Sefania 2
2
1Katimaleritse ilâ, katimaleritse, inôᴋatigêngojose kangusungneᴋangitose:
2Perᴋojak aulangitok aniᴋârtinago, uvlok anigorᴋârtinago iviksukatitut serᴋalijaumajutitut, Nâlekab ningarninga katsungaitoktôᴋârtinago ilipsingnut, Nâlekab ningarningata uvlunga tikiᴋârtinago ilipsingnut.
3Nâlegak ᴋenersiuk, ilûnnase sinaungaitose nuname, tâpsoma perᴋojanganik nâlektose; idluarniksak ᴋenersiuk, sinaungainek ᴋenersiuk; ijertortauniangimangâpse Nâlekab ningarningata uvlungane.
4Gaza ᴋemaktaujomârmat, Askalonelo sunairutingorlune; Asdode ᴋemâtitaujomârpok uvlub ᴋeterarningane, Ekronelo nusuktaujomârpok amânginut aglât.
5Kapianarmêk imarbiub kiglingane nunalît, inôᴋatigêt Kritimiut! Nâlekab oᴋausingata tôᴋpâtit, Kanaan, Filisterit nunangat; asseroromavagit inuᴋarungnaimariᴋovlutit.
6Imarbiublo kiglinga nerrinasugviksaujomârpok, iglokulluᴋartuinarlune mianersijut siniktarviksanginik unnuiviksaniglo sauganut.
7Kiglingalo Jûdakut amiakunginut ilingajomârpok, saugaᴋotitik nerripkalârpait tagvane; Askalonib iglungine innangalârput unnungme; Nâlekab Gudimik nelipsalârmagit, aularutijaujungillo tikiutimilugit.
8Moabib mitauteᴋarningit, Ammoniblo ᴋitorngangita oᴋarnerlutjiningit tusarpakka, inuᴋotikka mitautigingmâtigik, angijorortilutiglo nangminermingnik kigligijangit pivlugit.
9Tamanna pivlugo, sorlo mikseᴋârtomik inôgama, oᴋarpok Nâlegak Zebaot Israêlib Gûdinga, Moabe Sodomatut ituksauvok, Ammoniblo ᴋitorngangit Gomorratut, perornerlukut ôtsiutit, itersallo tarrioktalît, sunaᴋajuitûblo pigilârpait; inuᴋotima amiakungita asserolârpait, inôᴋatigêksoaᴋotimalo amiakungita kingormgutilârpait.
10Tamanna tikitautigilârpât pingijainitik pitjutigilugo, mitauteᴋarmatta angijorortilutiglo nangminermingnik Nâlekab Zebaotib inuᴋotinginut.
11Nâlegak erᴋsinadlaromârpok tâpkonunga, nuname Gûdeojut ilûnaita perlertitsomârmagit; opigijaksarivâllo inuit, ilûnatik inimingnit, ilâ, inôᴋatigêksuit ilûnatik kiglingit.
12Ilipsetauk Etiopiamiojose saviksoarmut toᴋotaujuksauvose.
13Agganelo issagomârpait avunga, Assirialo asserorlugo; Ninivelo sunaᴋangitungordlugo ipteriliktungordlugolo inuᴋajuitotut.
14Nergjutillo nujuartut akᴋorilârput tagvane, nergjutit adsigêngitut ilûnatik: tingmiat miagôrtut ilâᴋosîllo siniktalârput sukkaksoangita katigoliunganingine; nippingit tusartaujomârput igalânginit; aunek takuksaujomârpok upkoangita abloriangine: ikângit sidereojut ilupiarutaijartaulârmatta.
15Tamadja iglugasaksuit ᴋuvianartoviolauᴋtut terliklutik ineᴋartut, ômatimingne oᴋartut: Uvangauvunga, uvaptullo itoᴋangilak: taimale sunaᴋangitungorpok, aᴋopiviksatuinauvok nergjutinut nujuartunut! Ilûnatik apᴋusârtut tâpkoninga kokoviarutigilarpait, aggatiglo pataktorlugit.
Currently Selected:
Sefania 2: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.