1 Timoteo 5
5
Markäkuq mayinkunata respetananpaq käyitsinqan
1Awkinkunata ama qayapëtsu. Tsëpa rantinqa tëtëkitanö respetar alli shimikillapa käyitsi. Jövinkunatapis wawqikitanö alli shimikillapa käyitsi. 2Chakwankunatapis mamëkitanö respetar alli shimikillapa käyitsi. Tsënölla shipashkunatapis panikitanö respetë.
Pajukunata yanapananpaq käyitsinqan
3Castannaq pajukunata imallawanpis yanapayë. 4Sitsun mëqan pajupapis wawankuna o willkankuna kan, pëkuna yanapayätsun. Kuyar wätayashqanta ama qonqayätsuntsu. Tsënö yanapayaptinmi Teyta Dios kushikun.
5Castannaq pajukunaqa Teyta Diosman markäkurmi paqaspa y junaqpa mañakur kawakuyan. 6Wakin kaq pajukunaqa munashqannö purikurmi wanushqa cuenta këkäyan.
7Castanchö paju kaptinqa yanapayänanpaq wawqikunata y panikunata yachatsinki. Yanapayaptinqa pipis manam penqapäyanqatsu. 8Mamäninta, awilanta y wayinchö täraqkunata mana yanapaptinqa Teyta Diosman markäkushqanpis manakaqllapaqmi këkan. Teyta Diosta mana cäsukuq nunapitapis mas peormi këkan.
9Pajukunapa shutinkunata listaman qellqë joqta chunka (60) watayuq kayaptinraq. Pëkuna kayätsun juk nunallawan juntakashqa kaqkuna, 10allita rurayashqanpita shumaq respetashqa kaqkuna, wamrankunata shumaq rikashqa kaqkuna, wayinman chaqkunata posadakatsiq kaqkuna, Diosman markäkuqkunata alli shonqunwan yanapashqa kaqkuna, waktsakunata ankupaq kaqkuna y allillata rurashqa kaqkunalla.
11Ama qellqankitsu manaraq joqta chunka (60) watayuq kayaptinqa. Pëkunaqa mana yapapakushpa Jesucristullatana sirwiyänanpaq äniyanqanta qonqakïkurmi yapë qowayuq këta munayan. 12Tsënöpam änikushqanta mana cumplir jutsayuq tikrayan. 13Qelankuna waqaptinmi imapis rurëninkunata jaqirir wayin wayin purikuyan. Tsënöllam nunapa wasan rimar y imëkamanpis mëtikur manakaqkunata parlar purikuyan.
14Tsënö mana kayänanpaq shipashllaraq pajukunaqa yapë juntakäyätsun, wawankuna kayäputsun y wayinkunachö imapis rurëninkunata rurayätsun. Tsënö kawayaptinqa contrantsik kaqkuna manam penqapämäshuntsu. 15Wakin pajukunaqa Jesucristuman markäkïkäyashqanta jaqirirmi Satanás munashqannöna kawakuyan.
16Mëqan [wawqipapis o] mëqan panipapis castanchö paju kaptin pëkuna rikäyätsun. Tsënöpam wawqikuna y panikuna ëlluyashqan tinkunqa castannaq pajukunata yanapayänanpaq.
Anciänukuna shumaq rikashqa kayänanpaq käyitsinqan
17 Anciänukuna Diospa willakïninta willakuyaptin y yachatsiyaptin shumaq respetar alli pagayätsun. Tsënölla llapanpis anciänukunata alli mandayaptin respetar pagayätsun. 18Teyta Diospa palabranpis kënömi nin: <<Ërachö trïguta jalutsir töruman ama bozalnin churayankitsu>>.#Deut. 25.4. Jina kënöpis nikanmi: <<Uryapukuq nunata mana pagashpaqa ama uryatsinkitsu>>.#Mat. 10.10; Luc. 10.7.
19Juk anciänu jutsata rurëkashqanta ishkaq o kimaq nunakuna niyäshuptikiraq creyinki. Juk nunalla nishuptikiqa ama cäsunkitsu.#Deut. 17.6; 19.15. 20Jutsa rurayashqanta mana jaqiyaptinqa llapanpa nöpanchö pëta piñapanki. Tsënö piñapaptikim wakinpis mantsakur jutsata mana rurayänanpaq käyikuyanqa. 21Teyta Diospa, Señor Jesucristupa y pëta sirwiq angelkunapa nöpanchömi qamta niq: Pimanpis mana qaqashpa kë nishqaqkunata cumplinki.
22Anciänu kayänanpaqqa ama pipa peqanmanpis makikita ras churankitsu. Tsënö churarqa jutsata ruraptin qampis jutsayuqmi kanki. Kikikipis Teyta Dios munashqannö kawakï.
23Pacha nanëwan tsënölla qeshyarqa yakullata upukunëkipa rantin vïnutapis ichikllataqa upurinki.
24Wakin nunakunapa jutsankunaqa manaraq alli tapupakuptikim juklla musyakärin. Wakin nunakunapa jutsankunaqa tsëpitaran musyakan. 25Tsënöllam wakin nunakuna allita rurayashqanpis juklla musyakan. Wakinpanam tsëpitaraq musyakan.
Currently Selected:
1 Timoteo 5: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.