Malaci 2
2
1Se no, mḛreya mbe no da ne aŋ naa ge ke tuwaleya ma pe. 2Kadɗa aŋ zá̰ mbi to, kadɗa aŋ laar be he hon mbi hormo to, Bage ɗiŋnedin, Bage naa ge mbal pore ma ne jan ne. Mbi mbo vḛne mbi wak aŋ pal, mbi vḛne mbi wak ge aŋ kaŋ ɓolla ma pal. A ŋgat mbi mbo vḛne mbi wak nama pal, ne da pe, ndu a̰me ɗu ne aŋ buwal zi be sal na laar go, na hon mbi hormo to.
3Ndi, mbi mḛre aŋ ne aŋ hir ma. Mbi mbo kot aŋ, aŋ ndwara fa̰ ma zi ne kavaar ge aŋ ne tyare nama aŋ dam vḛso go ma njoo ma. A mbo in aŋ ya zum poseya ne njoo mbe ma. 4Go no, aŋ mbo kwa go, mbi ho̰ aŋ eya mbe no ndwara go wak tuli ge mbi ne ke ne Levi vya ma na ga ɗiŋnedin, Bage ɗiŋnedin, Bage naa ge mbal pore ma ne jan ne. 5Mbi ke wak tuli ne nama ndwara go, nama ka ne ndwara, nama ɓó halas me. Mbi ho̰ nama kaŋ mbe ma no ndwara go, nama ho̰ mbi hormo. Nama sḛ ma ho̰ mbi hormo, nama ka ndat mbi ndwara se me. 6A ka hon hateya fareba pal, fare ge hale a̰me ɗu be ka ndage ne nama wak zi to bat. A ka ke mborra ne mbi halas zi, ne dosol zi, a gwa̰ ne naa gḛ ne nama ya̰l kerra ma zi ya. 7Ago bage tuwaleya temel, a hate naa kwar Dok, naa mbo ame hateya na ta. Ne da pe, na sḛ temeya ge Bage ɗiŋnedin, Bage naa ge mbal pore ma ne nè#Hag 2:11.. 8Amma aŋ ɗe, aŋ ya̰me viya̰, ne hateya ge aŋ ne ma ta, aŋ é naa gḛ detɗa, aŋ yele wak tuli ge mbi ne ke ne aŋ ge Levi vya ma ne pala, Bage ɗiŋnedin, Bage naa ge mbal pore ma ne jan ne. 9Ne jo̰, aŋ ke mborra mbi eya ma pal to, aŋ ka ke vareya swaga ge aŋ ne hon aŋ hateya ma go ɗe, mbi me, mbi mbo é ɓase ma pet sen aŋ, aŋ mbo gá a̰me pe to.
Viya̰ ma azi ge Israyela vya ma ne sen wak tuli ge Dok ne
10Nee pet, nee da ne bá ge ɗu to’a? Te be Dok ɗu kikit dó nee ne to’a? Kyaɗa nee ba ka lase ta, ta buwal zi ndwara sen wak tuli ge Dok ne ke ne nee bá ma ɗaa? 11Naa ge suwal Yuda ne ma lase bama pala, a ke kaŋ ge seŋgre kakatak ma suwal Ursalima go, ne suwal Israyela go pet. Ago a sḛ́ swaga ge mbegeya ge Bage ɗiŋnedin ne, na ge na laar ne wá̰ na gḛ. A mbo san vya kale ma ge ne uware dok ge ɗogle ma. 12Ya̰ me Bage ɗiŋnedin na yá̰ naa ge ne ke kaŋ ge go mbe ma, vya ma ne nama vya kon ma uzi, poseya ne hir ge Yakub ne ge daage pet ge ne mbya ke tuwaleya hon Bage ɗiŋnedin, Bage naa ge mbal pore ma ne, ne naa mbe ma pe.
13Ndi me kaŋ ge sone ge azi ge aŋ ne ke. Aŋ son tuwaleya ge Bage ɗiŋnedin ne se ne aŋ mḭḭm ma, aŋ ka fyalla ne yo̰re ta, ne da pe, Bage ɗiŋnedin gwan é na haŋgal aŋ tuwaleya ma pal to, gwan ame kaŋ ge aŋ ne tyare na ma to me. 14Aŋ ele ta go: «Kyaɗa ba ka ke go ɗaa?» Ago Bage ɗiŋnedin ka sayda aŋ ne gwale ge aŋ ne sá̰ na aŋ bool zi buwal zi, na ge aŋ ne lase na. Na sḛ ka dagre ne aŋ, aŋ sḛ ma, aŋ ke wak tuli ne na. 15Bage ɗiŋnedin te be ke aŋ ne na sḛ duur dagre ɗu, duur zi, ne o̰yom zi me to’a? Katɗa ɗu duur ge ɗu zi mbe ɓyare da ɗaa? Te ɓyare be hir ge Dok ne hon to’a? Aŋ ɗe, ke me haŋgal, lase me gwale ge aŋ ne sá̰ na bool ge aŋ ne zi ma to. 16Bage ɗiŋnedin, Dok ge Israyela ne jan ne: Ndu ge ne kwane na gwale ɗo, ba yan na, di da ne ndu ge ne fat na ba̰r se dodorob ne swama swaga ke fare tele go go. Bage ɗiŋnedin, Bage naa ge mbal pore ma ne jan ne. Ke me haŋgal, lase me aŋ pala to.
Bage ɗiŋnedin mbo teme na bage temeya ya
17«Aŋ lwage Bage ɗiŋnedin da ne aŋ fare janna ma, go no puy ɗe, aŋ ka janna go: ‹I lwage na da ne da ɗaa?› A swaga ge aŋ ne jan go: ‹Ndu ge ne ke sone, a kwaɗa Dok ndwara zi. Na sḛ zá̰ tuli ya naa ge go mbe ma no zi,› ko aŋ ne jan go: ‹Dok ge dosol ya da ɗaa?›
Currently Selected:
Malaci 2: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.