Josue 3
3
Ballasiwen dagiti Israelita ti Jordan
1Kabigatanna, nasapa a bimmangon ni Josue ken dagiti amin nga Israelita. Pimmanawda idiay Settim ket nagturongda idiay Jordan. Nagkampoda iti igid ti karayan sakbay ti ibaballasiwda. 2Kalpasan ti tallo nga aldaw, sinursor dagiti pangulo ti kampo 3ket imbagada kadagiti tattao: “Inton makitayo nga aw-awiten dagiti papadi ti Lakasa ti Tulag ti Apo a Diosyo, agrubbuatkayon ket surotenyo ida. 4Ipakaammoda no sadino ti pagnaanyo, ta dikay pay nagnagna ditoy. Ngem dikay umas-asideg iti Lakasa ti Tulag. Paunaenyo iti agarup kagudua a kilometro.”
5Imbaga met ni Josue kadagiti tattao, “Pasantoenyo ti bagiyo ta inton bigat, adunto ti makitayo a naindaklan a banag nga aramiden ti Apo.” 6Kalpasanna, binilinna dagiti papadi a bagkatenda ti Lakasa ti Tulag ket umun-unada ngem dagiti tattao. Tinungpalda ti imbagana.
7Kinuna ni Yahweh ken ni Josue, “Ita nga aldaw, itan-okka iti imatang dagiti Israelita tapno maammoanda nga addaak kenka a kas iti kaaddak idi ken ni Moises. 8Bilinem dagiti papadi a mangaw-awit iti Lakasa ti Tulag nga apaman a makagtengda iti igid ti karayan, tumapogda ket agsardengda sadiay.”
9Imbaga pay ni Josue kadagiti tattao, “Umayyo denggen ti sao ti Apo a Diosyo. 10Ita nga aldaw, maammoanyo nga adda kadakayo ti sibibiag a Dios ket iti idadarupyo, paksiatennanto dagiti Cananeo, Heteo, Heveo, Perezeo, Gergeseo, Amorreo ken dagiti Jebuseo. 11Umun-una a bumallasiw ngem dakayo ti Lakasa ti Tulag ti Apo ti amin a daga. 12Pumilikayo iti sangapulo ket dua a lallaki, maysa iti tunggal tribu ti Israel. 13Inton tumapog dagiti papadi a mangaw-awit iti Lakasa ti Tulag ti Apo, ti Apo ti amin a daga, agsardengto nga agayus ti Jordan, ket agpundonto iti maysa a disso ti danum nga aggapu iti surong.” 14-15Panagani idi ket dimmakkel ti karayan. Pimmanaw ngarud dagiti tattao iti nagkampoanda tapno ballasiwenda ti Jordan. Immun-una dagiti papadi a siaawit iti Lakasa ti Tulag. Apaman a timmapog dagiti papadi iti karayan, 16nagsardeng a nagayus ti karayan ket nagpundo ti danum iti surong iti siudad ti Adam nga asideg iti Zaretan. Simmardeng a namimpinsan ti panagpababa ti danum nga agturong iti Natay a Baybay, ket bimmallasiw dagiti tattao iti batog ti Jerico. 17Bayat ti pannagnada iti namaga a daga, nagtalinaed a sitatakder dagiti papadi a mangaw-awit iti Lakasa ti Tulag ni Yahweh iti tengnga ti Jordan agingga a nakaballasiwda amin.
Currently Selected:
Josue 3: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society