Sirag 2
2
Sea prepará pa prueba
1Mi yu, si bo ke pone bo mes den sirbishi di Dios,
prepará pa pasa den prueba.#Hakobo 1:2-4,12; 1 Pedro 1:6-7; 4:12
2Sea sinsero di kurason. Soportá tur kos ku pasenshi,
i keda trankil ora difikultat presentá.
3Tene duru na Señor, no bandon'É,
e ora ei un dia lo bo ta alsá.
4Aseptá tur loke pasa ku bo,
i tene pasenshi ora bida trese sufrimentu pa bo.
5Pasobra tribulashon ta purifiká esnan ku Dios ta stima,
manera ta purifiká oro den kandela.#Proverbionan 17:3; 27:21; Sabiduria 3:5-6; 1 Pedro 1:7
6Konfia den Señor, E lo kuida bo.
Sigui den kaminda rekto i spera den Dios.#Salmo 37:3-5; Proverbionan 2:6; 3:5-6
Sigui ehèmpel di boso antepasadonan
7Boso ku ta respetá Señor, konta ku su mizerikòrdia,
no kita fo'i kaminda pa boso no kai.
8Boso ku ta respetá Señor, konfia den djE,
boso rekompensa ta sigur.
9Boso ku ta respetá Señor por spera su fabornan,
su mizerikòrdia i felisidat eterno.
10Kòrda loke a pasa e generashonnan antiguo!
Ken a konfia den Señor i keda bergonsá?
Ken a spera den djE i keda bandoná?
Ken a invok'É i Señor no a skuch'é?
11Pasobra Señor ta klemente i yen di mizerikòrdia.#Salmonan 103:8; 145:8; Hakobo 5:11
E ta pordoná piká i trese salbashon ora di angustia.
Kumpli ku lei gustosamente
12Ai di e kurasonnan kobarde i esnan sin wesu di lomba,
pekadónan ku ke biba dos bida!
13Ai di e kurasonnan débil ku no tin konfiansa!
Dios lo no protegé nan.
14Ai di esnan ku no ta perseverá!
Kiko nan lo hasi ora Señor pidi nan kuenta i rason?
15Esnan ku ta respetá Señor ta hasi loke E ordená;
esnan ku ta stim'É ta hasi loke E ke.
16Esnan ku ta respetá Señor ta trata
di hasi loke ta agrad'É;
esnan ku ta stim'É ta gusta kumpli ku su lei.#Sabiduria 6:18; Huan 14:15,21,23
17Esnan ku ta respetá Señor semper ta dispuesto
na baha kabes pa su poder, bisando:
18‘Mihó nos kai den man di Señor
ku kai den man di hende;
pasobra su mizerikòrdia ta igual na su grandesa.’#2 Samuel 24:14; 1 Krónikanan 21:13
Currently Selected:
Sirag 2: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013