1 Korintionan 1
1
Saludo
1Esaki ta karta di Pablo, ku Dios a disidí di yama pa ta apòstel di Kristu-Hesus, i di nos ruman Sostenes 2na e iglesia di Dios na Korinte,#Echonan 18:1 na tur esnan yamá pa ta Dios su pueblo santu, na esnan ku ta pertenesé n'E den union ku Kristu-Hesus. E karta akí ta dirigí tambe na tur esnan ku tur kaminda ta invoká nòmber di nos Señor Hesu-Kristu, ku ta nan Señor i nos Señor.
3Dios, nos Tata, i Señor Hesu-Kristu duna boso grasia i pas.
Bendishon pa medio di Kristu
4Semper mi ta yama Dios danki pa e grasia ku El a duna boso pa medio di Kristu-Hesus. 5Pasobra pa medio di djE Dios a hasi boso riku den tur sentido, tantu ku don di palabra komo ku don di konosementu, 6di manera ku e mensahe tokante Kristu a keda fuertemente establesé den boso bida. 7Miéntras ku boso ta warda ansiosamente riba e momento ku nos Señor Hesu-Kristu aparesé, boso no falta niun don spiritual. 8Lo E laga boso keda firme pará te na final, ya asina boso por ta liber di tur reproche riba e dia ku nos Señor Hesu-Kristu bini bèk. 9Dios ta fiel, E ku a yama boso pa biba den komunion ku su Yu, nos Señor Hesu-Kristu.
Divishon den iglesia di Korinte
10Den nòmber di nos Señor Hesu-Kristu, rumannan, mi ta apelá na boso, pa boso ta di akuerdo ku otro. No pèrmití divishon entre boso, ma sea kompletamente ún di mente, di mesun konvikshon. 11Pasobra Kloe su hendenan a informá mi ku boso ta pleita ku otro. 12Loke mi ke men ta lo siguiente: tin algun di boso ta bisa: ‘Ami ta di Pablo!’, otro ta bisa: ‘Ami di Apolo!’,#Echonan 18:24 algun otro: ‘Ami ta di Kefas!’ i otronan ta bisa: ‘Ami ta di Kristu!’ 13Ke men a parti Kristu na pida pida anto? Ta Pablo a muri pa boso na krus? Ta den nòmber di Pablo a batisá boso? 14Mi ta yama Dios danki ku ta Krispo#Echonan 18:8 i Gaius#Echonan 19:29; Romanonan 16:23 so mi a batisá. 15Ke men niun hende no por bisa ku boso a risibí boutismo den mi nòmber! 16Sí, mi a batisá Stefanas#1 Korintionan 16:15 i su hendenan di kas tambe, ma mi no ta kòrda ku mi a batisá niun otro hende mas! 17Pasobra Kristu no a manda mi pa mi batisá hende, ma pa prediká e bon notisia, sin usa sabiduria humano ku su papiá bunita, pa Kristu su morto riba krus no pèrdè poder.
Kristu ta e poder i sabiduria di Dios
18Pasobra e mensahe tokante Kristu su morto na krus ta kos di loko pa esnan ku ta bai pèrdí, ma pa nos ku ta keda salbá, e ta poder di Dios!#Romanonan 1:16 19Skritura ta bisa ku Dios a bisa:
‘Lo mi kaba ku sabiduria di e sabionan
i pone inteligensia di e inteligentenan un banda.’#Isaías 29:14
20Awor unda e sabio, e dòktor di lei#Job 12:17; Isaías 19:12; 33:18 òf e filósofo di e mundu akí a keda? Akaso Dios no a mustra ku sabiduria di e mundu akí ta lokura?#Isaías 44:25
21Sí, Dios den su sabiduria a disponé ku hende no ta siña konosé Dios pa medio di sabiduria humano.#Sabiduria 13:1-9 P'esei El a disidí di usa nos mensahe, ku hende ta haña ta kos di loko, pa salba esnan ku ta kere. 22E hudiunan ke mira señal milagroso, e griegonan ta kore tras di sabiduria, 23ma nos ta prediká e Mesias krusifiká. Pa e hudiunan esei ta un mensahe ofensivo, pa esnan no hudiu e ta kos di loko. 24Ma pa esnan ku Dios a yama, sea hudiu òf no hudiu, e Mesias ei ta poder i sabiduria di Dios! 25Pasobra loke ta parse lokura di Dios, ta mas sabí ku sabiduria di hende. Loke ta parse debilidat di Dios, ta mas fuerte ku forsa di hende.
26Rumannan, kòrda ken boso tabata dia Dios a yama boso. For di punto di bista humano poko di boso tabata sabí, poderoso òf di bon famia. 27Ma Dios a skohe loke mundu ta konsiderá lokura pa bergonsá e sabionan. El a skohe loke mundu ta konsiderá di ta débil pa bergonsá esnan poderoso. 28El a skohe loke mundu ta konsiderá inferior i ta menospresiá. Sí, el a skohe loke no ta nada pa kaba ku loke ta importante. 29Ke men, niun hende no por broma dilanti di Dios. 30Pero pa medio di Dios boso ta den Kristu, kende a bira nos sabiduria, nos hustisia, santidat i liberashon. 31P'esei anto, manera Skritura ta bisa: ‘Laga esun ku ke broma, broma ku Señor!’#Yeremías 9:23-24
Currently Selected:
1 Korintionan 1: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013