1Korinte ma Fare pala hageya
Fare pala hageya
Maktub ge zḛ ge ge Bulus ne njaŋge hon Korinte ma a Bulus njaŋge na ne ge del wara anuwa̰y para anda (54) ko wara anuwa̰y para anuwa̰y (55) go, swaga mborra ge na ne ge ndwara ataa mbo waage fare ge Dok ne go. Njaŋge na ge suwal Efesus go.
Bulus dó ɓase ge Dok ne ma ge ne Korinte go pe ne ge del wara anuwa̰y (50) ko wara anuwa̰y para azi (52) go ge mborra ge na ne ge ndwara azi mbo waage fare go. Ke saba wol para tiimal ge Korinte go (Tkm 18:1-23). Naa ge ne ho̰ fareba ma a ka gḛ pehir ge ɗogle ma, mo̰r ma ka gḛ suwal mbe go. Ago suwal Korinte ka suwal ga̰l, ka da ne swaga yabe fak ga̰l maŋgaɗam ga̰l wak go azi. A go no, naa ge ke tujar ma zuli go no. Ne jo̰, pehir ma hini hini a ɓo ta swaga mbe go, hada ma hini hini, ne kwarra ma, ne sḭḭm ma hini hini, a ka suwal mbe go, bataraŋ ka gḛ ge be to suwal mbe diŋ: varseya ma ka ɓase ge Dok ne ma buwal zi, ne gool ma, ne gaage ma, kwarra ge dunya ne ma ka wat ya ɓase ge Dok ne ma buwal zi, naa ka fi ne ta se bataraŋ, naa ge gan ma ka jegreya swaga ba̰a̰n zamma go, no a kaŋ ge ne e Bulus njaŋge nama maktub ne.
Swaga ge Bulus ne ɗage ne suwal Korinte go, e pe njaŋge maktub a̰me hon Korinte ma (1Kor 5:9-13), amma na maktub mbe nee ne na to. A go no, swaga ge ne gwan za̰ fare ma ne naa ge suwal Klowe ma wak zi (1:11), ne maktub ge ne ɓo ne Korinte ma tok go me (7:1), gwan njaŋge nama maktub ge azi no, a na ge nee ne tol na Maktub ge zḛ ge ge Bulus ne njaŋge hon Korinte ma.
Ge maktub mbe zi, ne 1:1-9, Bulus e pe da ne wak sanna, ne gwan ne gugu hon Dok me. Ne go̰r go no, jan Korinte ma no go, nama ya̰ varseya ma uzi (1:10—4:21), nama yá̰ naa ge ne fi ne ta ma ne ɓase ge Dok ne ma buwal zi uzi (5), nama mbo ne nama fare ma ge naa ge dunya ma ndwara se ya to (6:1-11). Uwale, gwan dwage nama no go nama ya̰ kaya kerra uzi (6:12-20).
A go no, gwan ne nama fare janna ge nama fare ge a ne ele na ya maktub zi ma pal no:
- Sanna pal (7),
- Duur ge a ne tyare na swaga sḭḭm ma go zamma (8:1—11:1),
- Ba̰a̰n ge duur ge Kris ne zamma (11:2-34),
- Bobo ge O̰yom ge mbegeya ne (12—14),
- Tanna ge naa ge siya ma ne (15).
Bulus á na maktub wak da ne moɗegeya ne bobo kerra pe, ne na dwatɗa ge mbo ne temel zḛ, ne wak sanna ma me (16).
Swaga isi maktub ge zḛ ge ge Korinte ne go, nee ɓol go fare ge ne ka ɓase ge Dok ne ma buwal zi ge Korinte go, nee ɓol nama ma̰ no ya ɓase ge Dok ne ma buwal zi ne se no. Fare janna ge Bulus ne ma da ne nee pe ma̰ ne se no ɗiŋ.
Currently Selected:
1Korinte ma Fare pala hageya: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.