1 Korintionan 2
2
Mensahe tokante Kristu
1Ora ami a bini serka boso, mi rumannan, pa prediká Dios su plan skondí,#2:1 Dios…skondí; tin manuskrito ku e siguiente variante: e testimonio tokante Dios mi no a bini ku palabra grandi ni ku muestra di sabiduria. 2Pasobra ora mi tabata serka boso, mi a disidí di no fiha riba nada otro ku no ta riba Hesu-Kristu, anto spesialmente riba djE komo Esun ku a keda krusifiká. 3Ora mi a bini serka boso, mi tabata suak, ku hopi ansha i miedu.#Echonan 18:9 4Ora mi a papia ku boso i prediká e bon notisia, mi no a usa palabra di sabiduria pa konvensé boso, ma mi palabranan a demostrá poder di Spiritu Santu. 5Ya asina boso fe no ta basá riba sabiduria di hende, ma riba poder di Dios.
Sabiduria di Dios
6Ma loke nos ta proklamá na esnan ku ta spiritualmente madurá tambe ta sabiduria. No ta sabiduria di e mundu akí ni di e podernan ku ta dominá e mundu akí, e podernan ku ta pèrdiendo nan poder. 7Ma nos ta proklamá Dios su sabiduria skondí: promé ku mundu a kuminsá El a traha e plan pa nos tuma parti na su gloria, pero e plan ei a keda skondí. 8Niun di e podernan ku ta dominá e mundu akí no tabatin konosementu di e plan ei. Si nan tabata konos'é, nan lo no a krusifiká nos Señor di gloria. 9Pero, manera Skritura ta bisa:
‘Loke niun hende no a yega di mira,
ni niun hende no a yega di tende,
ni niun hende no por imaginá nan,
esei Dios a prepará pa esnan ku ta stim'É.’#Isaías 64:4
10Ma#2:10 Ma; algun manuskrito tin: Pasobra nos sí Dios a laga konosé su plan skondí pa medio di su Spiritu. Spiritu Santu ta skrudiñá tur kos, asta e pensamentunan di Dios ku ta profundamente skondí. 11Den kaso di hende ta solamente hende su mes spiritu sa tur kos di dje; meskos tambe, ta solamente Spiritu di Dios sa tur kos di Dios. 12Awor nos no a risibí e spiritu di e mundu akí, ma nos a risibí e Spiritu Santu ku ta bini di Dios. Asina nos por sa loke Dios, den su grasia, a duna nos.#Sabiduria 9:17 13Ke men, nos ta papia di e kosnan ei ku palabra ku nos a siña di Spiritu di Dios i no ku palabra ku nos a siña di sabiduria di hende. Asina nos ta splika loke ta spiritual ku palabra spiritual. 14Esun ku no tin Spiritu Santu no ta aseptá loke ta bini di Spiritu di Dios. P'é nan ta kos di loko; e no por komprondé nan, pasobra hende por husga balor di e kosnan ei solamente ku yudansa di Spiritu Santu. 15Es ku tin Spiritu Santu, por husga balor di tur kos, ma niun hende no por husga E! 16Pasobra, manera Skritura ta bisa:
‘Ken a yega di sondia mente di Señor,
ken komo konsehero por siñ'É algu?’#Isaías 40:13; Sirag 42:21; Sabiduria 9:13; Romanonan 11:34
Ma nos ta pensa manera Kristu ta pensa!
Currently Selected:
1 Korintionan 2: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013