3 Huan 1
1
Saludo
1Di parti di e ansiano na kerido Gaius,#Echonan 19:29; Romanonan 16:23; 1 Korintionan 1:14 ku mi ta stima di bèrdè.
2Kerido ruman, mi ta resa pa kos bai bon ku bo den tur sentido, pa bo por ta bon di salú, meskos ku bo bida spiritual ta salú. 3Pasobra mi a keda mashá kontentu, ora algun ruman a bin konta mi di bo dedikashon na e bèrdat; sí, ta bo kustumber di biba konforme bèrdat.#2 Huan 4 4Nada no ta hasi mi mas kontentu ku tende ku mi yunan ta biba konforme bèrdat.
Elogio pa Gaius
5Kerido ruman, bo ta aktua korektamente den loke bo ta hasi pa bo rumannan, asta ora nan ta strañero. 6Nan a konta e rumannan akí di bo amor. Por fabor, yuda nan ku loke nan mester pa sigui nan biahe na un manera ku ta agradá Dios. 7Pasobra nan ta di biahe pa proklamá nòmber di Kristu, i nan no a aseptá niun yudansa di e no kreyentenan. 8P'esei nos tin ku sostené hende asina, pa di e manera ei nos kolaborá ku trabou di proklamá e bèrdat.
Diotrefe i Demetrio
9Mi a skibi e rumannan, ma Diotrefe ku gusta manda, no ta rekonosé nos outoridat. 10P'esei ora mi bini, lo mi trese e asuntu akí dilanti. E ta kana hasi redu riba nos i kalumniá nos, i komo si fuera esei no ta basta, e ta nenga e rumannan ku bini hospitalidat. Anto e ta stroba esnan ku sí ke risibí e rumannan i ta saka nan for di komunidat di kreyente!
11Kerido ruman, no sigui mal ehèmpel, sino sigui loke ta bon. Esun ku hasi bon ta pertenesé na Dios; esun ku hasi malu no a mira Dios nunka.#1 Huan 2:29; 3:6,9-10 12Tur hende ta papia bon di Demetrio. Su bida di akuerdo ku e bèrdat ta konfirmá esei. Nos tambe ta testiguá na su fabor i bo sa ku nos testimonio ta bèrdat.
Saludo final
13Mi tin hopi kos mas di bisa bo, ma mi no ke hasié por eskrito. 14Mi ta spera di mira bo pronto i nos lo papia personalmente.#2 Huan 12 15Pas sea ku bo. E amigunan di aki banda ta manda kumindamentu. Kumindá tur nos amigunan personalmente pa nos.
Currently Selected:
3 Huan 1: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013