Filemon 1
1
Wak sanna
1A mbi Bulus, bage daŋgay ge Kris Jeso ne, poseya ne ná vya Timotawus, i njaŋge maktub hon i ná vya ge laar wanna, ne i kon ge temel Filemon ne, 2ne Afiya, i ná vya ge gwale, ne Arkibbus, i kon ge mbal pore, ne ɓase ge Dok ne ma ge ne kote ne mo diŋ me. 3Kwa a̰se ma ne katɗa halas ge Dok ge nee Bá ne, ne ge Bageyal Jeso Kris ne nama ka poseya ne aŋ.
Laar wanna ma ne hon fareba ge Filemon ne
4Mbi gwan ne gugu hon Dok ge mbi ne ɗaɗak swaga ge mbi ne dwat ne mo kaɗeya ge mbi ne ma zi go. 5Ago mbi za̰ fare ge laar wanna ge mo ne, ne hon fareba ge mo ne Bageyal Jeso ta, ne naa ge mbegeya ma ta pet ya go. 6Ba̰a̰n hon fareba zi ge mo ne na há pool ge kwarra ge kaŋ ge kwaɗa ge daage zi pet ge i ne na ge Kris zi. 7Mbi da ne laar saal gḛ, ne laar iyalla, ne laar wanna ge mo ne pe. Ago mo iya naa ge mbegeya ma dulwak.
Kaɗeya ge Bulus ne Filemon ta ne Onesimus pe
8Ne pe no ɗe, ne jo̰ Kris zi mbi da ne viya̰ ge hon mo wak ge ke kaŋ ge mo ne mbya kerra ma puy ɗe, 9mbi ɓyare kaɗe mo ge laar wanna zi. Mbi Bulus, mbi ge sabar, se no ndu ge daŋgay ne Kris Jeso pe, 10mbi kaɗe mo da ne mbi vya ge mbi ne tó na zul zi pe, ndwara go Onesimus, 11na ge dana zaŋgal ne ka ndu ge be mbar mo to, amma se no, saŋge ya ndu ge mbarra ne mo pe, ne mbi pe me. 12Mbi teme mo na ya, na ge a mbi sḛ duur ne. 13Mbi te ya koy na mbi ta, ne da pe na mba mbi mo byalam go ge zul ge mbi ne zi ne fare ge kwaɗa pe. 14Amma, be ge mo hon mo wak ne to, mbi ne pool ge ke a̰me ne mbi pala to, ne da pe, na kaage kwaɗa ge mo ne ke na, na ka dimma ne a ne e mo pool go to, amma na ka laar ɓyareya ge mo ne zi. 15Tamekyala, na varseya ge swak mbe no, a ndwara go, mo ɓo na ne ndwara ɗiŋnedin. 16Be dimma ne mo̰r go to, amma waɗe mo̰r waɗe, a dimma ne ná vya ge laar wanna go. Mbi laar wa̰ na gḛ ge be to, mo sḛ mo laar wan na ma̰ ndwara gyana ga ɗaa, duur zi, ne Bageyal zi me. 17Ne jo̰ mo ndil mbi go mbi mo kondore ne ɗe, ame na dimma ne mo te ya ame mbi ya go. 18Kadɗa na ke mo ya̰l a̰me ya go, ko kadɗa mo wul a̰me ya na pal, isi na mbi pal. 19A mbi Bulus, mbi njaŋge na ne mbi tok zi ne, mbi mbo pot mo na, a be go mbi dwat mo pala mbḛ to, mo da ne kaŋ ma ge pot mbi, a mo sḛ ne mo pala.
20Ná vya, e mbi ɓo mbarra mbe no ne mo ta Bageyal zi, iya mbi laar Kris zi. 21Da ne saareya ge pala gwanna se ge mo ne pe, mbi njaŋge mo maktub mbe no, ne kwarra go, mo mbo gwan ke waɗe fare ge mbi ne jya̰ mo na pal. 22Swaga mbe go no uwale, nṵsi mbi swaga fiya se ya, ago mbi da ne jobreya go, ne kaɗeya ge aŋ ne ma ta, mbi mbo ɓol zurra ge mbi ba det aŋ ta ya.
Wak sanna
23Epafras, mbi kon ge daŋgay Kris Jeso zi, sá̰ mo wak, 24ne Markus, ne Aristarkus, ne Demas, ne Luka, mbi kaam ge temel ma.
25Kwa a̰se ge Bageyal Jeso Kris ne na ka poseya ne mo o̰yom.
Currently Selected:
Filemon 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.