Nehemías 2
2
Nehemías ta bai Herusalèm (445 aña promé ku Kristu)
1Riba un dia den luna di Nisan di e mes aña ei#2:1 Riba…ei: esei ta kuater luna despues di loke Nehemías ta relatá den kap. 1. rei Artaxèrxès tabata kome i mi a sirbié biña; el a ripará ku mi kara tabata tristu i komo nunka esei no tabata e kaso den su presensia 2el a puntra mi: ‘Di kon bo kara ta tristu asina? Bo no ta malu, mester tin algu ta preokupá bo.’ Mi a hiba un sustu na e momento ei 3i bisa rei: ‘Biba rei pa semper! Kon mi kara por laga di ta tristu? Nan a destruí e siudat kaminda mi antepasadonan ta derá i kandela a kaba ku su portanan.’#2 Reinan 25:8-10; 2 Krónikanan 36:19; Yeremías 52:12-14 4‘Kiko mi por hasi pa bo?’ rei a puntra mi. Mi a pidi Dios di shelu yuda mi 5i mi a kontestá: ‘Si su mahestat no tin nada kontra i si su mahestat ke mi bon, laga mi bai Huda pa mi rekonstruí e siudat kaminda mi antepasadonan ta derá.’ 6Rei ku tabatin su esposa sintá banda di dje, a puntra mi: ‘Kuantu tempu e biahe lo dura i ki tempu bo ta bini bèk?’ Asina ta ku el a duna mi pèrmit pa bai. Mi a bis'é ki tempu mi a pensa di bini bèk. 7Mi a bis'é: ‘Si su mahestat ke mi bon, por fabor, duna mi karta pa e kansiernan parti wèst di riu Eufrat, pa nan laga mi pasa sin problema bai Huda. 8Su mahestat por duna mi un karta tambe pa Asaf ku ta enkargá ku maneho di e boskenan di reino, pa e entregá mi palu pa e portanan di e fòrti ku ta pertenesé na tèmpel, pa e murayanan di siudat i pa e kas ku mi ta bai keda aden?’ Rei a duna mi tur kos, danki na SEÑOR. 9Mi a yega serka e kansiernan parti wèst di riu Eufrat i mi a entregá nan e kartanan di rei. Tambe rei a laga ofisialnan di ehérsito i sòldánan di kabayeria bai ku mi.
10Pero ora Sanbalat di Bet-Horon i e funshonario amonita Tobias a tende esaki, nan a rabia mashá, pasobra a bini un hende ku ker a traha na bienestar di e israelitanan.
E promé trabou di Nehemías na Herusalèm
11Ora mi a yega Herusalèm mi a sosegá tres dia 12sin bisa ningun hende loke Dios a pone den mi kurason pa hasi pa Herusalèm. Despues mi a sali den anochi huntu ku algun hòmber. E úniko bestia ku mi tabatin huntu ku mi tabata esun ku mi tabata kore riba dje. 13Asina ta ku e anochi ei mi a pasa pa Porta di Vaye bai den direkshon di Bròn di Dragon i Porta di Kima Sushi, pa inspektá muraya di Herusalèm, ku tabata bashá abou, i e portanan di siudat, ku kandela a destruí. 14Mi a sigui bai te na Porta di Bròn i Dam di Rei, pero aya mi buriku no por a pasa mas. 15P'esei mi a pasa e anochi ei den e vaye bai ariba pa inspektá e muraya. Despues mi a pasa pa Porta di Vaye bini bèk.
16E lidernan no tabata sa unda mi a bai ni kiko mi a hasi. Te na e momento ei mi no a pone e hudiunan na altura, ni sikiera e saserdotenan, e gobernantenan i e otro funshonarionan ku tabatin di aber ku e trabou. 17Awor sí mi a bisa nan: ‘Boso mes por weta ku nos ta den un situashon deplorabel. Muraya di Herusalèm ta bashá abou i su portanan ta destruí pa kandela. P'esei mi ta proponé pa nos rekonstruí e muraya di siudat, pa nan no sigui hasi chèrchè di nos.’ 18Ora mi a bisa nan ku SEÑOR tabata ku mi i a konta nan loke rei a bisa mi, nan a kontestá: ‘Awèl, laga nos kuminsá ku rekonstrukshon.’ I ku ánimo nan a prepará pa kuminsá ku e bon trabou.
19Pero ora Sanbalat di Bet-Horon, e funshonario amonita Tobias i e arabir Guèshèm a haña sa esei, nan a hasi chèrchè di nos i ku despresio nan a bisa nos: ‘Kiko boso ta hasiendo ei? Akaso ta rebeldiá boso ke rebeldiá kontra rei?’ 20Pero mi a laga nan sa: ‘Dios di shelu mes lo yuda nos, p'esei nos lo logra. Nos ta su sirbidó, nos ta prepará pa kuminsá ku e rekonstrukshon. Pero na Herusalèm boso no tin ningun propiedat ni outoridat, aworó tur hende aki a lubidá boso.’
Currently Selected:
Nehemías 2: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013