Temel Kerra ge Levi vya ma ne 2
2
Tuwaleya ge kaŋ kyarga ma ne
1Kadɗa ndu tyare tuwaleya ge kaŋ kyarga ma ne hon Bage ɗiŋnedin, na tyare swáma peɗem, na ka̰ num na pal, na é dukan na ziyar go me. 2A mbo gene na ya Aaron vya ma, naa ge ke tuwaleya ma ta, a mbo gān swáma peɗem ge a ne ka̰ num na pal mbe tok pul ɗu ŋgul, a abe dukan mbe mwaɗak, bage tuwaleya mbo til na twal tuwaleya pal a ba gá ɗusiya dimma ne kaŋ vot pala go. No a tuwaleya ge tilla uzi, kaŋ ge hur tuli ne Bage ɗiŋnedin pe ne. 3Tuwaleya ge kaŋ kyarga ne pe ge ne gá a Aaron ma ne na vya ma ne ne. No a tuwaleya ge tilla uzi ge mbegeya uzi hini cat ne Bage ɗiŋnedin pe ne.
4Kadɗa ndu tyare tuwaleya ge kaŋ kyarga ne ge a ne swá na fur#2:4 Fur: Zaŋgal fur ka il ga̰l, a ka jage ol na go̰r zum, swaga ge ne zwamle ol, a ba ka e katugum watɗa na zi swarra. zi, na tyare katugum ge ne ke ne swáma peɗem be ge jiya̰l hore na ndwara zi watɗa ne num, ko paŋgaso ge giya̰l ge be jiya̰l hore ge a ne ɗeere num na pal ɗeere. 5Kadɗa na tyare katugum ge ne sá sat hṵli go, na ka katugum ge ne ke ne swáma peɗem watɗa ne num be ge jiya̰l hore na ndwara zi to. 6Mbo besege na se, mbo kan num na pal. No a tuwaleya ge kaŋ kyarga ne ne. 7Kadɗa na tuwaleya ge kaŋ kyarga ne ge a ne sat na hṵli go ɗe, a wat swáma peɗem mbe da ne num. 8Mo mbo gene tuwaleya ge kaŋ kyarga ne ge a ne ke na ne kaŋ mbe ma ya Bage ɗiŋnedin ndwara se, a gene na ya bage tuwaleya ta, na sḛ ba gene na ya twal tuwaleya ta. 9Bage tuwaleya mbo he na wak nde tyareya ne kaŋ vot pala pe ge twal tuwaleya pal ba gá ɗusiya. No a tuwaleya ge tilla uzi kaŋ ge hur tuli ne Bage ɗiŋnedin pe ne. 10Tuwaleya ge kaŋ kyarga ne pe ge ne gá a Aaron ma ne na vya ma ne ne. No a tuwaleya ge tilla uzi ge mbegeya uzi hini cat ne Bage ɗiŋnedin pe ne.
11Tuwaleya ge kaŋ kyarga ne ge daage ge aŋ ne tyare na hon Bage ɗiŋnedin aŋ mbo ke na ne jiya̰l hore to bat. Ago kaŋ ge ne ke ne jiya̰l hore, ko ne daaram aŋ mbo tyare na tilla uzi ɗusiya hon Bage ɗiŋnedin to bat. 12Aŋ da ne pool tyare na hon Bage ɗiŋnedin dimma ne kaŋ wak siyal go. Amma aŋ mbo tyare na twal tuwaleya pal dimma ne kaŋ ge hur tuli go to bat. 13Aŋ mbo kan yuwam ge tuwaleya ge kaŋ kyarga ne ge daage ndwara zi, aŋ mbo ya̰ be ge kan yuwam ge tuwaleya ge kaŋ kyarga ne pal to to bat. Ago yuwam ŋgay wak tuli ge Dok ne ke ne aŋ. Tuwaleya ge kaŋ kyarga ne ge daage ge aŋ ne tyare na, na ka da ne yuwam na ndwara zi.
14Kadɗa aŋ tyare kaŋ wak ge zḛ ge hon Bage ɗiŋnedin, aŋ mbo tyare swara pala vo̰meya, ko swara wak ge zḛ ge nanna. A go no, aŋ ba ka tyare aŋ kaŋ wak ge zḛ ge ge aŋ kaŋ kyarga ne ma. 15Aŋ mbo kan num na pal, aŋ é dukan na ziyar go me. No a tuwaleya ge kaŋ kyarga ne ne. 16Bage tuwaleya mbo abe swáma nde, ne num, ne dukan mwaɗak, mbo til nama uzi a ba gá ɗusiya ne Bage ɗiŋnedin pe. No a kaŋ vot pala ne.
Currently Selected:
Temel Kerra ge Levi vya ma ne 2: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.