I Atannit 5
5
Salomob ilannârêlerninga Hiramemut, oppalungaijainingalo igloliornermut Tempelemik.
1Hiramelo Tirusemiut atanningat tilliklerpok kivgaminik Salomomut; tusarlaurame mingoarlaungmatsuk, atanningortilugo atâtangata inningane. Hiramib Davide ilannâritsainarlaungmago inosermine tamât.
2Salomolo tilliklerpok Hiramemut oᴋautsauᴋolâlo:
3ᴋaujimavotit atâtaga igloliorungnalaungimat iglomik Nâlekab Gûdime atinganut illingajomik, unatadlarnek illumajaujutigijanga pivlugo; Nâlekamut illijauᴋârtinagit allungita attânut.
4MânNâle Nâlekab Gûdima merngoêrsernermik tunnitsivigimavânga avatimne, akkerartortoᴋarungnangimat, agviarutiksaᴋarungnaimallo idluitomik.
5Ahâk, tagva isumavunga iglolioromavlunga iglomik Nâlekab Gûdima atinganut illingajomik, sorlo Nâlegak Oᴋauseᴋalaungmat atâtamnut Davidemut, oᴋalaungmallo: Ernivît, inangêrlutit ingititsomajama iksivautarnut, tapsoma atera iglolioraksariva.
6Taimaimat, perᴋojilerit mânna, Cederinik Libanoneme nakᴋartsijoᴋarᴋovlugo, uvamnut illingajuksanik; kivgaᴋotitit illauᴋovlugit kivgaᴋotimnut. Kivgakotivillo ikkajusiksanginik tunnitsivigijomavagit, tamainik sorlo oᴋarniaravit. ᴋaujimagavit uvaptingnêtoᴋangimat, ᴋejungnik nakᴋartsijungnartunik Zidonemiutitut.
7Hiramele Salomob oᴋausinginik tamakkoninga tusarame, ᴋuviasudlalerpok, oᴋarlunelo: Uvlome Nâlegak nertortaule, tunnijilauktok Davidemut ernermik sillatutsiartomik, inugasaksoarnut taipkonunga atanniôjomik.
8Hiramelo tilliklerpok Salomomut, oᴋautsauᴋovalo: Tusarlaukpunga oᴋautsauᴋojarnik uvamnut, pinniaromavunga pijomajat tamât malliklugo, ᴋejuit Cederit Cipressillo pitjutigillugit.
9Kivgakotima atersautijaksarivait Libanonemit immarbiub kiglinganut; ᴋallingortitauᴋojomavakkalo, âtauᴋojomalugillo immarbikut nunamut taijauᴋoniartarnut uvamnut; ᴋellarudjartauᴋojomavakkalo tagvane, iguptertauᴋolugillo; igvillo aijauᴋoniarpatit. Igville pijomajara pinniaraksarigivat, nerᴋiksaniglo tunnijijuksauvotit kivgakotimnut.
10Taimâk Hiramib Salomo tunnitsivigiva ᴋejungnik, Cederinik Cipressiniglo, pijomajanga tamât malliklugo.
11Salomoble Hirame tunnitsivigiva Korinik 20,000 dinik Weizenik, nerᴋiksanik tapsoma kivganginut. Koriniglo 20 ginik orksumik togarsimajomik. Taimaitunik Salomo tunnijivok Hiramemut jârine tamaine.
12Nâlekablo Salomo sillatunermik tunnitsivigiva, sorlo oᴋarvigilaungmago. Hiramelo Salomolo ullapirsauteᴋalaukpuk ingmingnut, angerᴋatigêklutiglo.
13Salomolo annerosulerpok sanajuksanik Israelitit ilûnnamasianginit, sanajuksallo angutaulaukput 30,000 dit.
14Tillivaillo Libanonemut, takᴋit nelliane 10,000 dit, taimâk takᴋek atausek nâlugo Libanonemelaungmatta, takkiglo nâlugik nunamingnêdlutik. Adoniramelo angajoᴋaulaukpok sanajuksanut tapᴋonunga.
15Salomolo anguteᴋuteᴋalaukpok 70,000 dinik akjarsijunik, 80,000 diniglo ullimarniktunik ᴋakᴋame;
16Salomob angajoᴋaᴋotingit pinagit, aulatsijungortitaumajut sullijaksamik tamattominga, imâgle, 3,300 dit aulatsilauktut inugasaksoarnik sanajunik.
17Atannerlo perᴋojivok ujaraksoarnik angijunik pivianartuniglo pêrsiᴋovlugit ullimartauniartunik, iglub tungavianut illingajuksanik.
18Salomoblo igloliorteᴋotingit, Hiramiblo Igloliorteᴋotingit, Giblimiullo ᴋejuit ullimarlugit avikpait, âᴋkiksoilutiglo ᴋejungnik ujarᴋaniglo igloliornermut iglomik.
Currently Selected:
I Atannit 5: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.