Daalam 2
2
Maktub ge ɓase ge Dok ne ma ge ne suwal Efesus go
1Njaŋge hon maleka ge swaga koteya ge ɓase ge Dok ne ma ge ne suwal Efesus go: «Bage ne wa̰ guwa̰r ma ɓyalar ne na tok matoson zi, ge ne mbo ne ɗuli ge dinar ge ɓyalar ma tuŋsi zi, jan go: 2Mbi kwa mo temel kerra ma, ne mo yál njoyya ma, ne mo wan tene ma kwa. Mbi kwa kwa go mo vin naa ge sone ma pe to, mo kugi nama ge ne tol ta go bama naa ge temeya ma ne, e no a be nama ne to, mo ɓo no go nama naa ge hale ma ne. 3Mo ka wan tene, mo njó yál ne mbi dḭl pe, mo be tyane to. 4Amma kaŋ ge mbi ne ɓyare na to ne mo ta, ago mo ya̰ laar wanna ge mo ne ge zḛ ge ya uzi. 5Dwa kwaɗa, mo dé da ne da pe! Hase, ke mo temel ge dḛ zaŋgal ma, kadɗa to, mbi mbo mbo ya mo ta, mbi he mo ɗuli kal ne na swaga go uzi, kadɗa mo hase ya to. 6Amma mo sḛ́ temel kerra ge Nikolas#2:6 A hateya a̰me ge sone ne ge na bage ne dó na pe a tol na Nikolas, na hateya mbe pe wanna jwap to. ma ne sen dimma ne mbi ne sen na go me.
7Ndu ge ne togor ge za̰ya, na za̰ fare ge O̰yom ne jan ɓase ge Dok ne ma. Ndu ge ne mbo hal ya, mbi mbo hon na uwara ge ndwara ge ne Paradis ge Dok ne zi ya zamma#Pe 2:8-9, Daa 22:2..»
Maktub ge ɓase ge Dok ne ma ge ne suwal Ismirna go
8Njaŋge hon maleka ge swaga koteya ge ɓase ge Dok ne ma ge ne suwal Ismirna go: «Bage zḛ ge, ne ge hṵsi ge, na ge ne su, ge ne gwan ja kat ne ndwara jan go: 9Mbi kwa yál njotɗa ge mo ne, ne a̰se ge mo ne kwa, amma mo gan! Mbi za̰ sáso salla ge nama ge ne tol ta go bama yahud ma ne, amma a kat na to me, nama sḛ ma Sinagog ge Saytan ne ma ne. 10Kaage mo sya yál ge ne mbo ya ɓol mo vo to. Ndi, Saytan mbo dol naa a̰me ma ne aŋ buwal zi daŋgay zi, a mbo ker aŋ yál dam wol#Pe 24:55, Dan 1:12.. Koy mo wak tuli ɗiŋ mbo siya, mbi mbo hon mo kadmul ge ndwara.
11Ndu ge ne togor ge za̰ya, na za̰ fare ge O̰yom ne jan ɓase ge Dok ne ma. Ndu ge ne mbo hal ya mbo gwan njot yál ge siya ge hṵsi ne to bat.»
Maktub ge ɓase ge Dok ne ma ge ne suwal Pergam go
12Njaŋge hon maleka ge swaga koteya ge ɓase ge Dok ne ma ge ne suwal Pergam go: «Bage ne kasagar ge ɗel azi jan go: 13Mbi kwa swaga ge mo ne ka ne na go kwa, a swaga ge Saytan hool ne na go ne. Amma mo gale koy mbi dḭl ya go, mo gale be ya̰ hon fareba ge mo ne mbi ta uzi to, ko dam ge a ne hṵ mbi ndu ge sayda ge fareba Antipas ge aŋ buwal zi go, swaga ge Saytan ne ka ne go. 14Amma mbi da ne fare a̰me ge mbi ne ɓyare na to ne aŋ ta: Naa a̰me ma ya aŋ buwal zi ge a ne vwa bama pe ne hateya ge Balaam#2:14 Ne Balaam ma ne Balak pe, ndi Isi 22—24. ne. Na ge ne hate Balak go na mbuɗi Israyela vya ma ndwara, ndwara e nama zam kaŋ ge a ne tyare nama hon kaŋ sḭḭm ma, ne e nama wat kaya kerra zi#Isi 31:16.. 15Uwale, aŋ buwal zi, naa ge a ne ho̰ hateya ge Nikolas ne ma ya go. 16Se no, hase! Mbi mbo mbo ya mo ta avun cap, mbi mbo ke pore ne nama ne kasagar ge ne ndage ne mbi wak zi.
17Ndu ge ne togor ge za̰ya, na za̰ fare ge O̰yom ne jan ɓase ge Dok ne ma. Ndu ge ne mbo hal ya, mbi mbo hon na manna ge woyya, mbi mbo hon na turum saal, ge dḭl ge giya̰l#Wat 16:14-15,33-34, Isa 62:2, 65:15. ne njaŋge ne na ta, ge ndu ne kwa na to, ɗeŋgo na ge ne ɓo na.»
Maktub ge ɓase ge Dok ne ma ge ne suwal Tyatira go
18Njaŋge hon maleka ge swaga koteya ge ɓase ge Dok ne ma ge ne suwal Tyatira go: «Dok vya, na ge na ndwara pul kaal kekeŋ dimma ne ol swala go, ge na koo ma dimma ne fool ŋgirma gurgiya go jan ne: 19Mbi kwa mo temel kerra ma, ne mo laar wanna, ne mo fareba honna, ne temel ge mo ne ke naa, ne wan tene ge mo ne kwa. Mo temel ge go̰r go ma waɗe ge zḛ ge ma waɗe. 20Amma mbi da ne fare a̰me ge mbi ne ɓyare na to ne mo ta: Ago mo ya̰ gwale Yezabel#2:20 Yezabel, ndi 1Gan 16:31, 19:1-2, 2Gan 9:22-30., na ge ne tol tene go na anabi ne, ge ne ya̰me mbi mo̰r ma, ge ne hate nama kaya kerra, ne zam kaŋ ge a ne tyare nama hon kaŋ sḭḭm ma. 21Mbi ya̰ na swaga go na hase, amma mbyare hase na kaya pe zum to. 22Ndi, mbi dol na moy daŋ pul, poseya ne nama ge ne fi ne na ma, a ɓo yál ge be to, kadɗa a hase bama sone ma ya zum to. 23Mbi mbo hun na vya ma uzi. Go no ɓase ge Dok ne ma pet a mbo kwa go mbi bage ne hale dwatɗa ma ne dulwak ma ne. Mbi mbo pot ndu ge daage ne aŋ buwal zi na kaŋ kerra ma pal#Kmb 7:10, Irm 17:10, Kmb 62:13..
24Amma aŋ ge ne suwal Tyatira go ma, ge ne ya̰ ta hateya mbe pe go to ma, ge ne ame fare ge naa mbe ma ne tol na go: ‹Fare ɗimil ge Saytan ne› to ma, mbi jan aŋ go, mbi mbo gwan e dṵṵl ge ɗogle aŋ pal to bat. 25Amma kaŋ ge aŋ ne na, koy me na ndiŋ ɗiŋ gwanna ge mbi ne ya. 26Ndu ge ne mbo hal ya, ge ne mbo koy mbi temel ma ya ɗiŋ mbo aya, mbi mbo hon na pool pehir ge ɗogle ma pal#Kmb 2:8-9, Isi 24:17, Daa 22:16.. 27Mbo ka ɗame nama ne calaŋ ge walam, mbo ka ɓa nama (pala) dimma ne naa ne ɓa il go. 28Dimma ne mbi sḛ ne ɓo pool ne mbi Bá ta go, mbi mbo hon na guwa̰r ga̰l ge cya̰wak pala. 29Ndu ge ne togor ge za̰ya, na za̰ fare ge O̰yom ne jan ɓase ge Dok ne ma.»
Currently Selected:
Daalam 2: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.