TIKO VOLI MAI NA LEKUTU 2
2
Na i Tuvatuva ni Keba kei na i Lakolako
1A sa kaya vei Mosese kei Eroni ko Jiova, 2“O ira na Isireli me ra birika na nodra valelaca ena loma ni nodra tikina vakaiwasewase kei na ruku ni nodra dui mataqali kei na kena drotini, ka me ra toka volivolita na Vale ni Veitavaki, ia me kakua ga ni volekata sara yani.
3Na nodra valelaca kei na kena drotini na wasewase levu na Juta me na biriki ena yasana ki na tokalau vaka ki na i cadracadra ni matanisiga. Me nodra i liuliu na Juta o Nasoni na luve i Amenatave, 4ia na kedra lewe levu me vaka sa wiliki oti, era sa lewe 74,600. 5O ira me ra keba tikiva sai koya na mataqali Isakari, ka me nodra i liuliu na Isakari o Nacanieli na luve i Suari, 6ka kedra lewe levu mai na kena sa wiliki oti, era sa lewe 54,400. 7Me qai toka tarava o ira na mataqali Sevuloni, ka me nodra i liuliu na luve i Sevuloni o Iliavi na luve i Eloni. 8Na kedra lewe levu me vaka na kena sa wiliki oti, era sa lewe 57,400. 9Na kedra i wiliwili taucoko na lewe ni wasewase levu na Juta, ni soqoni vata na veiwasewase lalai, era sa lewe 186,400. Oqo na i matai ni wasewase levu me na liutaka na i lakolako se tayabe vakaivalu.
10Me vakarewa na nodra drotini ena vanua me keba kina na i wasewase levu na Rupeni, kei na kena wasewase lalai ena yasana ki na ceva ni vale tabu. Me nodra i liuliu na mataqali Rupeni o Ilisuri na luve i Siteuri, 11ka i wiliwili ni nona tamata sa wiliki oti, era sa lewe 46,500. 12Me ra keba tikivi ira yani o ira na mataqali Simione, ka me nodra i liuliu o Silumieli na luve i Surisatai. 13Na kedra lewe levu me vaka sa wiliki oti, era sa lewe 59,300. 14Me qai tarava na mataqali Kata, ka me nodra i liuliu na luve i Kata o Eliasafi na luve i Riueli. 15Na kedra lewe levu me vaka sa wiliki oti, era sa lewe 45,650. 16Na kedra i wiliwili taucoko na veilawalawa ena nodra i tikotiko na Rupeni, era sa lewe 151,450. Na wasewase levu oqo me na i karua ni lakolako ni tayabe ki na i valu.
17Ena tadrua ni matai ni rua na i wasewase lelevu kei na i otioti ni rua na i wasewase lelevu, me ra na tayabe e loma oqori na mataqali Livai ni ra sa laveta tiko na Vale ni Veitavaki. Na nodra i lakolako na veiwasewase yadudua me na muria ga na i vakarau ni nodra tara keba, o ya na i wasewase yadudua ena ruku ni nodra dui drotini.
18Me koto ena yasana ki na ra ni vale tabu na drotini ni wasewase levu na Ifereimi, ka okati kina na veiwasewase lalai e vakarurugi kina. Me na nodra i liuliu na Ifereimi o Ilisama na luve i Amiute; 19ia na kedra i wiliwili me vaka sa wiliki oti, era sa lewe 40,500. 20Me ra qai keba tikivi ira yani o ira na mataqali Manasa, ka me nodra i liuliu o Kamelieli na luve i Pitasuri. 21Sa wiliki oti na i lawalawa oqo ka ra lewe 32,200. 22Me qai tarava sara na mataqali Penijamini; me nodra i liuliu na luve i Penijamini o Epitani na luve i Kitioni. 23Sa wiliki oti o ira na lewena ka ra lewe 35,400. 24Na kedra i wiliwili taucoko na tamata era tiko ena wasewase levu na Ifereimi, me okati kina na i wiliwili ni veiwasewase lalai, e 108,100. Na i wasewase na Ifereimi era i katolu ni matailakolako.
25Era na keba donuya na vualiku ni vale tabu na i wasewase levu na Tani, me okati vata kei na nodra veiwasewase lalai. Me nodra i liuliu na luve i Tani o Eieseri na luve i Amisatai. 26Na i wiliwili ni nona lewe ni keba e 62,700. 27O ira ka ra keba tikivi ira, sai ira na mataqali Aseri ka me nodra i liuliu na luve i Aseri o Pakieli na luve i Okirani. 28Na kedra i wiliwili ka sa wiliki oti e 41,500. 29Me qai taravi ira yani o ira na mataqali Navitalai, ka nodra i liuliu na luve i Navitalai o Eira na luve i Enani. 30Na kedra i wiliwili o ira na lewena e 53,400. 31Na kedra i wiliwili kece na wasewase levu na Tani, era sa lewe 157,600. Era sai otioti ni wasewase me ra tayabe yani ki na i valu.
32Sai koya oqo na kedra i wiliwili na Isireli me vaka era sa wiliki ena nodra veivuvale ni nodra qase; ia o ira ka tiko ena veitikotiko kece ka ra sa wiliki ena nodra veiwasewase, era sa lewe 603,550. 33Ia me vaka na veika sa vakarota ko Jiova vei Mosese, era sa sega ni wiliki vata kei ira na Isireli o ira na Livai.
34O ira na Isireli era sa kitaka na ka kecega sa vakarota vei Mosese ko Jiova. Era sa tara keba ena ruku ni nodra drotini me vaka sa vakaroti, ka tayabe ena nodra i wasewase vakamataqali me vaka na veivuvale ni nodra qase.
Currently Selected:
TIKO VOLI MAI NA LEKUTU 2: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.