1 Samuel 31
31
Saul i su yu hòmbernan ta muri den guera
(1 Krónikanan 10:1-12)
1Entretantu e filisteonan tabata bringa kontra Israel i e israelitanan a hui pa nan. Hopi di nan a muri riba seru Guilboa. 2E filisteonan a logra penetrá yega serka Saul i a mata su yu hòmbernan Yonatan, Abinadab i Malki-Shua. 3Despues nan a konsentrá tur nan atake riba Saul. E tiradónan di flecha a deskubrié. Ora Saul a mira nan, el a haña mashá miedu. 4P'esei el a bisa su ayudante: ‘Saka bo spada i hinka mi mata, pa e paganonan ei no bin hinka mi mata i hasi bofon di mi.’ Pero su ayudante no ker a hasié, pasobra e tabatin mashá miedu. E ora ei Saul a kohe su mes spada i a benta su kurpa riba dje. 5Ora e ayudante a mira ku Saul a muri, e tambe a benta su kurpa riba su spada i a muri huntu kuné. 6Riba e mesun dia ei a muri: Saul, su tres yu hòmbernan, su ayudante i tur su sòldánan. 7Ora e israelitanan ku tabata biba na otro banda di e vaye i na e otro banda di Yordan a ripará ku e trupanan di Israel a hui i ku Saul i su yu hòmbernan a muri, nan a sali for di e siudatnan i nan tambe a hui. Despues e filisteonan a yega na e siudatnan ei i nan a keda biba ei.
8Su manisé, ora e filisteonan a bai sakia e mortonan, nan a haña Saul i su yu hòmbernan morto den seru di Guilboa. 9Nan a kap kabes di Saul kita afó i kita su armanan for di dje. Nan a manda mensahero pasa den henter teritorio filisteo pa konta e bon notisia den e tèmpelnan di nan diosnan falsu i na e pueblo. 10Nan a pone Saul su armanan den tèmpel di Astarte i nan a kologá su kurpa na muraya di Bet-Shean.
11Ora e habitantenan di Yabèsh di Guilead a haña sa kiko e filisteonan a hasi ku Saul, 12tur e hòmbernan ku tabata sa kon usa arma a sali bai huntu. Despues di a kana henter anochi nan a kita e kurpanan di Saul i su yu hòmbernan for di muraya di Bet-Shean i nan a bai bèk Yabèsh, kaminda nan a kima e mortonan. 13Nan a dera restunan di Saul i su yu hòmbernan bou di e palu di tamarisko na Yabèsh. Despues nan a yuna shete dia largu.
Currently Selected:
1 Samuel 31: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013