Galatiya ma 2
2
Koteya ge naa ge temeya ma ne Ursalima diŋ
(Tkm 15:1-29)
1Uwale, del wol para anda go̰r go, i ne Barnabas gwa̰ ya Ursalima go no, mbi wa̰ Titus ya mbi pe go no me. 2A Dok dya̰ tene mbi ta ne e mbi gwan’a Ursalima go no. Koteya go, mbi wa̰ naa ga̰l fare ge kwaɗa ge mbi ne oy na pehir ge ɗogle ma ta pe. Ne da pe, na kaage so ba̰reya ge mbi ne ge dḛ zaŋgal, ko ge ma̰ ge na jya baŋ to. 3Amma Titus na ge ne mbo ya mbi pe go, ne jo̰ a Grek ne puy ɗe, a be ke na ne pool go na vya̰ ba̰y to. 4Ne ná vya ge hale ma pe, nama ge a ne pwa ta ya i buwal zi ma, ndwara ban i be ge kat suli ge Kris Jeso zi, a ɓyare gwan i mo̰r ge eya ne zi. 5I be vin gwan ne i pala nama pe se go ŋgeɗo to bat, ne da pe fareba ge fare ge kwaɗa ne ka aŋ buwal zi.
6Amma ne nama ge a ne ndil nama go nama naa ga̰l ma ta, be pá mbi ne ga̰l ge nama ne zi to. Dok vare naa dasana ma to. Naa ga̰l mbe ma be e dṵṵl a̰me mbi pal to. 7Amma a kwa go, Dok tá mbi ne ndwara oy fare ge kwaɗa naa ge be vyan ba̰y to ma ta, dimma ne tá Bitrus ndwara oy fare ge kwaɗa naa ge vyan ba̰y ma ta go. 8Ago na ge ne ke temel Bitrus zi ndwara teme na ne naa ge vyan ba̰y ma pe, a na ke temel ne mbi zi ne uwale, ndwara teme mbi naa ge be vyan ba̰y to ma ta. 9Swaga ge a ne kwa bobo ge Dok ne ho̰ mbi na, swaga mbe go, Yakub, Kefas, ne Yohanna, nama ge a ne ndi nama go nama naa ge mbyale ɓase ge Dok ne ma ne ma, a san i ne Barnabas wak ndwara ŋgay go i ne bama dagre, i ɗe, i mbo pehir ge ɗogle ma ta, nama sḛ ma ba mbo naa ge vyan ba̰y ma ta me. 10Ɗeŋgo, a go i dwa ne a̰se ma, no a kaŋ ge mbi ne ka á tene kerra ne.
Bulus gage Bitrus ge suwal Antiyokus go
11Amma swaga ge Kefas ne mbo ya suwal Antiyokus go, mbi gage na ne fare na wak zi, ne da pe, ke ya̰l. 12Ago swaga ge naa ge Yakub ne teme nama ya ma gale ne be mbo ya, ka zam kaŋzam poseya ne pehir ge ɗogle ma. Amma swaga ge a ne mbo ya, ka kan na pala, gá abe tene uzi no, ne da pe ka sya naa ge vyan ba̰y ma vo. 13Yuda ge may ma wat na mbuɗiya mbe zi, a e Barnabas ɗiŋ wat mbuɗiya mbe zi me. 14Amma swaga ge mbi ne kwa go a mbo ne dosol ge fareba ge fare ge kwaɗa ne pal to ɗe, mbi jan Kefas naa ndwara go pet go: «Mo ge Yuda, kadɗa mo ke mborra dimma ne pehir ge ɗogle ma go, be ne Yuda ma go to ɗe, mo é pehir ge ɗogle ma ne pool saŋge Yuda gyana ɗaa?»
15I ɗe, i Yuda ma ne ne tolla ge i ne ya day! I be pehir ge ɗogle ma, naa ge ke sone ma ne to. 16Amma i da ne kwarra go ndu dasana hat dosol da ne kerra ge na ne eya pal pe to, amma ne hon fareba Jeso Kris ta pe ɗeŋgo. I sḛ ma i ho̰ fareba Kris Jeso zi, ne da pe i há dosol ne fareba honna Kris ta pe no. Ndu a̰me ne pool hat dosol ne mborra ge na ne eya pal pe to bat. 17Kadɗa i ɓyare hat ta dosol Kris zi ɗe, ŋgay go, i sḛ ma naa ge sone ma ne dimma ne pehir ge ɗogle ma go me. No a go Kris ke temel ge sone ne ɗaa? A go to bat. 18Ago kadɗa mbi sin kaŋ ge mbi ne gu na se digi ɗe, no ŋgay go mbi ndu ge ya̰l ne. 19Ago, ne eya go ɗe, mbi su sú ne eya go, ne da pe mbi ka ne ndwara ne Dok pe. A pé mbi dagre ne Kris. 20A be mbi ka ne ndwara ne to, a Kris ne ndwara ne mbi zi ne. Katɗa ge mbi ne ma̰ no duur zi, mbi ka ya hon fareba ge Dok vya ne zi, na ge na laar ne wa̰ mbi, ge ne ya̰ tene suya ne mbi pe. 21Mbi kuri kwa a̰se ge Dok ne uzi to. Ago kadɗa a eya hat naa dosol ne ɗe, Kris su baŋ yak.
Currently Selected:
Galatiya ma 2: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.