1 Cronicas 28
28
Dagiti Bilin ni David iti Pannakabangon ti Templo
1Pinaayaban ni David dagiti amin nga ofisiales iti Israel. Iti kasta, naguummong idiay Jerusalem dagiti ofisiales ti tribu, dagiti ofisiales a mangimaton iti trabaho iti pagarian, dagiti papangulo dagiti kapuonan, dagiti agaywan kadagiti sanikua ken animal ti ari ken dagiti annakna. Dimmar-ay met dagiti amin nga ofisiales iti palasio, dagiti mamaingel a mannakigubat ken dagiti mabigbigbig a tattao.
2Timmakder#2 Sam. 7:1-16; 1 Cron. 17:1-14. ni Ari David iti sangoananda ket kinunana, “Kakabsatko ken kakailiak, denggendak. Panggepko idi a bangonen ti balay a pakaidulinan ti Lakasa ti Tulag, ti pagbatayan ti Apo a Diostayo. Nangisaganaak kadagiti masapul a pangbangon iti templo a pammadayaw iti Dios. 3Ngem pinaritannak a mangbangon iti templo agsipud ta maysaak a mannakigubat ket adu ti pinapatayko. 4Pinilinak ti Apo a Dios ti Israel agraman dagiti kaputotak a mangituray iti Israel iti agnanayon. Pinilina ti tribu ti Juda a pagtaudan ti mangipangulo, ket iti tribu ti Juda, pinilina ti familia ni amak. Iti dayta a familia, naragsakan iti panangpilina kaniak nga agari iti entero nga Israel. 5Pinaraburannak iti adu nga annak, ket kadagiti amin nga annakko, pinilina ni Solomon nga agturay iti Israel a pagarian ti Apo.
6“Kinuna ti Apo kaniak, ‘Ninto Solomon nga anakmo ti mangbangon iti Templok, ta isu ti pinilik nga anakko, ket siakto ti amana. 7Taginayonekto ti pagarianna no la ket itultuloyna a tungpalen a siaannad dagiti amin a linlinteg ken bilbilinko kas iti ar-aramidenna ita.’
8“Ita ngarud, dakayo a tattaok, iti imatang ti Diostayo ken iti daytoy a gimong ti amin nga Israelita a tattao ti Apo, ibilinko kadakayo nga agtulnogkayo a siaannad iti amin nga imbilin ti Apo a Diostayo kadatayo tapno agtultuloy a tagikuaenyo daytoy napintas a daga ket ipatawidyonto met kadagiti sumarsaruno a kaputotan iti agnanayon.
9“Ket sika, Solomon nga anakko, ibilinko kenka a bigbigem ti Diosko. Agserbika a siaayat kenkuana ken iti amin a pusom, ta ammona amin ti pampanunoten ken tartarigagayantayo. No mapanka kenkuana, awatennaka. Ngem no tallikudam, laksidennakanto iti agnanayon. 10Laglagipem a pinilinaka ti Apo a mangbangon iti nasantoan a templona. Ita, aramidem ket ipamaysam nga aramiden.”
11Inted ni David ken ni Solomon ti plano dagiti amin a pasdek ti Templo, dagiti kuarto a pagidulinan, dagiti dadduma a kuartona ken ti Kasantoan a Disso a pakapakawanan dagiti basol. 12Intedna pay ti planona iti pannakaaramid dagiti paraangan ken dagiti kuarto iti lawlawna ken dagiti kuarto a pagidulinan kadagiti alikamen ti Templo ken dagiti kuarto a pagidulinan kadagiti sagsagut a naidaton ken ni Yahweh. 13Intedna pay ti plano ti pannakaorganisar dagiti papadi ken Levita iti panangannongda kadagiti rebbengenda, iti panagtrabahoda iti Templo, ken iti panangaywanda kadagiti amin nga alikamen ti Templo. 14Imbilinna no kasano ti kaadu ti pirak ken balitok a mausar iti pannakaaramid dagiti alikamen, 15iti tunggal pagsilawan ken kandelero, 16kadagiti lamisaan a pirak, iti tunggal lamisaan a balitok a pakaiparabawan dagiti tinapay a naidaton iti Dios. 17Imbilinna no kasano ti kaadu ti puro a balitok a maaramid a tenedor, malukong ken burnay; no kasano ti kaadu ti pirak ken balitok a maaramat dagiti lunglongan, ken 18no kasano ti kaadu ti puro a balitok a mausar iti pannakaaramid ti altar a pakapuoran ti insenso ken ti lugan a pakigubat a pagyanan dagiti kerubin a mangyukrad kadagiti payakda iti ngatoen ti Lakasa ti Tulag ni Yahweh. 19Kinuna ni Ari David, “Nailanad amin dagitoy iti plano a naisurat kas mayannurot iti bilin nga inted ti Apo kaniak nga ipatungpalko.”
20Kinuna ni David ken ni Solomon nga anakna, “Pakirdem ti nakemmo ket dika maupay. Rugiamon ti trabaho ket dimo ipalubos nga adda manglapped kenka. Tulongannakanto ti Apo a Dios a pagserserbiak. Dinakanto baybay-an, ket tarabayennakanto agingga a malpasmo ti trabaho iti Templona. 21Naitudingen dagiti annongen dagiti papadi ken Levita nga aramidenda iti Templo. Sigagagar a tumulong kenka dagiti nalaing a trabahador, ket mabalinmo a bilinen dagiti amin a tattao ken dagiti papanguloda.”
Currently Selected:
1 Cronicas 28: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society