulizwe ki mifili-fili ni ziezi ye n'e tahisizwe ki yena ka ku felisa milao ya kale. 30A kala ku saba kuli, sina ha ne se ku ezahalile cwalo hañata, n'a si ke a ba ni mali a n'a ka likana lisinyehelo zeo ni limpo z'a n'a fana ka tato ya hae ku fita malena kaufela b'a n'a yolile. 31Ka ku zieleha kwa hae ko kutuna cwalo, a lela ku y'o kena kwa Peresia ili kuli a y'o telisa batu mwa manaha ni ku kubukanya mali a mañata.
32Lisiasi, munna ya kutekeha wa lusika lwa bulena, a ketwa ku siyala mwa sibaka sa mulena ni ku talima litaba za puso ya naha, ku kalela kwa Nuka ya Yuferati ku isa kwa mululwani wa Egepita. 33Ne li yena ya n'a babalela mwan'a hae ya bizwa Antiokusi ku fitela mulena a kuta. 34Antiokusi a mu siyela kalulo ye ñwi ya mpi ya hae, ni litou, mi a mu laela z'a n'a swanezi ku eza kaufela, sihulu ka za batu ba Judea ni Jerusalema. 35N'a lelile ku y'o ba lwanisa, ku ba tubaka ni ku felisa maata a Isilaele ni batu ba ba ne ba sa siyezi mwa Jerusalema, ni ku felisa kupuzo ya bona mwa sibaka seo. 36N'a lelile ku toma bana ba bazwahule mwa libaka kaufela za naha ya bona, ni ku aba naha ya bona ka ku laula. 37Cwale mulena a nga kalulo ya bubeli ya makuta a mpi ya hae ye ne i siyezi, mi a funduka mwa Antioke, muleneñi wa naha ya hae, ili ka silimo sa mwanda ka mashumi a mane ni ze supile. A sila Nuka ya Yuferati mi a fita ka nzila ya linaha za malundu.
Gorgiasi ni Nikanora ba isa mpi mwa Judea
(2 Mak 8.8-29, 34-36)
38Lisiasi a keta Pitolemi mwan'a Dorimenesi, Nikanora, ni Gorgiasi, banna ba ba zibahala hahulu mwahal'a Balikani ba Mulena. 39A ba fa zamaiso ya mpi ya masole ba likiti ze mashumi a mane ni ba lipizi ba likiti ze supile ku y'o lwanisa naha ya Judea ni ku i falaza, ili ka taelo ya mulena. 40Mpi kaufela ya funduka mi ya y'o fita fakaufi ni Emausi mwa naha ya mabala mo ne ba il'o toma mafulo. 41Balekisi ba mwa naha yeo ha ba se ba ba utwile, ba taha kwa mafulo ba nze ba lwezi gauda ni silivela ye ñata hahulu mi mawenge cwalo, ba nze ba hupula ku t'o leka batanga ba Maisilaele. Ba sindeketwa ki sitopa sa batu ba naha ya Maedomo ni ya Mafilisita.
42Judeasi ni banabahabo ba lemuha kuli bumaswe ne bu se bu ekezehile hahulu, ni kuli limpi ne li til'o tibelela mwa naha ya bona. Hape ne ba ziba hande-nde kuli mulena n'a laezi kuli sicaba si t'o yundiswa kaufela. 43Kiha ba ambolisana, ba li, “A lu zuseñi matota a sicaba sa habo luna, mi lu lwanele sicaba sa luna hamoho ni sibaka se si kenile.” 44Ba kopanya mpi ya bona ku itukiseza ndwa, ni ku lapela kuli ba fiwe musa mi ba shwelwe makeke.
45Jerusalema n'o siyezi u si na batu
sina lihalaupa.
Ne ku si na ni yo mukana kwa bana ba ona
ya n'a kena kamba ku zwela fande.
Sibaka se si kenile ne si hatikezwi
ka mahutu ki balicaba
ba ba ne ba li mwa sisabelo
sa mwa Munzi wa Davida,
o n'o s'o li sibaka sa matibelelo
a bahedeni.
Tabo n'e s'e felile ku Jakobo.
Lipina ni liopeliso ne li kuzize.
Mukopano wa Majuda kwa Mizipa
46Ha ba se ba kopani ba liba kwa Mizipa, ili sibaka se si libani ni Jerusalema, kakuli Mizipa n'e li sona sibaka sa Maisilaele sa ku lapelela. 47Ka lona zazi leo ba itima lico mi ba apala masaka. Ba isasa mulola kwa litoho mi ba pazaula liapalo za bona. 48Bakeñisa ku bata tuso kwa milimu ya maswaniso sina bahedeni, bona ba apula Buka ya Mulao. 49Ba tisa cwalo ni liapalo za buprisita ni miselo ya mutamuno ni kalulo ya bulishumi, mi ba kopanya Manazareni, ili ba ba ne ba se ba felize nako ya buitamo bwa bona. 50Cwale ba huweleza, ba li, “Batu ba, lu ta ba eza cwañi, mi lu ta ba isa kai? 51Libaka za hao ze kenile kaufela li hatikezwi mi li silafalizwe, mi baprisita ba hao ba lila kabakala ku tompolowa hahulu. 52Mi bahedeni ba kopani hamoho ku t'o lu yundisa. Wena wa ziba se ba hupula ka luna. 53Lu ta kona cwañi ku lwana ni bona, haiba wena u sa t'o lu tusi?” 54Cwale ba liza litolombita mi ba shaa mukanga o mutuna.
55Ku zwa foo, Judeasi a keta bazamaisi ba makuta ku etelela batu ba sikiti, ba mwanda, ba mashumi a ketalizoho, kamba batu ba lishumi feela. 56#Mul 20.5-8; Baat 7.3 A bulelela ba ba ne ba yaha mandu, ba ba ne ba beelelize basali, ba ba cala masimu a likota za veine, kamba mapyeha, kuli ba kutele kwa mahae, ka ku ya ka Mulao. 57Cwale mpi ya funduka mi ya t'o tibelela kwa mboela wa Emausi. 58Judeasi a ba laela, a li, “Mu itukise, mu swale lilwaniso za mina ka bundume. Kakusasana mu itukiseze ku lwanisa bahedeni ba, ba ba til'o kopana ku t'o lu yundisa ni ku sinya sibaka sa luna se si kenile. 59Bunde bwa luna ki ku shwela mwa ndwa ku fita ku talimela sicaba sa luna si sinyeha hamohocwalo ni sibaka se si kenile. 60Cwale ku ezahale sona s'a lata Mulimu.”
Currently Selected:
Buka ya Pili ya Makabaeusi 3: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.