VAKATAKILA 2
2
Na i Tukutuku ki Efeso
1“Mo vola vakaoqo vua na agilosi ni soqosoqo lotu mai Efeso:
“Oqo na i tukutuku mai vua sa taura tu e ligana i matau na kalokalo e vitu ka sa daulako voli ena kedratou maliwa na i tutu-ni-cina koula e vitu. 2Au sa kila na veika o sa vakayacora; au sa kila na kaukauwa ni nomu cakacaka kei na nomu dauvosota. Au sa kila na nomu sa sega ni dau vakalomavinakataki ira na tamata ca kei na nomu sa dau vakatovolei ira era sa kaya ni ra sai apositolo ia era sa segai sara ni vakakina, ka o sa kunea kina ni ra sa tamata lasulasu. 3O sa dau vosota ka sa vakararawataki ena vukuqu, ia o sa sega ga ni yalolailai. 4Ia sai koya ga oqo na ka au sa cata vei iko: o sa sega ni lomani au edaidai me vaka na i tekitekivu ni nomu loloma vei au. 5Vakasamataka mada na yawa ni vanua o sa lutu mai kina! Ia mo veivutuni ga ka lesuva tale na veika ga o dau cakava eliu. Kevaka o na sega ni vuki tani mai na nomu i valavala ca, au na lako yani vei iko ka kauta tani na nomu i tutu-ni-cina mai na kena i tikotiko. 6Ia e dua na ka oqo sa talei sara me baleti iko: ni o sa cata na nodra i valavala ni bula na i tokani i Nikola, ni ka'u sa cata talega vakakina.
7“O koya sa vakadaligana, ia me rogoca sara na veika sa tukuna na Yalo Tabu vei ira na veisoqosoqo lotu!
“Vei ira sa rawata na qaqa, au na solia na veivakadonui me ia na kana vuata mai na vunikau ni bula sa tubu tiko ena i Teitei ni Kalou.
Na i Tukutuku ki Simurina
8 #
Aisea 44.6; 48.12; Vtaki 1.17; 22.13 “Mo vola vakaoqo vua na agilosi ni soqosoqo lotu mai Simurina:
“Oqo na i tukutuku mai vei koya na i Vakatekivu kei na i Vakataotioti, o koya sa mate ka sa bula tiko oqo. 9Au sa kila na nomu leqa; au sa kila na nomu dravudravua, ia o sa vutuniyau ga! Au sa kila na nodra vosa vakacacataki iko o ira era sa kaya ni ra Jiu ia era sa segai ga ni vakakina; era sai vavakoso ga i Setani! 10Kakua ni rerevaka na veika o na vakarau sota kaya. Rogoca mada oqo! Ena vakarau biuti ira eso vei kemuni ki na valeniveivesu na tevoro me vakatovolei kemuni kina, ka na taura e tini na siga na ka oqo. Mo ni yalodina tikoga vei au, ka me yacova sara na mate kevaka sai koya oqori na kena i balebale, ka'u na solia vei kemuni na bula me nomuni i cocovi ni qaqa.
11 #
Vtaki 20.14; 21.8 “O koya sa vakadaligana, me rogoca sara na ka sa tukuna na Yalo Tabu vei ira na veisoqosoqo lotu!
“Ni o ira sa rawata na qaqa era na sega tale ni vakaleqai ena i karua ni mate.
Na i Tukutuku ki Perikamo
12“Mo vola vakaoqo vua na agilosi ni soqosoqo lotu mai Perikamo:
“Oqo na i tukutuku mai vua sa taura tu na i seleiwau gata batirua. 13Au sa kila na vanua o sa tiko kina, ni sa tiko talega kina na i tikotiko vakaturaga i Setani. Ia o sa dau dina ga vei au, ka sega ni cakitaka na nomu vakabauti au ka veitalia ga na gauna dredre eso me vaka na gauna i Anitipasa na noqu i vakadinadina yalodina, o koya sa vakamatei mai keri, ena tikina sa tiko kina o Setani. 14#Tiko 22.5,7; 31.16; Vrua 23.4; Tiko 25.1-3Ia sai koya ga oqo na veika e vica ka'u sa cata vei iko: Era tiko vei kemuni eso ka ra muria tiko na i vakavuvuli i Pelami, o koya ka a vakavulici Pelaki me liutaki ira na Isireli ki na i valavala ca, ni sa vakauqeti ira me ra kania na kakana sa vakacabori oti ki na kalou matakau, ka me ra ia talega na veidauci. 15Era sa tiko talega vei kemuni eso era sa muria tiko na i vakavuvuli mai vei ira na i tokani i Nikola. 16Mo veivutuni sara kina! Ni kevaka e segai, au na lako vakatotolo sara yani vei iko ka valuti ira na tamata oqori ena i seleiwau sa basika cake mai gusuqu.
17 #
Lako 16.14,15; 16.33,34; Joni 6.48-50;
Aisea 62.2; 65.15 “O koya sa vakadaligana, ia me rogoca sara na ka sa tukuna na Yalo Tabu vei ira na veisoqosoqo lotu!
Vei ira sa rawata na qaqa, au na solia vei ira eso na kaukauwa mana vuni. Au na solia talega vei ira na vatu vula sa volai kina na yaca vou sa sega tale ni dua e kila, ka vakavo duadua ga o koya sa ciqoma.
Na i Tukutuku ki Caetaira
18“Mo vola vakaoqo vua na agilosi ni soqosoqo lotu mai Caetaira:
“Oqo na i tukutuku mai vua na Luve ni Kalou, o koya sa vaka na yameyame ni buka na matana, ka sa tatalivaliva na yavana me vaka na parasa sa boroi vakamatau. 19Au sa kila na veika o sa cakava tiko. Au sa kila na nomu loloma, kei na nomu yalodina, kei na nomu veiqaravi, kei na nomu dauvosota. Au sa kila ni sa uasivi cake na veika o sa cakava tiko oqo mai na kena i tekitekivu. 20#1Tui 16.31; 2Tui 9.22,30Ia sai koya ga oqo na ka au sa cata vei iko: o sa vakatara tikoga me vakayaco lomana tiko ena kemuni maliwa na yalewa o Jesipeli, o koya sa vakatokai koya me parofita. Era sa vakacalai na noqu tamata mai na nona i vakavuvuli, ka ra sa ia kina na i valavala vakasisila eso ni veidauci ka kania na kakana sa vakacabori ki na kalou matakau. 21Au a solia vua na gauna me veivutunitaka kina na nona i valavala ca, ia sa bese ga ni via vuki tani o koya mai na nona i tovo vakasisila. 22Ena ka oqo ka'u na kolotaki koya kina ki dua na i davodavo ni veivakararawataki, ka me davoca o koya kei ira kece sara sa ia vata kaya na i tovo vakasisila ni veidauci. Au na cakava sara oqo ka vakavo ga kevaka era sa veivutunitaka na veika vakasisila era sa kitaka vata kei koya. 23#Same 7.9; Jere 17.10; Same 62.12Au na vakamatei ira talega era sa daumuri koya voli, ka ra na qai kila kina na veisoqosoqo lotu ni sai au ga ka sa dau dikeva na vakanananu kei na gagadre kecega ni tamata; ia au na sauma ga vei kemuni yadudua me veiganiti kaya ga kei na veika o ni sa cakava.
24“Ia oi kemuni na kena vo mai Caetaira o ni sa sega ga ni muria na i vakavuvuli vakasisila oqo; o ni se sega ni kila na ka era vakatoka eso, ‘na veika vuni ka titobu i Setani.’ Au sa kaya vei kemuni oqo ni'u na sega ni vakacolati kemuni ena dua tale na i vakaro. 25Ia, mo ni tudei tikoga ena ka sa tu vei kemuni me yacova na noqu lesu tale yani. 26#Same 2.8,9 (LXX)Kivei ira sa rawata na qaqa ka sa vakayacora tikoga na veika au sa vinakata me yacova na i vakataotioti, ka'u na solia vei ira na kaukauwa vata ga sa solia vei au ko Tamaqu. 27Au na solia vei ira na kaukauwa me ra lewa na veimatanitu, me ra lewai ira ena i titoko kaukamea ka vorolaki ira me vaka sa vakavurumemeataki na kuro qele. 28Ia ka'u na solia talega vei ira na kalokalo i volasiga.
29“O koya sa vakadaligana, ia me rogoca sara na ka sa tukuna na Yalo Tabu vei ira na veisoqosoqo lotu!
Currently Selected:
VAKATAKILA 2: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.