Dwage Eya 1
1
FARE JANNA GE ZḚ GE GE MUSA NE
(Dwa 1:1—4:44)
1No a fare ma ge Musa ne jya̰ Israyela vya ma ge maŋgaɗam Urdun le may ya, ge ful pul zi, babur Araba go, Suf ndwara go ŋga, ge Paran ma ne Tofel, ne Lavan, ne Haserot, ne Di-Zahab ma buwal zi ne. 2Ne njal Horeb go, ne viya̰ ge njal Seyir ne, ɗiŋ det Kades-Barneya ya, naa ke dam wol para ɗu swaga mborra go. 3Dam ge zḛ ge ge saba wol para ɗu ne go, del wara anda go̰r go, swaga ge Israyela vya ma ne ɗage ne Suwal Masar ya go, Musa jan Israyela vya ma fare ma pet ge Bage ɗiŋnedin ne ho̰ na wak go na jya̰ nama na. 4Jya̰ nama fare mbe ma go̰r swaga ge a ne há Sihon gan ge Amoriya ma ne, ge ne ká suwal Hechbon go, ma ne Og gan ge Basan ne, ge ne ká Achetarot ma ne Edrey go. 5Ge maŋgaɗam Urdun le may ya, Mowab ma suwal go, Musa e pe wan nama eya mbe pe.
Bage ɗiŋnedin ho̰ Israyela vya ma wak nama mbo zḛ
6Bage ɗiŋnedin Dok ge nee ne, jya̰ nee fare ge njal Horeb go go: «Aŋ katɗa njal mbe no pe go kaal. 7Ɗage me digi, mbo me ge njal ge Amoriya ma ne ya, ge suwal ge ne nama ziyar go ma go pet, ɗiŋ mbo babur pul ge ne maŋgaɗam wak ya, mbo le Negev ya, ɗiŋ maŋgaɗam ga̰l yuwam wak ya, suwal ge Kanan ma ne go, ge suwal Liban go, ɗiŋ mbo maŋgaɗam ga̰l Efrat wak ya. 8Ndi me gale, mbi hon aŋ suwal mbe no. Mbo me, mbo ame me suwal ge Bage ɗiŋnedin ne guni tene go na mbo hon aŋ bá Abraham, ne Isaku, ne Yakub ma ne nama vya ma na.»
Musa é naa ga̰l ge nṵsi fare ma
9Dam mbe ma go, mbi jya̰ aŋ dḛ go, mbi ne pool ge day in aŋ hini to. 10Bage ɗiŋnedin, Dok ge aŋ ne zuli aŋ ya se ceɗed. Ma̰ no aŋ zuli ya se dimma ne guwa̰r ma ne pḭr digi go. 11Mbi kaɗe Bage ɗiŋnedin, Dok ge aŋ bá ma ne, na gwan zuli aŋ se ta ceɗed, na e wak busu aŋ pal dimma ne na ne ke aŋ wak tuli go. 12Mbi sḛ hini ɗu, mbi ke ma̰ gyana, mbi ba day nṵsi aŋ fare ma ne wan aŋ gool ma me ɗaa? 13Aŋ tá me naa ge zwama ma, ne naa ge ɗalla ma, ne naa ge mbyatɗa tap ma ne aŋ pehir ma zi ya, mbi ba e nama aŋ ndwara zḛ. 14Swaga mbe go, aŋ jya̰ mbi dḛ go: «Mo fare ge mo ne jya̰ i mbe kwaɗa, mbya kerra.» 15A go mbe no, mbi he ga̰l ge aŋ pehir ma ne, naa ge zwama ma, ne naa ge mbyatɗa tap ma, mbi e nama aŋ ndwara zḛ no. Ga̰l ge naa dubu ma ne, ne ge kis ma ne, ne ge wara anuwa̰y ma ne, ne ge wol ma ne, mbi e nama no ne ndil temel ge aŋ pehir ma ne ma pe. 16Dam mbe go mbi ho̰ aŋ naa ge kun sarya ma wak go: «Za̰ me kaŋgeya ge aŋ ná vya ma ne ma kwaɗa, kṵ me nama fare ma buwal dosol zi, ko aŋ ná vya ma ta buwal zi, ko ne vya-gwasal ma ta. 17Kṵ me sarya be vareya, aŋ za̰ me fare ge ndu jyale ne, ko ge ndu ga̰l ne mbyatɗa ca, sya me ndu a̰me vo to. Ago, sarya kunna ge dosol a ge Dok ne ne. Kadɗa aŋ ɓol fare ge haŋle ya, aŋ mbo me ne fare mbe ya mbi ndwara se, mbi ba za̰ na.» 18Swaga mbe go dḛ, mbi ho̰ aŋ wak fare mbe ma pal, ne da pe, aŋ gá ke nama mbe go no tetem.
Wak kuriya ge Israyela vya ma ne Kades-Barneya go
19Swaga mbe go, nee ɗage me ne njal Horeb go, nee he me viya̰ pul ge mbo njal ge Amoriya ma ne ya no dimma ne Bage ɗiŋnedin, Dok ge nee ne, ne ho̰ nee wak go no, nee kale me ful pul ge ɓaŋlaŋ ge ne ke naa vo gḛ le may ya no, aŋ sḛ ma kwa na da ne aŋ ndwara, nee dé me ya Kades-Barneya go no. 20Mbi jya̰ aŋ no go: «Se no, aŋ det ja njal ge Amoriya ma ne go, na ge Bage ɗiŋnedin, Dok ge nee ne, ne ho̰ nee na go. 21Ndi me gale, Bage ɗiŋnedin, Dok ge aŋ ne, hon aŋ suwal mbe ge ne aŋ ndwara zḛ mbe no ya go. Mbo me, ame me na dimma ne Bage ɗiŋnedin, Dok ge aŋ bá ma ne ne jya̰ aŋ go. Wa̰ me aŋ dulwak, sya me vo to.» 22Swaga mbe go no, aŋ pet aŋ mbo ya mbi ta, aŋ jya̰ mbi no go: «Teme me nee naa a̰me ma nama mbo ndil suwal mbe, ne da pe, nama mbo ndil viya̰ ge nee ba mbo he nama, ne suwal ga̰l ge ne ba mbo wat diŋ ma me.» 23Fare mbe ke mbi sḛ tuli no, mbi tá naa no wol para azi ne aŋ buwal zi, ne pehir ge daage zi ndu ɗu ɗu. 24Naa mbe ma ɗage no, a he viya̰ le ge njal go no, a mbo no ɗiŋ baal pul ge Echekol ne ya, a ndi swaga ya no. 25A yé uwara tolla ma ge suwal mbe ne ya bama tok go, mbo ya ŋgay nee no, a jya̰ nee no go: «Suwal ge Bage ɗiŋnedin, Dok ge nee ne, ne hon nee na mbe a suwal ge kwaɗa ne.» 26Amma aŋ be ɓyare mbo suwal mbe ya to, aŋ kuri Bage ɗiŋnedin, Dok ge aŋ ne wak no. 27Aŋ ka sun ta aŋ gúr ma zi no, aŋ ka janna no go: «Bage ɗiŋnedin kwane i kwane, abe i ne suwal Masar diŋ ya zum no, ne da pe na ho̰ i Amoriya ma tok go, nama ba̰ i uzi. 28I gwan mbo le da ya ɗaa? I ná vya ma iyal i sḛ ya tiliŋ, a jya̰ i go: ‹Naa mbe ma a naa ge don ga̰l gerndeŋ ma ne, a ɓase waɗe i, nama suwal ma a suwal ga̰l ma ne, nama gulum ga̰l ma mbo dok pul kuɗi digi, i kwa Anak vya ma suwal mbe go me›.»
29Swaga mbe go no, mbi jya̰ aŋ go: «Iigi me ta to, sya me naa mbe ma vo to. 30Bage ɗiŋnedin, Dok ge aŋ ne, ge ne mbo ne aŋ ndwara zḛ, na sḛ mbo mbal pore ne aŋ pe ne, dimma ne na sḛ dḛ ne ke kaŋ ma aŋ ndwara go, suwal Masar diŋ go. 31Uwale, ge ful pul zi aŋ kwa Bage ɗiŋnedin, Dok ge aŋ ne koy aŋ dimma ne ndu ne koy na vya go, ge viya̰ ge aŋ ne ka mborra ma go pet, ɗiŋ det ya swaga mbe no go go.» 32Go no puy ɗe, aŋ be hon fareba Bage ɗiŋnedin, Dok ge aŋ ne ta to bat. 33A na sḛ ka mbo aŋ ndwara zḛ ndwara ɓyare aŋ swaga katɗa ne. Ɗaal zi, ka ɗame aŋ ne ol, ndwara go aŋ ba kwa viya̰ ge mborra, gyala me, ne pḭr lurra aŋ pal go.
34Swaga ge Bage ɗiŋnedin ne za̰ aŋ fare janna ma, na laar ho no, guni tene, jya̰ no go: 35«Ndu a̰me ne doŋ pe ge sone mbe no zi, mbo mbo kwar suwal ge siŋli ge mbi ne ke wak tuli hon aŋ bá ma na to bat. 36A Kaleb ge Yefunne vya ɗeŋgo mbo kwar suwal mbe ne. Mbi mbo hon nama ne na vya ma swaga ge na sḛ ne á̰ go ma pet, ne da pe, koy mbi fare ne dulwak ɗu.» 37Bage ɗiŋnedin ho na laar mbi pal ne aŋ pe me, jya̰ no go: «Mo me, mo mbo wat suwal mbe diŋ ya to. 38Juswa ge Nun vya, ge mo goopol, mbo mbo suwal mbe ya ne. Sirsi na, ago a na sḛ mbo e Israyela vya ma ame suwal mbe dḛ ne. 39Aŋ vya ge jabso ma ge aŋ ne jya̰ go nama ga kaŋ paal ma, aŋ vya ma ge ma̰ no, a ne kwa kwaɗa ma ne sone buwal varseya to ma, a mbo mbo suwal mbe ya ne. Mbi mbo hon nama suwal mbe dḛ, a nama sḛ ma mbo kat suwal mbe go dḛ ne. 40Amma aŋ ɗe, gwa̰ me mbo ful pul zi, he me viya̰ mbo maŋgaɗam ga̰l yuwam ge teer wak ya.»
41Swaga mbe go, aŋ gwa̰ ne mbi janna go: «I ke sone Bage ɗiŋnedin ndwara se, i mbo mbo mbal pore dimma ne Bage ɗiŋnedin Dok ge i ne, ne ho̰ na wak go.» Swaga ge ndu ge daage ne nṵsi tene ne na kaŋ pore ma, aŋ dwa go, aŋ mbo ame njal mbe avun bàŋ go hayaw. 42Bage ɗiŋnedin jya̰ mbi no go, jya̰ nama go: «Mbo me mbo mbal pore to, ago mbi ne aŋ buwal zi to, aŋ naa ge ho̰l ma mbo hál aŋ.»
43Mbi jya̰ aŋ fare, amma aŋ be za̰ mbi to, aŋ be gwan ne aŋ pala wak honna ge Bage ɗiŋnedin ne pe se to. Pala ga̰l ge aŋ ne zi, aŋ he viya̰ mbo le njal ya no. 44Amoriya ma, naa ge ne ká ne njal zi ma, zú ya aŋ ndwara zum no, a há aŋ digi no, a ɓarse aŋ no dimma ne daaram ne yan naa go, ne Seyir go ɗiŋ det mbo Horma ya. 45Swaga ge aŋ ne gwa̰ ya, aŋ fya Bage ɗiŋnedin ndwara se, amma na sḛ be za̰ aŋ to, gisi na togor ma digi. 46Aŋ gá katɗa Kades go dam ma gḛ, dimma ne dam ma ge aŋ ne ka go go.
Currently Selected:
Dwage Eya 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.