I Atannit 11
11
Salomob nulliangit; kivgartorningalo Gûdingoanik, toᴋungalo.
1Atanniuble Salomob arnat unuktut Judit nunangata asinginit pijut nagligivait, Faraob paniata saniane arnat Moabiterinit, Amoniterinillo, Edomiterinillo, Zidonemiunillo, Hethiterinillo,
2Inuᴋatigêksoarnit taimaitunit Nâlekab oᴋautigilauktanginit: Aiviginiarasigik, tikkitailitissigiglo illipsingnut; nellonangitomik omatise sangutiniarpait, Gûdingoakotimingnut. Taimaitut Salomob ungagivait naglingnermut.
3Nulliakalaukporlo 700 dinik atannît paninginik, Pannervgaᴋalarmelo 300 dinik. Nulliangitalo omatinga sangutipât.
4Salomolo inutuᴋaulermat nulliakotingita omatinga sangutipât Gûdingoanut, omatingalo illuêngardlune illingalaungilak Nâlekamut Gûdiminut, sorlo atâtangata Davidib omatinga pilaungmat.
5Taimâk Salomo agvertarpok Astorete, Zidonemiut Gûdingat, Milkomelo Amoniterit makkojungnartoᴋotingat malliklugik.
6Salomoblo Nâlekab ᴋuviagingitanga pinniarpa, mallingnanelo illuêngardlune Nâlekamik, sorlo atâtanga Davide pinniarlaungmat.
7Taipsomane Salomob poktojok sanavâ Kamos Moabiterit makkojungnartokotingat pivlugo, ᴋakᴋame Jerusalemib nellânetome, Molechelo Amoniterit makkojungnartoᴋotingat pivlugo.
8Taimailiorlaukpok Salomo nulliane takkorngartanit pijut ilûnnaita pivlugit, Gûdingoaᴋotimingnut isserluanititsijut, tunnijijullo tunnergutinik.
9Tagva Nâlekab Salomo ningarilerpa, omatinga Nâlekamik Israelib Gûdinganik allaingmat, maggoêrtorlune Sakᴋerlauktomik tapsomunga,
10Perᴋojilauktomiglo tapsomunga, Gûdib asingit malliklugit agvertartuksaungimat; mallilaungilaille perᴋojaunine Nâlekamut.
11Tamânna pivlugo Nâlegak oᴋarpok Salomomut: Taimailiortoᴋalaungmat illingnut, angernera, perᴋojakkalo, perᴋolauktakka illingnut, mallilaunginangne, atanniovik aksarnigarijomagivara illingnit, tunnijomalugolo kivgakotingnut.
12Inôtillutille taimailioromalungilanga atâtait Davide pivlugo; ernivîlle agganginit aksarnigarijomavara.
13Atanniovigle illuêngardlune aksarnigarijomangilara, kinguvarêt atautsit tunnijomavakka ernernut, Davide kivgara pivlugo, Jerusalemelo pivlugit annerilauktakka.
14Nâlekablo Salomo akkerartorteᴋartipa Hadademik Edomiomik, atanniub Edomeme kinguvanganit pijomik.
15Davidele Edomemêlauktillugo Joabelo sorsuktuksaksoaᴋatigêt angajoᴋangat takpaungarame ullimarsimajut illijartoromavlugit, angutaujut Edomeme ilûnnamasiatik ullimarpait.
16Joabe takᴋit 6 it nâlugit Edomemêtuarame, Israelitillo illuêngardlutik, nungutsikârtinane angutaujunik ilûnnainik Edomeme.
17Tagva Hadade ᴋemâvok illagillugolo Edomiut angutingita, atatangata kivgangita illangit, Egiptenemut tikkitsomavlutik. Hadadele nukapiangolaukpok sulle.
18Aularpullo Midianemit, tikkilutiglo Paranemut, neksarpullo inungnik Paranemit, tikkilutiglo Egiptenemut Faraomut Egiptenemiut atanninganut. Tapsoma tunnitsivigiva iglomik, inugutiksamiglo, nunamiglo.
19Hadadelo napᴋoaneksivok angijomik Faraome, nulliamiglo tunnitsivigiva, nulliame Tachpenesib nukkanganik.
20Tachpenesiblo nukâ ernivok tapsomunga erninganik Genubathemik; Tachpenesiblo inugoiva Faraub iglungane; Genubathelo Faraub iglunganetsainarlaukpok, atanniub erningita akkorngane.
21Hadadelo Egipteneme tusarame, Davide atâtagijangit illagillugit sinnisimangmat, Joabelo sorsuktuksaksoangita angajoᴋangat toᴋungmat, Faraomut oᴋarpok: Aularᴋolaunga, nunakotimnut aimiᴋovlunga.
22Faraub oᴋautiva: Sunamik kingumaklerᴋît uvamne nunakotingnut nûtsomagavit? Tamna oᴋarpok: kingumaklerlungilanga sunamik, aularᴋolaungale.
23Gûdiblo akkerartorteᴋartipa sulle asianik, Resonemik, Eljadab erninganik, angajoᴋaminit Hadadeseremit Zobamiut atanninganit ᴋemâlauktomik.
24Angutiniglo katersoivok ingminut, angajoᴋaulaukporlo sorsuktuksat illanginut, Davide taipkoninga (Siriamiunik) salaᴋarlauktillugo; aularpullo Damaskusemut, nunagivâllo ataniôtilutiglo Damaskuseme.
25Tamnalo ᴋanoêtoᴋartitsinine tappilugo akkerartortêolaukpok Israelitinut Salomob inosingata nâninga tikkidlugo; atanniolaukporlo Siriamiunut.
26Jerobeamelotauk Nebatib erninga Efratemiok Zaredamit, Salomob kivganga, (anânangalo Zerugaulaukpok uigarnek) tamna aggangminik ᴋongmuartitsivok atannermut akkerartorlune.
27Tamânnalo pitjutauvok aggane ᴋongmuartimagit atanek akkerartorlugo: Salomob Millo sanalaungmago, kingek Davidib atâtame iglugasaksoangane simmikpa.
28Jerobeamelo angutaulaukpok erkinaitok. Salomoblo inosuktok takkogamiuk sullidlarmat, aulatsijungortipa sanajuksanik Josefib iglunganit pijunik ilûnnainik.
29Pijoᴋalaukporlo nelliutome taipsomane, Jerobeame aulartillugo Jerusalemit, Ahiab Silomiub nellautaijub naipipa apᴋosinerme, ulliksoalijarporlo nutâmaringmik, tapᴋoalo maggûk inutolaukpuk tagvane.
30Ahiablo ullik nutâk attortane tiguva alliktorlâlo, allingningit 12 ôlivlugit,
31Oᴋarlunelo Jerobiamut: Alliktut tallimaujortut tigukit illingnut. Imâk Nâlegak Israelib Gûdingat oᴋarmat: Ahâk atanniovik aksarnigarijomavara Salomob agganginit, kinguvarêllo tallimaujortut tunnijomavakka illingnut.
32Kinguvarêt atautsit pigênaraksarivait kivgara Davide pivlugo, iglugasaksuillo Jerusalem pivlugit, annerilauktakka Israelib kinguvarênginit ilûnnainit.
33Tamânna pivlugo allarlaungmanga, Astarote Zidonemiut Gûdingoangat, Kamoselo, Moabiterit Gûdingoangat, Milkomelo, Amoniterit Gûdingoangat tuksiarvigilaungmagit; agvertarlaungimattalo apᴋosinimne, pinniaratiglo ᴋuviagijamnik, perᴋojamnik, idluarijamniglo Davidetut atâtangatut.
34Atanioviuble illûnanga tigujomangilara agganginit, atanniotsainarkojomavara inosinga nâlugo, Davide kivgara annerilauktara pivlugo, perᴋojamnik idluarijamniglo mallilauktok.
35Erningata agganginit ataniovik tigujomavara, illingnullo kinguvarêt tallimaujortut,
36Erninganullo kinguvarêt atautsit tunnijomavakka, Davide kivgara ᴋaumauteᴋatsainarᴋovlugo sâmne iglugasaksoarne Jerusaleme annerilauktamne atera pitilugo tagvunga.
37Igvillo tigujomavagit mânna, atanniotilerᴋovlutit tamainut omativit tussugijanginut, atanniojuksaulutillo Israelitinut.
38Nâletsiarniaruvillo mânna tamainik perᴋoniartamnik illingnut, agvertarniaruvillo apᴋosinimne, pinniarlutillo ᴋuviagijamnik, idluarijakka perᴋojakkalo malliklugit piguvit, sorlo kivgara Davide pinniarlaungmat; tagva aiparijomavagit, iglolioromavlutillo soᴋosijuitomik, sorlo Davide igloliorlaurapᴋo, tunnitsivigijomavlutillo Israelemik;
39Davidiblo kinguvângit nikkanarsartitsomavakka tamânna pivlugo, soraijuitomigleungitok.
40Salomoble pijugakpa. Tagva Jerobeame parngnailerpok ᴋemâlunelo Egiptenemut, Sisakemut, Egiptenemiut ataninganut. Egiptenemêtuarporlo Salomob toᴋunga tikkilugo.
41Unipᴋautsille tamakkoa asingit sulle Salomo pivlugo, pinniarlauktangit tamaita, ilisimaningalo, aglaksimavut Salomob pinniarningita aglangine.
42Salomoblo atannioningata Jerusaleme Israelitit ilûnnamasianginut, nelliuninga jâriovut 40 git.
43Salomolo sinnisilerpok ailune atatagijaminut, illijartortaulunelo atâtame Davidib iglugasaksoangine. Erningalo Rehabeame innangêrlugo atanningorpok.
Currently Selected:
I Atannit 11: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.