I Atannit 8
8
Angersimanerub iklervingata âtauninga Tempelemut; Tempelib attortautainarninga.
1Tagva atanniub Salomob ingminut katiᴋovait angajoᴋaunerôjut Israelitine, kinguvarêt angajoᴋangit, atâtaujullo Israelitit akkorngane atanningit ilûnnaita Jerusalemut, Nâlekab angersimaningata iklervinga âlugo takpaunga Davidib iglugasaksoanganit, tagva Zionemit.
2Angutillo Israeleme ilûnnatik ᴋatilerput atannermut Salomomut, uvloksiorvingme, takᴋerme Ethanemik atelingme, tagva takᴋit 7 ingane.
3Israelitillo angajoᴋaunerojungit ilûnnatik tikkimatta; ajuᴋertuijut Nâlekab iklervinga kivikpât,
4Apâlo takpaunga; taimaglotauk angersimanerub tuppinga, ivsornaitoviublo perᴋutingit ilûnnaita, tuppermêlauktut, ajuᴋertuijut Levitillo takpaungartipait.
5Atannerlo Salomo, illagêllo Israelitit, ᴋatimalerlauktut tapsomunga, aiᴋatigilaukpât iklerviub sivorngane, tunnijilutiglo tunnergutinik, sauganik tuktuvangniglo, taimâk unuktigijunik kittiksaulaungimatta, kittitaujungnangimattalo.
6Taimâk ajuᴋertuijut Nâlekab angersimaningata iklervinga âpât inniksanganut, innemut iglub kinguanêtomut, ivsornainerpangôjomut, Kerubingoâk esarungita attânut.
7Kerubingoâk esarotik issivingmagit inniub iklerviub makkitavigijangata ᴋollâne, ullikpâlo iklervik akkerautingillo ᴋollânit.
8Akkerautingillo taimâk takᴋitigijolaukput, isungit takkojaulaungmatta ivsornaitovingmit, inniub kinguanêtub sângane, igluble sivurânit takkojaulaungilet; tagvanêtsainarpullo uvlok tamânna tikkilugo.
9Pittaᴋalaungilarlo sunamik iklervingme, aglagvîk ujaraujuk asigingnik, Mosesib illilauktakita kamunga Horebeme, Nâlekab Israelib ᴋitorngangit angerᴋatigilaungmagit, Egiptenemiut nunanganit aularsimalauktillugit.
10Ajuᴋertuijulle annilertillugit ivsornaitovingmit nuvujab Nâlekab iglunga nâmalerpa;
11Ajuᴋertuijullo nangerungnarlaungilet tagvane pinniaraksatik pinniarlugit, nuvujak pivlugo. Nâlekab ânanauningata Nâlekab iglunga nâmangmago.
12Tagva Salomo oᴋarpok: Nâlegak oᴋarpok, tâktome Inneᴋaromagame.
13Uvanga iglo igloliorlaukpara igluksarnut, inne innigijaksarijat soraijuitomik.
14Atanniublo kênane allarpa saimartilaitalo illagêt Israelitit ilûnnamasiangit; illagêllo Israelitit ilûnnatik nangerput tagvane.
15Tamnalo oᴋarpok: Nâlegak Israelib Gûdingat nertortaule, kannerminut atâtamnut Davidemut oᴋalauktok, aggangminullo nellautsititsilauktok, oᴋalauktorlo:
16Uvlormit taipsomanemit inuᴋotimnik Israelitinik aulartitsivigilauktamnit Egiptenemit, iglugasaksuit nellianik annerosulaungilanga Israelib kinguvarêngita nellianit, iglo igloliortauᴋovlugo pivlunga, atera tagvanêᴋovlugo; Davidele annerilaukpara angajoᴋauᴋovlugo inuᴋotimnut Israelitinut.
17Atâtagalo Davide isumaᴋalauralloarpok, iglo iglolioromavlugo Nâlekab Israelib Gûdingata atinganut illingajuksak.
18Nâlegarle oᴋalaukpok atâtamnut Davidemut: Isumaᴋaravit atera iglolioromavlugo, nâmaktullilaukpotit tamattominga kajusilauravit.
19Igville iglo tamânna iglolioraksaringilat, erniville illingnit pinniartub, tapsoma atera iglolioraksariva.
20Nâlekablo oᴋautsine oᴋauserilauktane nellautsitimavait. Uvanga atâtaga Davide innangêrlaurapᴋo, iksivalungalo Israelib iksivautangane, sorlo Nâlegak oᴋalaungmat, iglolo igloliorlaukpara Nâlekab Israelib Gûdingata atinganut.
21Akiksoilaukpungalo tagvane inniksamik iklervingmut Nâlekab angersimaninganik pittalingmut, angerutigilauktanganik atâtagilauktaptingnut, Egiptenemiut nunanganit aulartilauramigit.
22Salomoblo Nâlekab Altarekotinga sângerpa, illagêt Israelitit ilûnnamasiatik najortillugit, agganelo issangmivait ᴋillangmut,
23Oᴋarlunelo: Nâlegak Israelib Gûdinga, illiktut Gûdeᴋangilak, takpânelonêt ᴋillangme, atânelonêt nuname soᴋosijuititsijomik angernermik napkiningnermiglo kivgaᴋotingnut agvertarlauktunut sângne omamut tamânut.
24Soᴋosijuititsilauktotit atâtamnut Davidemut, oᴋauserilauktarnik tapsomunga. Kannernut oᴋauserilaukpat, aggangnullo nellautsitilaukpat, sorlo uvlorme tamattomane îmat.
25Mânnalo Nâlegak Israelib Gûdingat! kivgait atâtaga Davide soᴋosijuititsivigilauruk oᴋauserilauktarnik tapsomunga, oᴋarlutit: Ajoksartuksaungilatit angumik sâmne iksivajomik Israelib iksivautaksoangane, ernitit kammatsiartuinarpatta apᴋotigijamingnik, agvertarᴋovlugit sâmne, sorlo igvit agvertarlauravit sâmne.
26Mânna Israelib Gûdinga, oᴋautsitit mikseᴋârtotikit, oᴋauserilauktatit kivgarnut atâtamnut Davidemut.
27Gûdele nellâgut inneᴋaromaralloarᴋa nuname? Ahâk, ᴋillaub, ᴋillaillo ᴋillangita ilûnnamasiata illulungilâtit. ᴋanorle tagva iglo una igloliolauktara pinniarungnarajarka tamattominga?
28Sâlaurilletôk kivgavit tuksiarninganut, ᴋenuninganullo, Nâlegak Gûdîk, tusarᴋovlutit nipliarnermik, tuksiarnermiglo, kivgavit uvlome tuksiarnerijanganik sângne;
29Ijikik uitatsainarᴋovlugik uvlotillugo unnuarmelo iglomut omunga, innemut oᴋautigilauktarnut: Atera tagvanêtuksauvok; tusarᴋovlutit tuksiarnernik kivgavit tuksiarnerijanginik mâne inneme tamattomane;
30Taimâk tagva tusalaurit kivgavit inuᴋotivillo Israelitit ᴋenuninginik ᴋenuneriniartanginik mâne; tusalerit tamattominga inneme, innigijarne ᴋillangme, tusalaurit isumagijungnailugillo ajornerit.
31Kina idluitullilerangat inuᴋatiminut, kigligiksartuksaugunelo angermariktuksaugunelo, taimaimat sorlo oᴋarame angermaringnerlo âtaulerpat Altareᴋotivit sânganut, iglome omanetub;
32Tagva igvit tusalaurit ᴋillangme, pinniarlutillo, Erᴋartorlugillo kivgatit, uivêtok pasijaksaunerarlugo, agvertarningalo pitilugo niaᴋunganut; idluartorlo idluartonerarlugo, tunnitsivigilugolo idluarninga malliklugo.
33Inuᴋotitit Israelitit sâlagijaulerangatta omigijimingnut, idluitullilauramik illingnut, sâviginiarpatillo, atillo kigligiudsivigilugo pikpatta, tuksiarpattalo ᴋenulutiglo illingnut iglome omane;
34Tagva igvit tusalaurit ᴋillangme, isumagijungnailugillo inuᴋotivit Israelitit ajorningit, uttertiniarlaitalo nunamut atâtagilauktanginut tunnilauktarnut.
35ᴋillaglo parngnanairsimalerangat, sillaluluganelo, idluitullilaungmatta illingnut; tuksiarniarpattalo inneme omane, atillo kigligiutilugo pinniarpatta, ajornermingnillo sâpatta, pitlarangne;
36Tagva igvit tusalaurit ᴋillangme, isumagijungnailugillo kivgavit inuᴋotivillo Israelitit ajorningit, apᴋosinermik ajungitomik agvertarvigijaksarijanganik unnertutilaukârlugit, tunnijilutillo sillalungnermik nunakotingnut, tunnilauktarnut inuᴋotingnut, innigijauᴋovlugo tapᴋonunga.
37Kâkalerangat, nusilinartoᴋalerangallonêt, perortullonêt ᴋakᴋojaksat ᴋernersilerangatta, piglertaujartoᴋalerangallonêt nerrijoksoarnik, omigijingitalonêt nuname ittertarvingit illumarangagit, pagvinartoᴋalerangallonêt, ᴋannimaseᴋalerangallonêt, nellianik;
38Tuksiartut ᴋenujullo tamaita, inuit nellîllonêt, inuᴋotitit Israelitillonêt, tukkisilerpatta attunît omatimik pagvinarninganik, aggatiglo issangniarpatigik iglomut omunga;
39Tamânna igvit tusalauruk ᴋillangme, inneme inigijarne, isumagijungnainilutillo, pinniarlutillo, tunnijilutillo nellianut, agvertarnerilauktanga tamât malliklugo, sorlo omatinga illitarigangne; igvit kissivit inuit ᴋitorngangita ilûnnatik omatingit illitarigangne;
40Sivoratsainarᴋovlugit illingnik nelliutune tamaine, inotillugit nuname, atâtagijaptingnut tunnilauktarne.
41Takkorngartatauk nelliat, inuᴋotingnut Israelitinut illingalungitok, tikkilerangat nunamit ᴋaningitomêtomit atit pivlugo;
42(Tusarniarmatta aternik angijoksoarmik, aggangniglo pitsartujoksoarnik, tallerniglo issamijomik), ᴋailunelo tuksiarpat iglub oma sângane,
43Tagva igvit tusarit ᴋillangme inneme, innigijarne, pinniarlutillo tamainik takkorngartab nipliarutigijanganik illingnut; inuᴋatigêksuit nunametut ilûnnatik illitarksilerᴋovlugit aternik, sivoraᴋovlugittauk illingnik, inuᴋotititut Israelititut, tukkisilerᴋovlugillo atit malliklugo iglo tamânna igloliolauktara taijaungmat.
44Inuᴋotitit aularniarangatta unatadlarnermut omigijitik sorsugvigilugit apᴋome tilliklerutigijarne tapᴋoninga; tuksiarniaraikpatta Nâlekamut, iglugasaksuit annerilauktatit sâdlugit, iglolo aternut igloliolauktara sâdlugo.
45Tagva igvit ᴋillangme tusalaurit tapᴋoa tuksiarninginik, ᴋenuninginiglo, idluartomiglo sakᴋêvigikit.
46Idluitulliniaraikpatta illingnut, (inuᴋangimat idluitullilungitomik) igvillo ningarosugutigigungne, tunnilugillo omigijinginut, sâlagijingitalo aularutikpagit omisuktut nunanganut, ᴋaningitomullonêt; ᴋanitomullonêt;
47Omamiutarilerpatsuglo nuname parngnanairsimavigijamingne, sâlerpattalo tuksiarlutiglo illingnut, nuname parngnanairsimavigijamingne oᴋarlutiglo: Idluitullilaukpogut, tammarlauklutalo uivêtolaukpogut;
48Taimaglo sâlerpatta illingnut omamut tamânut, tarnermullo tamânut, omigijimik, aularutijimik nunangane, tuksiarpattalo illingnut, sâlutik nunagijamingnut atâtagijanginut tunnilauktarnut, iglugasaksoarnut annerilauktarnut, iglomullo igloliorlauktamnut aternut.
49Tagva tusalaurit tuksiarninginik, ᴋenuninginiglo, ᴋillangme, inneme innigijarne, idluartomiglo sakᴋêvigikit;
50Inuᴋotitillo isumagijungnaivigikit idluitullininginik illingnut, tappaninginiglo tamainik, tappajutigilauktanginik illingnik; napkiningneksilaulillo sâlagijimingne, napkiningniᴋovlugit tapᴋoninga.
51Inuᴋutaungmatta perᴋutaulutiglo illingnut, aularutilauktatit Egiptenemit kiaksaumit kikkiangmit;
52Ijikik uitaᴋovlugik kivgavit inuᴋotivillo Israelitit ᴋenuninginut, tusarᴋovlutit tapᴋoninga, nipliarutiginiartangit illingnut tamaita pivlugit.
53Igvit apterlaurangne inuᴋotingnut, nunab inuᴋatigêksoanginit tamainit, sorlo oᴋalauravit kivgakut Mosesekut, atâtagijavut aularutilaurangne Egiptenemit, Nâlegak Jehova!
54Salomoblo tuksiarnerit ᴋenunerillo tamakkoa tamaita nâgamigit Nâlekab sângane, tagva makkipok Nâlekab Altareᴋotinganit, serᴋortornermit aggane issangmilugit ᴋillangmut.
55Nangeriartorporlo tagvunga, saimartilaitalo illagêktut Israelitit ilûnnamasiatik nippeᴋortôjomut, oᴋarlunelo:
56Nertortaule Nâlegak, inuᴋotiminut Israelitinut merngoêrsernermik tunnijilauktok, sorlo oᴋalaurame. Oᴋausek atauserlonêt tikkingilungilak oᴋausinginit ajungitunit tamainit, kivgamigut Mosesekut oᴋauserilauktanginit.
57Nâlekab Gûdipta illagilittigut, sorlo atâtagijavut illagilaungmagit. Tapsoma ᴋemangniaratigut agganelo erᴋitiniarnagit uvaptingnit,
58Omativut sangutilugit tapsomunga, agvertarᴋovluta apᴋosiningine tamaine, malliᴋovlutalo perᴋojanginik, illusiokojanginiglo, idluarijanginiglo, perᴋolauktanginik atâtagijaptingnut.
59Oᴋautsikkalo tamakkoa Nâlekab sângane ᴋenunerilauktakka, najorlit Nâlekamut Gûdiptingnut uvlotillugo unnuamelo, kivgane idluartomik sakᴋêvigilugo piᴋovlugo, inuᴋotinelo Israelitit, uvlut tamaita, sorlo pijariaᴋaramik;
60Inuᴋatigêksuit nuname ilûnnatik illitarksiᴋovlugit, Nâlegak Gûdeôngmat, asseᴋangimallo.
61Omatiselo illuêngarlutik illingalaulit Nâlekamut Gûdiptingnut, agvertarᴋovluse, tapsoma illusioᴋojangit malliklugit, malliᴋovluselo tapsoma perᴋojanginik, sorlo pigapse nelliutome tamattomane.
62Atannerlo Israelitillo illuêngarlutik tamna illagilugo tunnergutinik tunnijivut Nâlekab sângane.
63Salomolo tunnergutinik tunnijivok ᴋujalijutiksatut tunnijaminik Nâlekamut, tuktuvangnik 22,000 dinik, sauganiglo 120,000 dinik. Taimaglo atanniub Israeliblo ᴋitorngangita Nâlekab iglunga attortainarpât.
64Uvlorme taipsomane atanniub inne avaluliorsimajok Nâlekab iglungata sivurânetok ivsornaitipa; tagvane tunnergutit ôtaksat, tunnergutillo nerᴋiksat, tunnergutillo ôtaksat orksungit tunningmagit; Altare kannujaujok Nâlekab sânganêtok, mikkiluarlaungmat tunnergutinut ôtaksanut, tunnerjutinullo nerᴋiksaujunut, tunnergutillo ôtaksat orksunginut.
65Taimaglo nelliutome taipsomane Salomob uvloksiorvik uvloksiorpa, Israelitillo illuêngarlutik illagillugo, ᴋatimajut unuktovaksuit Hemathemit Egiptenib kônga tikkidlugo, Nâlekab Gûdipta sângane; uvlut 7 it nâlugit, amalo uvlut 7 it nâlugit; tagva uvlôvut 14 it.
66Uvlullo 8 ingane inugasaksuit aularᴋovait. Tapᴋoalo atannek saimartipat, ailutiglo tuppermingnut, ᴋuviasuklutik maksoalutiglo ajungitut tamaita Nâlekab pinniarlauktangit kivgaminut Davidemut, inuᴋotiminullo Israelitinut pivlugit.
Currently Selected:
I Atannit 8: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.