I Atannit 9
9
Nâlekab sakkipsarninga Salomomut. Salomonib tunnijininga iglugasaksoarnik 20 ginik Hiramemut. Umiaktorningalo.
1Salomoblo Nâlekab iglunga, atanniublo iglunga, tamaitalo tussugijane, kajungerijanelo sanajomavlugit pijarêrtilauramigit;
2Nâlekab sakᴋervigiva aipanganik, sorlo Sakᴋervigilaungmago Gibeoneme.
3Nâlekablo oᴋautiva: Tuksiarnit, ᴋenunîllo, ᴋenunerilauktat uvamnut, tusarlaukpara, iglolo tamânna igloliorlauktat, atimnik pititsiᴋovlunga tagvunga soraijuitomik, ivsornaiviotilaukpara; ijikkalo omatigalo tagvanêtuksauvut nelliutune tamaine.
4Igvillo agvertarniaruvit sâmne, sorlo atâtait Davide agvertarlaungmat, omamut nallâgortomut, annerpanaijuitomullo, pinniarᴋovlutit taimailuatsiamik, sorlo pêrᴋolaurapkit; perᴋojakkalo idluarijakkalo mallingniarungne;
5Tagva atanionivit Israelitinut iksivautaksoanga soᴋosijuititsomavara soraijuitomik; sorlo atâtait Davide oᴋarvigilaurapᴋo, oᴋarlunga: Ajoksartuksaungilatit angumik Israelib iksivautaksoanganêtomik.
6Allarniarupsingale illipse ernipselo, mallingnagillo perᴋojakka, idluarijakkalo, mannilauktakka illipsingnut, ainiarluselo Gûdib asingit kivgartorlugit, tuksiarvigilugillo pigupse;
7Tagva Israelitit pêjarniarpakka nunamit tunnilauktamnit tapᴋonunga; iglolo ivsornaiviotilauktara atimnut, pêjaromavara kênarma sânganit; Israelitillo oᴋausiovaktungoromârput, oᴋangoarutingorlutiglo inuᴋatigêksoarnut ilûnnainut.
8Iglolo tamânna poktojoksogalloarlune, ilûnnainut sanirᴋotsijomârtunut kâkkilâdlarutiksaujomârpok, supporomârput oᴋarlutiglo: Sôg Nâlekab nuna tamânna, iglolo tamânna taimailiorvigilaukpagit?
9Oᴋartoᴋaromârporlo: Tamânna pivlugo, Nâlegak Gûditik ᴋemasimangmatsuk, atâtagijanginik aularutitsilauktok Egiptenemiut nunanganit, Gûdiblo asingit illalliormagit, tuksiarvigingmagillo, kivgartorlaitalo; tamânna pivlugo Nâlekab tikkitauᴋolaukpait ᴋanoêtomut mattomunga tamât.
10Jârit 20 git nângmatta, Salomob attorlauktangit, iglûk, Nâlekab iglunga, atanniublo iglunga, igloliorlugik;
11(Hiramib Tirusemiut ataningata Salomo tunnitsivigilaukpa tapkungnunga, napârtunik Cederinik, Cipressiniglo, Goldemiglo, taimaluatsiamik sorlo tussulaungmat) tagva Salomob Hirame iglugasaksoarnik 20 ginik nuname Galiliamêtunik tunnitsivigiva.
12Hiramelo aularpok Tirusemit, iglugasaksuit taipkoa takkojartorlugit, Salomob tunnilauktangit tapsomunga; nâmagilaungilaillo.
13Oᴋarporlo: Iglugasaksuit tunnilauktatit uvamnut ᴋanoêlingavat, ᴋatangutîk? Atserarpaillo nunamik Kabulemik, uvlok tamânna tikkidlugo.
14Hiramiblo atannek tillikliutjivigiva Goldemik Talentinik 120 ginik.
15Tamânnalo pitjutauvok Salomob sanajuksat annerilaungmagit, Nâlekab iglunga igloᴋotinelo, Millolo Jerusalemiblo avalungit, Hazorelo, Meggidolo Gaserelo sanajomalaungmagit.
16Farao Egiptenemiut atanningat takpaungarlaukpok, sâlagilaukpaillo Gaser, ikkilugillo ikkomamut, Kanaanemiullo iglugasaksoarnêlauktut toᴋopait; iglugasaksuillo pilliutigilaukpait paniminut, Salomob nullianganut.
17Salomoblo Gaser sanavait, Bethhoronelo atsiktok,
18Baalatelo, Tadmorelo, sunaᴋajuitome nuname.
19Iglugasaksuillo ᴋematulliviojut Salomob pigijangit, iglugasaksuillo ᴋammutingnut illingajut, iglugasaksuillo sorsuktuksanut ablangajunut horsit ᴋângine illingajut, tamaitalo tussugijane sanajomavlugit, Jerusaleme, Libanoneme, atanniovimelo nunangane illûnane.
20Inugasaksuit amiakovinit Amoriterinit. Hethiterinillo Feresiterinillo, Heviterinillo Jebusiterinillo, Israelib ᴋitornganginit pilaungitut;
21Taipkoa amiakolauktut nuname ᴋitorngangit, Israelib ᴋitorngangita nungutsungnarlaungitangit, tapᴋoa Salomob sanajuksautipait uvlok tamânna tikkidlugo.
22Israelible ᴋitornganginit kivgangortitsilaungilak, sorsuktuksaulaungmatta, kivgaulutiglo tapsomunga, angajoᴋâᴋotigilaitalo, sorsuktuksaulutiglo ᴋamutingne, angajoᴋaulutiglo ᴋamuteᴋotinginut, ablangajunullo horsit ᴋângine.
23Aulatsijullo Salomob sullijaksanginik, 550 giolaukput, angajoᴋaulauktut inugasaksoarnut sanalauktunut sullijaksame tamattomane.
24Faraoblo pania nûlune takpaungarpok Davidib iglugasaksoanganit iglominut, Salomob igloliorlauktanganut tamna pivlugo. Taipsomane Millo sanalauriva.
25Salomolo pingasoêrtorlune Jâreme atautseme tunnijivok tunnergutinik ôtaksanik, ᴋujalijutiksaniglo, Altareme sanalauktamine Nâlekamut, isserluanititsilunelo ᴋângane, Nâlekab sângane. Iglolo pijarêrtipa.
26Salomolo umîjorpoktauk umiaksoarmik, Ezon Gebereme, Elothib immarbiub iviggub suvlolingnik sikjanganêtub ᴋanitanganêtome. Edomiterit nunangane.
27Hiramiblo kivgane, umiaktornermik sungiusimajut, immarbiksoarmiglo illitarksijut tillivait umiaksoakut omuna Salomob kivgangit illagilugit.
28Tapᴋoalo tikkiput Ofiremut, aiklerlutiglo tagvangat Goldemik Talentinik 420 ginik, atsilutiglo tamakkoninga atanermut Salomomut.
Currently Selected:
I Atannit 9: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.