Sôfônia 3
3
3. FAMELEZANA AN’I JEROSALEMA
Famelezana an’ireo mitondra ny firenena
1Mila loza ilay miodina sy voaloto#3,1 Mila loza ilay miodina sy voaloto: Dia ho an’i Jerosalema, tanàna anjakan’ny fanaovana angovy sy ny fampahoriana
dia ny tanàna fampahoriana!
2Tsy nisy feo nohenoiny akory, tsy nandray anatra izy,
tsy niankina tamin’i Iaveh,
tsy nanatona an’Andriamaniny.
3Ao aminy, ny mpanapaka, liona mierona#3,3 Ny mpanapaka, liona mierona: Ny mpanapaka izay natao iankinana, manjary mampatahotra noho ny tsy fahamarinany sy ny am-borivory ataony.;
ny mpitsarany amboadia hariva#3,3 Ny mpitsara, amboadia hariva: Manao mpitsara be kibo sady tsy mifidy olona hasiana.,
tsy mamela na inona na inona ho tra-maraina.
4Ny mpaminaniny vavàna#3,4 Ny mpaminany milaza izao antsanga tsy aman’orana rehetra izao, ka mamita-bahoaka. sady olona mamitaka;
ny mpisorony mandoto ny zava-masina
sy mandika ny lalàna.
5Marina i Iaveh eo afovoany,
tsy misy tsy rariny ny ataony;
mamoaka ny fitsaràny isa-maraina izy
mba hanome ny fahazavana,
ary tsy diso amin’izany izy na oviana na oviana;
fa ny olona tsy tia vavaka tsy mahalala henatra!
Fianarana avy amin’ny natao tamin’ireo hafa firenena
6Firenena maro no naringako#3,6 Firenena maro no naringako: Ny sazy nihatra tamin’ny firenena mpanompo sampy fahiny, dia anatra ho an’i Israely., ka rava ny tilikambony,
nataoko lao ny arabeny, ka tsy hisy mpandia intsony;
voarava ny tanànany ka tsy misy olona intsony,
tsy misy mponina na iray aza.
7Hoy aho: Hatahotra Ahy ahay ianao, handray ny anatra;
dia tsy ho rava ny fonenany,
araka izay rehetra notapahiko ny aminy.
Kanjo vao mainka nirotoroto izy ireo
hanimba ny asa rehetra ataony.
8Koa andrasonareo Aho, - teny marin’i Iaveh, -
amin’ny andro hitsanganako haka babo!
Satria izao no didiko, dia ny hanangonako ny firenena,
hamoriako ny fanjakana,
hanidinako ny fahatezerako amin’izy ireo,
dia ny firehetan’ny fahatezerako rehetra.
Fa ny afon’ny fahasaro-piaroko
no handevona ny tany rehetra.
4. FAMPANANTENANA
Ny hibebahan’ny tsy mpino
9Fa amin’izany ny firenena#3,9 Ny firenena: Ny Jentily sy ny Jody. homeko molotra madio
hiantsoan’izy rehetra ny Anaran’i Iaveh
sy hanompoany Azy amim-piraisan-kina.
10Avy any an-dafin’ny onin’i Etiôpia
ireo mpivavaka amiko, ireo naeliko, hitondra ny fanatitra ho Ahy.
Ireo sisa amin’i Israely: ambany ny osa
11Amin’izany andro izany#3,11 Amin’izany andro izany: Rehefa avy niely patrana tany amin’ny tany nanaovana sesitany azy i Israely, dia hikambana indray. tsy ho henatra ho anao intsony,
ny asanao rehetra izay nanotanao tamiko;
satria amin’izany hoesoriko hiala eo aminao
ireo izay nifaly tamim-pireharehana;
ary ianao tsy hiavonavona intsony
eo an-tendrombohitro masina.
12Havelako eo aminao#3,12 Havelako ho eo aminao: Hangonin’Andriamanitra ao Jerosalema ireo Israelita vitsivitsy izay tsy nivadika, tsotra sy manetry tena, fa tsy mba tahaka ireo izay voalaza ao amin’ny andininy eo aloha (ampitahao amin’i Iz 41,1; 1Kôr 1,26).
ny vahoaka ambany sy manetry tena anankiray
izay hatoky ny Anaran’i Iaveh.
13Ny sisa amin’i Israely dia tsy hanao ny tsy marina,
na hilaza lainga,
ary tsy hahitana eo am-bavany intsony
izay lela mandainga.
Fa hihinana sy handry feizay izy ireo,
ary tsy hisy olona hanaitaitra azy.
Salamo fifaliana ao Siôna
14Mihobia, ry zanaka vavin’i Siôna!
manaova feo firavoravoana, ry Israely!
Mifalia sy miraharahà amin’ny fonao rehetra,
ry zanaka vavin’i Jerosalema.
15Fa ny fitsarana nanameloka anao nesorin’i Iaveh,
ny fahavalonao nentiny mihodivitra anao.
I Iaveh, Mpanjakan’i Israely, no eo aminao,
ka tsy hahita loza intsony ianao.
16Amin’izany andro izany, izao no holazaina amin’i Jerosalema:
Aza matahotra, ry Siôna, ary aza miraviravy tanana!
17I Iaveh, Andriamanitrao no eo aminao, mpamonjy mahery!
Ary Izy haneho ny hafaliany lehibe noho ny aminao;
hangina Izy amin’ny fitiavany;
noho ny aminao dia hisebiseby amin’ny hobin-kafaliana.
Ny hiverenan’ireo niely
18Hovoriko ireo latsaka am-pahoriana,
tsy mahita fety lehibe hankalazaina;
satria isan’ny anao ireny, itambesaran’ny latsa.
19Amin’izany andro izany hofaranako
ny amin’ny momba an’ireo rehetra mpampahory anao:
Hovonjeko ikala mandringa#3,19 Ikala mandringa: Angamba ny taranak’i Jodà izany, izay nitady hampikambana ny fivavahan’ny Tompo amin’ny fivavahan’ny sampy, no lazaina eto.,
hangoniko ikala voaroaka#3,19 Ikala voaroaka: Angamba ny fianakavian’i Israely, izay nafoin’i Iaveh noho ny fivadihany (ampitahao amin’i Mik 4,6).,
ka hataoko be voninahitra sy malaza izy ireo,
any amin’ny tany rehetra nanakoràna azy.
20Amin’izany andro izany, hampodiko ianareo;
ary amin’ny andro hanangonako anareo,
hataoko malaza sy be voninahitra ianareo,
any amin’ny firenena rehetra eto an-tany,
rehefa hatsahatro ny fahababoanareo,
eo imasonareo, hoy i Iaveh.
Currently Selected:
Sôfônia 3: MBC
Highlight
Share
Copy
Want to have your highlights saved across all your devices? Sign up or sign in
Baiboly Katolika © La Société Biblique Malgache, 2003.