Buka ya Pili ya Makabaeusi 2
2
Matatiasi ni bana ba hae
1Ka ona mazazi ao Matatiasi mwan'a Joani, mwan'a Simioni muprisita wa lusika lwa Joaribi, a tuta mwa Jerusalema mi a y'o yaha mwa Modeini. 2N'a na ni bana ba ketalizoho. Bo Joani n'a zibwa ka la Gedi. 3Simoni n'a bizwa Tasi. 4Judeasi n'a bizwa Makabaeusi. 5Eliazare n'a bizwa Avarani. Jonatani n'a bizwa Afasi. 6Cwale Matatiasi a bona linyefulo zeo li ezahala mwa Judea ni mwa Jerusalema. 7A li, “Mawee, kana ki sona se ne ni pepezwi, kuli ni bone ku falala kwa sicaba sa hesu ni ku shandauka kwa Munzi o Kenile, mi ni ine feela munzi ha u nz'o hapiwa ki lila za ona ni sibaka se si kenile si hapwa ki bazwahule.
8“Tempele ya ona i fetuhile sina mutu
ya tompolozwi.
9Lipiza ze ne u tumisa li hapilwe.
Limbututu za ona li bulaezwi
mwa mikwakwa.
Micaha ya ona i bulailwe ki mikwale
ya lila.
10Kana ku na ni sicaba
se si si ka ikungela kwa maata a ona
a bulena,
se si si ka ikapela se siñwi kwa tutu
ya ona?
11U amuhilwe mikabo ya ona kaufela.
Tukuluho ya ona ya pili i fetuhile
butanga.
12A mu bone mo si sinyehezi Tempele
ya luna ye kenile,
bunde bwa luna, maata a luna.
Kaufela li sinyehile, li tompolozwi
ki bahedeni.
13Lu sa pilelañihe?”
14Matatiasi ni bana ba hae ba pazaula liapalo za bona, ba apala liapalo za maswabi, mi ba silisa hahulu.
Muliko wa litabelo kwa Modeini
15Manduna ba mulena, ba ba ne ba hapeleza batu ku sa ya ka Mulao wa Mulimu, ba taha kwa Modeini ku t'o hapeleza batu kuli ba eze litabelo. 16Maisilaele ba bañata ba t'o kubukana ku bona, kono Matatiasi ni bana ba hae ba ikambuta. 17Cwale manduna ba mulena ba bulela ni Matatiasi, ba li, “U muzamaisi ya kutekeha, mutu yo mutuna mwa munzi mo. U na ni bana ni banyani ba hao ba ba kona ku ku tusa. 18U be wena wa pili ku taha fapil'a batu ni ku t'o peta taelo ya mulena sina mw'a ezelize macaba kaufela, bazamaisi ba Judea ni ba ba bandukile mwa Jerusalema kamukana. Wena ni bana ba hao, mu ta balelwa kwa Balikani ba Mulena. Hape, wena ni bana ba hao mu ta kutekiwa ka gauda ni silivela ni ka limpo ze ñata.”
19Matatiasi a alaba ka ku tumusa linzwi, a li, “Macaba kamukana a mwa mubuso wa mulena a mamele litaelo za hae, ni ku tuhela bulapeli bwa sihabo bona mi ba latelele litaelo za hae. 20Kono na, bana ba ka, ni banyani ba ka, lu ka latelela bulikani bwa bo kukw'a luna. 21Mulimu a lu shemube kuli lu si ke lwa kauhana ni Mulao hamoho ni liswanelo za ona. 22Haili ka za litaelo za mulena, ha lu na ku li latelela. Ha lu na ku keluha mwa tumelo ya luna, i ka ba ka mukwa ufi kamba ufi.”
23A sa feza feela ku bulela, kwa taha Mujuda fapil'a batu kaufela ku t'o eza sitabelo fa katala mwa Modeini ili ka ku ya ka taelo ya mulena. 24Matatiasi h'a bona cwalo, a utwa hahulu butuku ni ku filikana, mane a palelwa ku iswala, kih'a tulelela mutu yo mi a mu bulaela fa katala fo. 25Ka yona nako yeo a bulaya ni nduna wa mulena, ya n'a til'o tiisa taelo ya kuli ku ezwe litabelo, mi a lutulula ni kona katala kao. 26#Lipa 25.6-15 Ka ciseho ya hae ya ku buluka Mulao, a eza sina mw'a n'a ezelize Finehasi ku Zimuri mwan'a Salu.
Muliko wa la Pumulo mwa malundu
27Cwale Matatiasi a ya mwa munzi kaufela a nz'a huweleza, a li, “Mutu kamukana ya lata ku yemela Mulao mi a tiyezi mwa bulikani, a tahe mi a ni latelele.” 28Cwale yena ni bana ba hae ba sabela mwa malundu, ba siya bufumu bwa bona kamukana mwa munzi.
29Hona fo, batu kamukana ba ba ne ba lata niti ni ku luka, ba mu latelela mwa malundu ku y'o ina mwateñi. 30Ba nga bana, basali, ni likomu za bona, kakuli manyando a bona n'e li a matuna hahulu. 31Kono taba yeo ya y'o bihelwa batu ba mulena ni masole ba ba ne ba li mwa Jerusalema, ili mwa Munzi wa Davida, kuli batu ba ba nyazize taelo ya mulena ba il'o ipata mwa malundu, ni kuli ba latelezwi ki batu ba bañata. 32#2 Mak 6.11 Kiha ba latelelwa ki mpi ye maata hahulu, mi ha i fita ku bona ya talimana ni bona i nze i yemisize hande makolo a yona, i itukiselize ku ba lwanisa ka Lizazi la Pumulo. 33Kono pili ba ba laela, ba li, “Cwale ku likani! A mu tahe, mu t'o eza ka taelo ya mulena, mi mu ta piliswa.”
34Kono bona ba alaba, ba li, “Ha lu lati ku taha ku mina mi ha lu na ku latelela litaelo za mulena kuli lu nyefule Lizazi la Pumulo.”
35Lila ze ñwi kapili-pili ba kala ku lwana. 36Kono Majuda, bona, ne ba si ka lwana, kapa ku ba nepa macwe, mane ne ba si ka sileleza nihaili libaka za maipato. 37Ba bulela feela, ba li, “A lu ishweleñi feela lu si na mulatu. Lihalimu ni lifasi le te li be lipaki kuli mu til'o lu yundisa feela, mu sa ezi ka ku luka.” 38Ndwa ya ba kenela ka la Pumulo luli, mi ba bulawa ka situhu, hamoho ni basali, bana ba bona, ni likomu cwalo, mane kwa shwa batu ba ba fita fa sikiti.
Kezo ya Matatiasi ni bahabo
39Matatiasi ni bahabo ha ba y'o utwa, ba silisa hahulu banabahabo bona. 40Ba ipulelela, ba li, “Haiba kaufel'a luna lu eza mo ba ezelize banabahabo luna, mi lwa hana ku itwanela kwa bahedeni bakeñisa bupilo ni puso ya luna, ba ta lu timeza feela fa lifasi kapili-pili.” 41Cwale ka lona zazi leo ba lumelelana cwana, ba li, “Haiba lu ka lwaniswa ki mutu ufi ni ufi ka la Pumulo, i ka ba mañi kamba mañi, lu ta itwanela. Lu si ke lwa bulaiwa kaufela sina mo ba ezelizwe banabahabo luna mwa libaka mo ne ba ipatile.”
42Kapili-pili ba t'o ekezwa ki sitopa sa Mahasidea, ili banna ba balwani ba Maisilaele ba buhali, ba ba itamile ku lwanela Mulao kamukan'a bona. 43Ba ba ne ba balehile kwa manyando kaufela, ba t'o ba ekeza, mi ba ba tusa. 44Ba ikeza mpi ye maata ye na ni lilwaniso. Ka bunyemi ba bulaya baezalibi, mi ka buhali bwa bona ba timeza bafetuheli, mane ba ba ne ba bandukile ku bona ba balehela kwa bahedeni ku y'o pilela kwateñi. 45Matatiasi ni bahabo ba zamaya ba nze ba lutulula tutala. 46Ba isa bashimani kamukana, ba ba ne ba si ka ya kale kwa mupato, ka kapelezo, mwa linaha kaufela za Isilaele. 47Ba zuma baikuhumusi kaufela, mi musebezi wa bona wa konda. 48Ba amuha bahedeni ni malena Mulao, mi ba yawisa baezalibi maata a bona.
Taezo ni lifu la Matatiasi
49Mazazi a Matatiasi ha n'a s'a ya kwa ku fela, a bulelela bana ba hae, a li, “Muipo ni bumaswe cwale za ekezeha. Ki nako ya mifili-fili ni ya sitoyo se situna. 50Bana ba ka, ye ki yona nako ya kuli mu be ni ciseho ya ku buluka Mulao ni ku shwela bulikani bwa bo kukw'a luna.
51“Mu hupule likezo ze ne ezizwe
ki bo kukw'a luna,
yo muñwi ni yo muñwi ka nako ya hae,
mi mu ta ipumanela likute le lituna
ni butumo bo bu sa feli.
52 #
Sim 15.16; 22.15-18 Kana Abrahama n'a si ka likwa
mi a fumanwa a li ya sepahala?
Kana kezo yeo n'e sa bonisi kuli
u lukile?
53 #
Sim 39.1—45.28
Ni yena Josefa ka nako ya hae
ya manyando a buluka Mulao,
mi kabakaleo a ba mulena wa Egepita.
54Finehasi, yena ndat'a luna,
kabakala ciseho ya hae a fiwa bulikani
bwa buprisita kuya kuile.
55 #
Lipa 13.1—14.12
Ni yena Joshua, ka ku eza hande
musebezi wa hae,
a ba muatuli wa sicaba sa Isilaele.
56Kalebu ni yena, kabakala bupaki
bwa hae mwa kopano ya sicaba,
a amuhela sanda mwa naha.
57 #
2 Sam 7.16
Davida, ka pilu ya hae ye tezi maoyo,
a yola situlo sa mubuso o sa feli.
58 #
2 Male 2.9-12 Ni yena Elia, kabakala ciseho
ya Mulao,
a iswa kwa lihalimu luli.
59 #
Dan 3.8-30
Hanania, Azaria, ni Mishaele,
kabakala ku sepahala kwa bona,
ba piliswa kwa malimi a mulilo
a buhali.
60 #
Dan 6.1-24; Dt. Dan 14.31-42 Daniele ni yena,
kabakala ku ba ni pilu i liñwi,
a lamulelwa kwa meeno a tau.
61Kamukwaocwalo mu nahane kuli,
mwa masika ni masika,
ba ba sepa Mulimu kaufela
ha ba na ku felelwa ki sepo.
62Mu si ke mwa saba mifumbo ya mutu
ya maswe,
kakuli maata a hae a ta bola,
a fetuhe libunda la buloko ni mabuku.
63A ka na a itundumuna kacenu,
kamuso h'a sa na maemo,
kakuli s'a kutezi mwa liluli
mw'a n'a zwa,
mi milelo ya hae kamukana i felile.
64Cwalehe, bana ba ka, mu be banna,
mi mu tiye lipilu mwa ku mamela Mulao,
kakuli kezo ye cwalo
i ta mi fumanisa likute.
65Ki yo muhulwan'a mina Simoni.
Na ziba kuli
ki munna ya na ni ngana.
Mu mu utwe mwa bupilo bwa mina kaufela.
A be yena ya nga sibaka
sa ndat'a mina.
66Judeasi Makabaeusi, munna ya bundume
ni maata ku zwa kwa bunca bwa hae,
a be yena muzamaisi wa mpi ya mina,
mi a zamaise ndwa
ya ku lwanisa bahedeni.
67Haili mina kaufela mu ta ñola batu
kamukana
ba ba buluka Mulao mwa makolo a mina,
ni ku kutiseza lila bumaswe
bo ba ezize ku bahabo mina.
68Mu kutiseze bahedeni bumaswe
ka ku tala,
mi mu tiise ku buluka Mulao.”
69Cwale a ba fuyaula, mi a timela. 70A shwa ka silimo sa mwanda ka mashumi a mane ni ze silezi, mi a bulukwa mwa libita la bo kukw'a hae kwa Modeini. A siliswa ki sicaba sa Isilaele kaufela ka sililo se situna.
Currently Selected:
Buka ya Pili ya Makabaeusi 2: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.