Taga-Galacia 3
3
Ti Linteg wenno ti Pammati
1Nagnengnengkayo ketdin a taga-Galacia!#1 Wenno Agtignayda a kasla napukawda ti nasimbeng a panunotda. Siasino aya ti nangallilaw kadakayo? Nalawag la ngaruden a naipakita kadakayo a nailansa ni Jesu-Cristo iti krus! 2Saludsodek man daytoy: Inawatyo kadi ti Espiritu ti Dios babaen iti panangtungpalyo iti ipaannurot ti Linteg wenno babaen iti panagdengngeg ken panamatiyo iti ebanghelio? 3Nagmaagkayon! Nangrugikay iti baro a biagyo babaen iti Espiritu ti Dios. Ita, kayatyo kadin ti agpatingga babaen iti nainlasagan a wagas? 4Pulos kadi nga awan serserbi dagiti amin a padasyo? Kunak nga adda! 5Ited ti Dios ti Espirituna ken agaramid kadagiti milagro kadakayo. Aramidenna kadi dagitoy gapu ta tungtungpalenyo ti ipaannurot ti Linteg wenno gapu ta dumngeg ken mamatikayo iti ebanghelio?
6Ket#Gen. 15:6; Rom. 4:3. ita, masapul nga amirisentayo ti padas ni Abraham. Kuna ti Nasantoan a Surat, “Namati ni Abraham iti Dios ket gapu iti pammatina, imbilang ti Dios a nalinteg.” 7Ngarud,#Rom. 4:16. masapul a bigbigenyo a dagiti addaan pammati isuda ti napaypayso a kaputotan ni Abraham. 8Impakpakauna#Gen. 12:3. ti Nasantoan a Surat a palintegen ti Dios dagiti Hentil babaen iti pammati. Ket naipakaammo ti Naimbag a Damag ken ni Abraham, “Sikanto ti aramaten ti Dios iti panangbendisionna iti amin a sangkataoan.” 9Namati ni Abraham ket nabendisionan. Mabendisionan met ngarud dagiti amin a mamati a kas kenkuana.
10Nailunod#Deut. 27:26 (LXX). dagiti mangipagarup nga awatento ida ti Dios gapu iti panagtungpalda iti Linteg. Ta kuna ti Nasantoan a Surat, “Mailunod ti siasinoman a saan nga agtungpal iti amin a naisurat iti libro ti Linteg!” 11Ita,#Hab. 2:4. nalawag nga awan ti agbalin a nalinteg iti sangoanan ti Dios babaen iti Linteg. Ta kuna ti Nasantoan a Surat, “Agbiagto ti pinalinteg ti Dios babaen iti pammati.”#11 Agbiagto ti…iti pammati; wenno Agbiagto babaen iti pammati ti pinalinteg ti Dios. 12Ngem#Lev. 18:5. saan nga agbatay ti Linteg iti pammati, no di ket kas kuna ti Nasantoan a Surat, “Agbiagto babaen iti Linteg ti siasinoman a mangannurot iti amin nga ipaannong ti Linteg.”
13Ngem#Deut. 21:23. idi nagsagaba ni Cristo gapu kadatayo, nawayawayaannatayo iti panangukom ti Linteg. Kas kuna ti Nasantoan a Surat, “Naukom ti siasinoman a maibitin iti kayo.” 14Inaramid ni Cristo daytoy tapno maited kadagiti Hentil ti bendision nga inkari ti Dios ken ni Abraham babaen ken ni Cristo Jesus, ket awatentayo koma ti Espiritu nga inkari ti Dios babaen iti pammati.
Ti Linteg ken ti Kari
15Kakabsat iti pammati, aramatek ti inaldaw a pangarigan: No agtulag ti dua a tao ket firmaanda ti pagtulaganda, awan ti makabalin a mangwaswas wenno mangbalbaliw iti nailanad. 16Ita, adda inkari ti Dios ken ni Abraham ken iti kaputotanna. Saan a kuna ti kari, “ken kadagiti kaputotam,” kayatna a sawen, adu a tattao; ngem kunana, “ken iti kaputotam,” kayatna a sawen, maymaysa laeng a tao nga isu ni Cristo. 17Daytoy#Ex. 12:40. ti kayatko a sawen: Nakitulag ti Dios ket inkarina a tungpalen dayta a tulag. Ti Linteg a naited kalpasan ti 430 a tawen#17 ti tiempo manipud pannakitulag ti Dios ken ni Abraham, agingga idi maipaulog ti Linteg idiay Bantay Sinai segun ti Septuahinto Exodo 12:40. dina mawaswas dayta a tulag ket dina met maukas ti kari ti Dios. 18No#Rom. 4:14. agbatay iti Linteg ti sagut ti Dios, saanen a maibatay iti karina. Nupay kasta, inted ti Dios ti sagutna ken ni Abraham agsipud ta inkarina kenkuana.
19Ania ngarud ti panggep ti Linteg? Naited tapno ipakitana no ania ti panagsalungasing. Nairanta nga agpatingga inton umay ti kaputotan ni Abraham a nakaitedan daytoy a kari. Dagiti angheles ti nangted iti Linteg babaen iti maysa a tao a kas mangibabaet. 20Ngem saan a masapul ti mangibabaet no maymaysa laeng ti makitulag; ket maymaysa ti Dios.#20 ket maymaysa ti Dios; wenno ket is-isu ti Dios nga agtignay.
Ti Panggep ti Linteg
21Kayat kadi a sawen daytoy a ti Linteg maibusor kadagiti karkari ti Dios? Saan! Ta no adda koma linteg a naituyang a mangted iti biag, mapalinteg ngarud ti tunggal maysa iti sangoanan ti Dios babaen iti panangtungpalna iti dayta a linteg. 22Ngem kuna ti Nasantoan a Surat nga adda ti entero a lubong iti babaen iti pannakabalin ti basol tapno maited kadagiti mamati ti naikari a sagut babaen ti pammati ken ni Jesu-Cristo.
23Ngem sakbay nga immay ti tiempo a mabalin dagiti tattao ti mamati, kaslatayo balud nga impupok ti Linteg, agingga a maiparangarang daytoy a pammati. 24Ngarud, inaywanannatayo ti Linteg agingga iti yaay ni Cristo tapno agbalintayo a nalinteg iti sangoanan ti Dios babaen iti pammati. 25Ita ta panawenen a mamati dagiti tattao, agpatingga metten ti panangaywan ti Linteg kadatayo.
26Annaknakayo amin ti Dios babaen iti pammati gapu iti pannakipagmaymaysayo ken ni Cristo Jesus. 27Nabuniagankayo#27 Nabuniagankayo; wenno Nabautisarankayo. iti pannakipagmaymaysayo ken ni Cristo ket iti kasta, inkawesyo a mismo ni Cristo. 28Ngarud, awan ti pagdumaan ti Judio ken Hentil, ti tagabu ken ti siwawaya, ti lalaki ken ti babai: maymaysakayo amin ken ni Cristo Jesus. 29No#Rom. 4:13. taonakayo ni Cristo, kaputotannakayo ngarud ni Abraham, ket awatenyonto ti inkari ti Dios.
Currently Selected:
Taga-Galacia 3: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society