Tito 1
1
Apóstol Pablo napakunqan
1Noqa Pablo, Teyta Diospa sirwiqnin y Jesucristupa apostolnin karmi, Teyta Dios akrashqan kaqkunata willakïninta yachëkätsï Jesucristuman markäkur pë munashqannö kawayänanpaq. 2Teyta Dios kë patsata manaraq kamar änikushqannöllam pë akranqan kaqkunaqa gloriachö wiñë kawëta taririyanqa. Diosqa manam ulikuntsu, tsëpa rantinqa änikushqanta cumplinmi. 3Tiempu chämuptinnam willakïninta willakuqkunawan salvamaqnintsik Teyta Dios änikushqanta cumplikan. Tsënö cumplirmi noqatapis churamashqa willakunäpaq.
4Tito,#2Cor. 8.23; Gál. 2.3; 2Tim. 4.10. noqa markäkushqänö Jesucristuman markäkurmi kuyë tsurïnö këkanki. Yayantsik Teyta Dios y salvamaqnintsik Jesucristo ankupäshurniki alli kawanëkipaq yanapëkulläshï.
Jesucristupa willakuqninkuna imanö kayänanpaq ninqan
5Creta islapita ewkamurmi nirqaq arreglëpaqraq kaqkunata ruranëkipaq y markan markan ëwar wawqikuna y panikuna ëllukäyashqanchö anciänukunata churanëkipaq. 6Anciänu kananpaqqa pïmëpitapis alli rikashqam kayänan y juk warmiyuqllam kayänan. Tsurinkunapis Teyta Diosman markäkur allillatam rurayänan y mamäninta tëtanta cäsukuqmi kayänan. 7Teyta Diosta sirwiq këkarqa y wawqikunata panikunata rikaq këkarqa anciänukuna kayätsun pïmëpitapis mana penqapashqa, mana nuna tukuq, imallapitapis mana piñakuq, mana machakuq, mana pelyakuq y imatapis mana chaskipakuq. 8Tsëpa rantinqa kayätsun posadatsikuq, allillata ruraq, alli yarpëyuq, Teyta Dios munashqannö kawaq y tantiyëkur imatapis ruraq. 9Jesucristupa willakïninta yachakuyashqannölla alli yachatsikuq kayätsun. Tsënöpam Teyta Dios munashqannö kawakuyänanpaq wawqikunata y panikunata kallpatsayanqa y llutan yachatsikuqkunatapis llutanta mana yachatsiyänanpaq shumaq käyitsiyanqa.#1Tim. 3.2-7.
Llutan yachatsikuqkunata mana chaskipäyänanpaq käyitsinqan
10Atskaqmi llutan yachatsikuqkuna purikäyan wawqikunata y panikunata engañar. Pëkunaqa mana käyikurmi yachëkätsiyan Israel nunakunanö cuerpunchö señalakuyänanpaq. 11Wakin wawqikunata y panikunatam wayinpi tsënö engañayashqa. Pëkunaqa sakyapäyänan rëkurllam imatapis mana allikunata yachëkätsiyan. Tsënö mana allita yachatsiyänanta michäkï.
12Tsënö kayaptinmi Creta nunapis kënö qellqarqan: <<Creta nunakunaqa ulim, feyu animal cuentam, cebaq kuchinö tragaqmi y qelam kayan>>. 13Rasun kaqllatam tsë nuna tsënö qellqarqan. Tsëmi yachatsikuqkunata shumaq käyitsinki Teyta Dios munashqannö kawayänanpaq.
14Tsënölla käyitsinki Israel nunakunapa mana alli yachatsikïninkunata mana chaskiyänanpaq. Tsë mana allita yachatsikuqkunaqa Teyta Diospa palabranta mana cäsukurmi kikinkunapa yarpëninllata yachatsikuyan. 15Llutanta yarpaq y mana cäsukuq karmi imapis mana allilla kashqanta yarpäyan. Tsënö yarpäyaptinpis Jesucristupa willakïninta chaskikuqkunaqa Teyta Dios kamashqankuna llapanpis alli kashqantam käyikuyan.
16Tsë mana allikunata yachatsikuqkunaqa kënömi niyan: <<Noqakunaqa Teyta Dios munashqannömi kawëkäyä>>. Tsënö niyaptinpis mana alli rurëninkunata rikarmi nunakuna käyiyan Teyta Diosta mana cäsukïkäyashqanta. Pëkunaqa Diosta mana cäsukurmi nuna mayinta chikir ni ima allita rurayantsu.
Currently Selected:
Tito 1: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.