1 Timoteo 6
6
Patronninta esclävukuna respetayänanpaq käyitsinqan
1Esclävukuna patronninta shumaq respetayätsun. Tsënöpam Teyta Diosta ni willakïninta pipis manakaqpaq churayanqatsu. 2Patronnin Diosman markäkuq kaptinpis <<markäkuq mayïmi>> nir ama yarpäyätsuntsu mana respetayänanpaq, tsëpa rantin markäkuq mayin kaptin masraq respetayätsun. Esclävukuna tsënö kayänanpaq shumaq yachatsi.
Tarinqantsikllawan kushishqa kawanantsikpaq käyitsikunqan
3Pipis Señornintsik Jesucristupa alli willakïninta yachatsinanpa rantin y Teyta Dios munashqannö kawanantsikpaq yachatsinanpa rantin llutanta yachatsirqa 4yachaq tukunmi. Tsë nunakunaqa imatapis mana musyarmi manakaq yachatsikïkunapita liryakïkäyan. Tsëkunata chaskirmi nunakuna chikinakur, liryakur, qayapänakur y llakitsinakur kawayan. 5Llutan yachatsikuqkunaqa kikinkunapurapis manakaqkunallapitam liryakuyan. Llutan yarpëkunaman peqan churakashqa kaptinmi Jesucristupa willakïnin ima kashqantapis käyiyantsu. Tsënöllam yarpäyan Diosta sirwir rïcu tikrayänanpaq kashqanta. [Pëkunawanqa ama juntakïtsu.]
6Tarishqantsikllawan kushikur y Teyta Dios munashqannö kawarqa rïcu nunapitapis mas allim kawantsik. 7Jinëllam yurikurquntsik. Y wanukurpis jinëllam ewkushun.#Job 1.21; Sal. 49.17; Ecl. 5.15. 8Tsënö kaptin mikunantsikpaq y yakakunantsikpaq kapamashqaqa kushishqa kawakushun.
9Rïcu këta munaqkunaqa toqllaman jeqaqnömi llutan rurëkunaman mëtikur tsëpita yarqïta puëdiyannatsu. Tsënö kar alläpam jipayan. 10Qellëllapaq ambiciösu kaqkunaqa tukïläya jutsatam rurayan.#Heb. 13.5. Wakin wawqikuna y panikunapis rïcu këpaq yarpakacharmi Jesucristuman markäkuyannatsu. Tsëpitam alläpa nanëkunawan jipayan.
Teyta Dios munanqannö kawananpaq käyitsinqan
11Timoteo, Teyta Diosta sirwiq këkarqa ama qellëllapaq këtsu. Tsëpa rantinqa Teyta Dios munashqannö imëpis kawakï, pëman markäkï, nuna mayikita ankupë, pacienciakï y pitapis alli shimikipa parlapë.
12Guërrachö soldädukuna mana utikashpa pelyayashqannö qampis mana utinashpa Jesucristuman markäkï. Wiñë kawëta chaskikunëkipaq Teyta Dios qayëkäshuptikiqa imëkanöpapis pë munashqannö kawë. Tsëta käyikurmi Jesucristuman markäkushqëkita wawqikunapa y panikunapa nöpanchö willakurqunki.
13Musyankim Poncio Pilatupa nöpanchö Jesucristo mana mantsakushpa willakushqanta.#Juan 18.37. Tsëmi Jesucristupa shutinchö y llapantapis kamaq Teyta Diospa shutinchö qamta kënö niq: 14Señornintsik Jesucristo kutimunanyaq kë cartachö nishqaqkunata llapanta mana qonqëta cumpli. 15Tiempu chämuptinmi Jesucristuta kë patsaman Teyta Dios kachamunqa. Teyta Diosqa llapan reykunapa y mandakuqkunapa mandakuqninmi. 16Pëqa japallanmi wiñëpa kawaq këkan y alläpa chipapäkïkaqchömi këkanpis.#Sal. 104.2. Pëta pipis manam rikashqatsu ni rikëtapis manam puëdintsu. ¡Llapan nunakuna imëyaqpis pëta alabëkuyätsun! ¡Pëpa makinchö llapan nunakuna imëyaqpis kayätsun! Tsënö katsun.
17Rïcu kaq wawqikunata y panikunata ninki mana nuna tukuyänanpaq y riquëzankunaman mana markäkuyänanpaq. Riquëzakunaqa ushakaqllam këkan. Riquëzankunaman markäkuyänanpa rantin [wiñëpa kawaq] Teyta Diosllaman markäkuyätsun. Pëmi imëkakuna jananchö wätamantsik kushishqa kawanantsikpaq.
18Jina rïcukunata yachatsi allikunata imëpis rurayänanpaq y wakin nunakunata riquëzankunawan yanapayänanpaq. 19Teyta Diosman markäkur allikunata rurarqa alli kawëtam tariyanqa. Tsënöparan wiñë kawëta tariyanqa.
Cartapa ushanan
20Timoteo, willakïninta willakunëkipaq Teyta Dios churashushqa këkäshuptikiqa llapan nishqaqkunata shumaq cumpli. Llutan yachatsikuqkunataqa ama cäsïtsu. Tsë nunakunaqa yachaq kayashqanta yarparpis yachaq tukurmi manakaqkunallata yachatsikuyan. 21Wakinqa llutan yachatsikuqkunata chaskirmi Teyta Diosman markäkïkäyashqanpita witikuriyashqa.
Qamta y qamwan këkaqkunata Teyta Dios imëpis yanapëkuyäshï. [Tsënö katsun.]
Currently Selected:
1 Timoteo 6: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.