VOSA VAKAIBALEBALE 2
2
Na i Cocovi ni Yalomatua
1Na luvequ, mo katona na noqu i vakavuvuli vei iko ka kakua ni guilecava na noqu i vakaro. 2Mo vakarorogo ki na veika sa yalomatua, ka tovolea mo kila sara. 3Io, mo tagica ga na vuku, ka tabalaka cake na domomu mo kila-ka. 4Mo vakasaqara matua sara me vaka o sa vakasaqara na siliva se dua na yau vuni. 5Kevaka o sa vakayacora vakakina, o na qai kila kina na i balebale ni rerevaki Jiova ka rawata mo kila na Kalou. 6Ni sai Jiova sa dau solia na yalomatua, ka sa taka mai vua na kila-ka kei na lomavuku. 7Sa solia na veivuke kei na veitaqomaki vei ira na tamata yalododonu ka yalodina. 8Sa taqomaki ira na tamata dodonu, ka maroroi ira era yalodina vua. 9Ia o sa na qai kila na ka vinaka kei na ka dodonu, ka muria na sala vinaka. 10O na yaco mo vuku ka na vakamarautaki iko na nomu kila-ka. 11Ena taqomaki iko na kila-ka kei na yalomatua, 12ka tarovi iko mo kakua ni cakava na ka e cala. Ena tarovi iko mo kakua ni muri ira na tamata dauveivakacalai, 13o ira era sa dau biuta na veika vinaka ka dau vakayacora na veika ca, 14o ira sa dau marautaka na cakava na veika ca ka taleitaka na ca, 15ka ra sa tamata sega ni nuitaki ka sega ni vakadinati.
16Ena rawa kina mo vorata na yalewa dautagane sa via veretaki iko ena nona vosa veicavilaki, 17o koya sa sega ni yalodina vua na watina, ka sa guilecava na nona vosa ni yalayala. 18Kevaka o lako ki na nona vale, o sa muria ga na sala sa gole ki na mate. Na lako i kea sa vakavolekataki keda sara ki na nodra vuravura na mate. 19Sa sega ni dua e lako vua me lesu tale mai. Sa sega ni lesu tale mai ki na sala ni bula. 20O koya oqo mo muria kina na nodra i vakarau na tamata vinaka ka vakayacora na veika vinaka. 21O ira na tamata yalosavasava, o ira na tamata dina era na tiko ena noda vanua. 22Ia ena muduki ira na tamata ca e vuravura na Kalou me vaka sa cavuraki tani na kau mai na qele.
Currently Selected:
VOSA VAKAIBALEBALE 2: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.