Habakûb 3
3
1Nelautaijub Habakûb tuksiarutâ, ogguarutsit erinanganut ilijaᴋ.
2Nâlegaᴋ, oᴋautaunît tusarpara, erᴋsivungalo; Nâlegaᴋ suliaksat ômartilaungmiuk jârit ᴋerᴋane; nelonaijaruk jârit ᴋerᴋane; ningarnermelo nâpkiningneᴋ erᴋaumalauruk.
3Gûde tikipoᴋ Têmanemit, ivsornaitorlo Pâranib ᴋaᴋanganit. (Sela.) Ânanauningata ᴋilait ulikpait, nunalo nâmavoᴋ nertornautinganik.
4Âkᴋisungningalo ᴋaumanertun-ipoᴋ; issagutâᴋarpoᴋ agganginit anijunik; tâpkonanelo pitsartuninga ijersimavoᴋ.
5Nusilingnartoᴋ ingergavoᴋ sivorngane, aumallo anivut itigangita atânit.
6Nangilauᴋpoᴋ nunaᴋsoarlo ôktorpa; taᴋosarpoᴋ, inôᴋatigêksuillo siamartipait; ᴋaᴋaksuillo isoᴋangitomit isoᴋangitomut pijut serᴋalijauvut, ᴋaᴋallo nungusuitut okᴋovut; tâpsoma apᴋotingit soᴋosijuitôvut.
7Tupit Kûsanemêtut kapiasudlarlutik takolauᴋpakka; ᴋalerᴋat nuname Midianemêtut sajukpilâdlarput.
8Nâlekab kôksuit nakêlijutigilauᴋagît? Ningarnivît kôksuit pilauᴋagît, ningaumajârnivîllônêt imarbingmut tôᴋᴋâ, horseᴋotingne ikimavlutit ingeraravit, ᴋamutîngne piuliklerutinê?
9Pitiksît ulêrmarilauᴋpoᴋ; angernerijatit inôᴋatigêksoarnut tunganarput. (Sela.) Kôksoarnut nuna ᴋoplolaukpat.
10Takolutit ᴋaᴋaksuit ôlikput; imersuit iktulijartut ᴋângerput: itinersûb nipinne anivâ, agganelo ᴋongmuartipait.
11Seᴋineᴋ takᴋerlo noᴋangalauᴋpuk inîngmingne, ᴋargjuvît ingergajut ᴋaumaningat pivlugo, ᴋalugiavît ᴋebleridlartûb ᴋebleridlarninga pivlugo.
12Iluluklutit nuna ingerarvigilauᴋpat, ningadlarlutillo inôᴋatigêksuit annaulauᴋpatit.
13Anivotit inûᴋotitit piulijomavlugit, mingoartavît piulijauniksanganut; idluitûb iglungane niaᴋôjoᴋ nakalauᴋpat, tungavinga saᴋᴋijârtilugo ᴋongaseᴋ tikidlugo aglât. (Sela.)
14Sorᴋsuktuksangita niaᴋorijangat putolauᴋpât ᴋalugiaminut; tâpkoa ulajujaᴋsoatut tikilauᴋput siamartitsomavlunga; ᴋuviasûtigilauᴋpâllo aklujut nerrijomavlugit, angijivlutik.
15Imarbik tullerajâlauᴋpat horseᴋotingnut, imaᴋsuit pitsartujut malliksoangit.
16Tusarapko iluga aulavoᴋ, ᴋangasinâka sajukpûk nipe pivlugo; auneᴋ iterpoᴋ saunimnut, sajudlarpungalo inimne; merngoêrserviksarsilangatôᴋ uvlorme kapianartovingme, katingajoᴋsôvlutik opagiartortut majorarpatta inuit sorᴋsugomavlugit.
17Napârtoᴋ paungatannaᴋut nuvugulâᴋtâlungikaloarpat, vaineliksataliglo paungatâlungipat, orᴋsuliub napârtunga sulijungnaigaloarpat, perorsêvillo nerᴋiksanik sakᴋêlungipatta, saukat ungalulingmit nungugaloarpatta, nergjuteᴋaullo nergjutetaᴋangipat;
18Sule Nâlegaᴋ ᴋuviagijomavara, Gûdelo piulijiga serrijûtigijomavlugo.
19Jehôva Nâlegaujoᴋ pitsartutigivara, tâpsomalo itigakka tuktûb itigangititut îtipait, arvertartiniarpângalo poᴋtojoᴋotimne. Imgitit angajoᴋânganut, noᴋaᴋseraliᴋotimne.
Currently Selected:
Habakûb 3: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.