Ibriniya ma Fare pala hageya
Fare pala hageya
Maktub ge a ne njaŋge hon Ibriniya ma ndu wan bage ne njaŋge na pe to, ne suwal ge a ne njaŋge na hon nama na pe to, ko del ge a ne njaŋge na go pe to me. Amma swaga isi na go, nee kwa go bage ne njaŋge na kwa wak tuli ge zaŋgal kwaɗa, a ndu ge ne kwa hada ge Yahud ma ne ne.
Maktub mbe njaŋge hon naa ge hon Yahud ma, nama ge ne ho̰ fareba ma. A ka iigiya ma zi, hon ta ge nama ne gá iyalam, a ka ɓyare kan bama tok ne hon fareba ge bama ne go. A go no, njaŋge nama maktub mbe no ndwara hon nama pool, moɗege nama nama wa̰ ta Dok zi.
Na pe eya go, maktub mbe jan nee go Dok dya̰ tene ya nee ta da ne na vya Jeso Kris ta (1:1-3). Nee da ne pool varse maktub mbe se pe azi:
Ne 1:4—10:18 ŋgay nee go Jeso ga̰l waɗeya. Na sḛ ga̰l waɗe anabi ma ɗeŋgo to (1:1-3), amma a ga̰l waɗe maleka ma (1:4—2:18), waɗe Musa ma ne Juswa waɗe (3:1—4:13), waɗe kep tuwaleya ge ne wak tuli ge zaŋgal zi ma da ne ga̰l (4:14—7:28). Na tyareya ge ne tyare tene ndwara ɗu gijim tuwaleya ne nee pe waɗe tuwaleya ma gḛ ge a ne ka tyare nama wak tuli ge zaŋgal zi ma waɗe (8:1—10:18).
Ne 10:19—13:19, bage ne njaŋge maktub mbe no moɗege naa ge ne isi maktub mbe ma go nama wa̰ ta hon fareba zi (10:19-39), nama ndi hon fareba ge naa ge zaŋgal ma ne, ge ne e nama halla kaŋ ma zi pet, nama bole nama (Ibr 11). Go no me, nama ɗḭ nama ndwara Jeso pal, ko yál ma zi puy, nama wa̰ ta dimma ne Na sḛ ne wa̰ tene go (12:1-12). Uwale ne (12:13—13:19), hon nama moɗegeya ma pe hini hini ne katɗa ge nama ne Dok zi pe, ne katɗa ge nama ne ta ta pe me. A go no, ge (13:20-25), e nama wak busu no, san nama wak no me.
Maktub ge Ibriniya ne ŋgay nee viya̰ go, nee ga ya naa ge tuwaleya ge Dok ne ma, ne da pe nee da ne Kep tuwaleya ge ne hage nee viya̰ ge ndar ya Dok ta be vo (4:16, 7:19, 8:1, 10:21-22), ago nee sone ma gul ya go (9:26, 10:12), nee hal nee ndu ge ho̰l ya go (2:14), nee ga ya suli (2:15, 9:12). Ago ne se no, naa ge hon fareba ma zam kaŋ kwaɗa ge ne mbo mbo ya ma joo ya zam zo (6:4-5, 12:28). Ne se no, nee jobre swaga katɗa ge nee ne ge ne digi zi ya (13:14), ne gwanna ge ne Bage máya ne ya (9:28).
Nee ne Dok ma buwal ndar ja zi gwa ne hon fareba ge nee ne Kris Jeso zi ta, ago hon fareba e nee kwa kaŋ ge nee gale ne kwa na ne nee ndwara to ma (11:1). Yál ma zi puy, nee iigi ta to, nee ka̰ nee tok ne hon fareba ge nee ne go to me.
Currently Selected:
Ibriniya ma Fare pala hageya: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.