JONI 11
11
Na Mate i Lasarusa
1E a qai tauvi Lasarusa e dua na mate. O Lasarusa e kai Pecani, na nodrau koro o Meri kei Marica na tuakana.#Luke 10.38,39 2Sa i Meri oqo ka a lumuta na Turaga ena waiwai, ka quata na yavana ena drau-ni-uluna. A ganena o Lasarusa, o koya ka tauvimate.#Joni 12.3 3E rau a talatala vei Jisu o rau na ganena, ka kaya, “Turaga, sa tauvimate o koya o ni sa dau lomana.”
4Ni sa rogoca ko Jisu, sa qai kaya, “Na i cavacava ni tauvimate oqo e sega ni mate nei Lasarusa; sa yaco ga oqo me vakarokorokotaki kina na Kalou, ni sai koya oqo na sala ena vakarokorokotaki talega kina na Luve ni Kalou.”
5A sa dau lomani Marica, kei tacina, vata kei Lasarusa ko Jisu. 6Ia ni sa rogoca na nona tauvimate voli o Lasarusa, a sa tiko tale yani o koya ena vanua sa tiko kina me rua tale na siga. 7Ni oti o ya, a sa qai kaya vei iratou na nona tisaipeli, “Me datou lesu tale mada ki Jutia.”
8E ratou sa qai kaya vua na tisaipeli, “Vakavuvuli, ena dua walega na gauna e se qai oti oqo era a via vakaviriki kemuni o ira na Jiu; ia o ni sa via lesu tale kina oqo?”
9Sa qai sauma ko Jisu, “E sega li ni tinikarua na aua ena dua na siga? Kevaka sa lako e dua na tamata ena loma ni siga, ena sega ni tarabe, ni sa raica tiko na rarama ni vuravura oqo. 10Ia kevaka sa lako e dua ena bogi, ena tarabe, ni sega ni tiko vua na rarama.” 11A sa kaya na vosa oqo ko Jisu ka tukuna tale vei iratou, “Sa moce koto na nodatou i tokani o Lasarusa, ia au na lako me'u la'ki vakayadrati koya.”
12E ratou a qai kaya na nona tisaipeli, “Turaga, kevaka e moce walega, ia ena bula vinaka tale.”
13A sa vosa vakaoqo ko Jisu ni sa mate o Lasarusa, ia e ratou sa nanuma ni sa moce walega o koya. 14Sa qai kaya vakamatata vei iratou ko Jisu, “Sa mate o Lasarusa, 15ia ena vukumudou ka'u sa vakavinavinaka kina ni'u a sega ni tiko mai kea, me rawa kina ni dou vakabauta oi kemudou. Me datou sa lako sara yani vua.”
16Sa qai kaya vei iratou na nona i tokani tisaipeli o Tomasi (o koya sa vakatokai na Drua), “Tou lako kecekece kei na i Vakavuvuli, me datou la'ki mate vata kaya!”
Ko Jisu na Tu Cake Tale kei na Bula
17Ni sa yaco kina ko Jisu, sa qai kila ni sa koto bogi va oti o Lasarusa ena i bulubulu. 18E tiko volekati Jerusalemi ga o Pecani, e rauta e rua vakacaca na kilomita. 19Era lewe vuqa na Jiu era a lako vei rau o Marica kei Meri, me ra vakacegui rau ena vuku ni ganedrau.
20Ni se qai rogoca ga o Marica ni sa lako yani ko Jisu, a sa la'ki tavaki koya; ia sa tiko ga mai vale o Meri. 21Sa qai kaya vei Jisu o Marica, “Turaga, kevaka o ni a tiko eke, ke a sega ni mate na ganequ. 22Ia au kila tiko ni na solia ga vei kemuni edaidai na Kalou na ka cava ga o ni kerea vua.”
23Sa qai kaya vua ko Jisu, “Ena tu cake tale ki na bula na ganemu.”
24Sa kaya vua o Marica, “Au sa kila ni na tu cake tale o koya ki na bula ena i otioti ni siga.”
25Sa qai kaya vua ko Jisu, “Oi au na vu ni tucake tale kei na vu ni bula: o koya sa vakabauti au, kevaka sa mate, ena bula ga; 26ia o koya sa bula tiko ka vakabauti au ena sega sara ni mate. O sa vakabauta na ka oqo, se segai?”
27Sa qai kaya vua o koya, “Io Turaga! Au sa vakabauta ni sai kemuni na Mesaia, na Luve ni Kalou, o koya ka sa namaki me lako mai ki vuravura.”
Sa Tagi ko Jisu
28Ni sa kaya oti o ya o Marica, sa qai lesu yani, ka kaciva lo na tacina o Meri, ka kaya, “Sa tiko oqo na i Vakavuvuli, ka sa tarogi iko tiko.” 29Ni sa rogoca o Meri, sa tu cake sara, ka lako vei Jisu. 30Oqo e se bera tiko ni curu ko Jisu ki na koro, ka se tiko ga ena vanua ka a tavaki koya kina o Marica. 31Ia o ira na Jiu era sa tiko vata kei Meri e vale me ra vakacegui koya, era sa qai muri koya. Era nanuma ga ni sa lako ki na i bulubulu o koya me la'ki tagi kina.
32A sa yaco yani o Meri ki na vanua sa tiko kina ko Jisu. Ni sa raici koya, sa qai cuva sobu ki yavana, ka kaya, “Turaga, kevaka o ni a tiko eke, ke a sega ni mate na ganequ!”
33Ni sa raica ko Jisu na nona tagi kei na nodra tagi na Jiu era a lako vata kaya yani, a sa vutugu na yalona ka rarawa vakalevu na lomana. 34A sa tarogi ira, “E vei na vanua o ni buluti koya kina?”
Era sa kaya vua, “Turaga, ni lako mai ka raica.”
35Sa tagi ko Jisu. 36Era sa kaya kina na Jiu, “Raica mada na levu ni nona lomani koya!”
37Ia era sa kaya eso vei ira, “E sega beka ni o koya oqo ka a vakavuna me rai rawa tale na mataboko? A rawa beka vua me a tarova na mate i Lasarusa?”
Vakabulai Tale Mai na Mate o Lasarusa
38Sa qai vutugu tale kina e yalona ko Jisu ka lako ki na i bulubulu. Na i bulubulu o ya e dua na qara vatu, ka kena i sogo e dua na vatu. 39Sa qai kaya ko Jisu, “Ni kauta tani na vatu!”
Sa kaya vua o Marica, na ganei koya ka a mate, “Turaga, oqo e sa na bona na yagona; ni sa oti e va na bogi na nona mate.”
40Sa qai kaya vua ko Jisu, “Au a sega li ni kaya vei iko, ni o na raica ga na kaukauwa ni Kalou kevaka o vakabauta?” 41Era sa qai kauta tani na vatu. Sa qai tacake ko Jisu, ka kaya, “I Tamaqu, au sa vakavinavinaka vei kemuni ni o ni sa rogoci au. 42Au kila ni o ni sa dau rogoci au ena veigauna kecega, ia au sa cavuta ga oqo ena vukudra na tamata era sa tu vakavolivoliti au oqo, me ra vakabauta kina ni o ni sa talai au mai.” 43Ni sa cavuta oti ko Jisu na veivosa oqo, sa qai kaci ena domo levu ka kaya, “Lasarusa, mo tucake mai!” 44Sa qai tucake mai o koya, ka sa viviraki tu na yavana kei na ligana ena i sole ni mate, ka viviraki na uluna ena dua na i sulu. Sa qai tukuna vei ira ko Jisu, “Dou sereki koya, ka laiva me lako.”
Na Bukiveretaki i Jisu
(Maciu 26.1-5; Mari 14.1-2; Luke 22.1-2)
45Ni ra sa raica na veika sa cakava ko Jisu o ira na Jiu ka la'ki sikovi Meri, era sa vakabauti koya. 46Ia eso vei ira era a lesu tale vei ira na Farisi ka la'ki tukuna na veika sa cakava ko Jisu. 47Era sa mani soqoni vata kina me dua na nodra bose o ira na bete levu kei ira na Farisi, ka ra sa kaya, “Na cava me da cakava? Ni sa vuqa na veicakacaka mana sa cakava na tamata oqo. 48Kevaka eda vakalaivi koya tikoga vakaoqo, era na vakabauti koya na tamata kecega, ka ra na qai lako mai na kai Roma ka kauta tani ruarua na noda i tikotiko tabu kei na noda matanitu.”
49Ia e dua vei ira o ya o Kaiava, na Bete Levu ena yabaki o ya. Sa qai kaya vei ira o koya, “O ni sa sega ni kila e dua na ka! 50E sega li ni o ni kila ni vinaka cake me mate e dua na tamata ena vukudra na tamata, ka ca ni mai vakarusai na matanitu taucoko?” 51A sa sega ni tukuna ga vakataki koya na veika oqo; ia, me vaka ni sa Bete Levu o koya ena yabaki o ya, a sa parofisaitaka ni na mate ko Jisu ena vukudra na Jiu, 52ka segai walega ena vukudra, ia me yaco oqo me rawa ni ra vakasoqoni vata tale mai na tamata ni Kalou era sa veiseyaki tu, me ra sa duabau ga.
53Me tekivu mai na siga o ya ka lako yani, era sa dau bosei koya na nodra i liuliu na Jiu se me ra na vakamatei koya vakacava. 54Sa mani sega kina ni veilakoyaki ena matana votu ko Jisu ena kedra maliwa na Jiu; ia sa lako ga ki na vanua sa voleka ki na vanua lala, ki na koro o Ifereimi, ka sa tiko kina kei iratou na nona tisaipeli.
55A sa voleka mai na gauna ni Solevu ni Lakosivia, ka ra sa lako ki Jerusalemi e lewe vuqa mai taudaku me ra la'ki vakasavasavataki ira ni bera na solevu. 56Era a vakasaqarai Jisu voli, ka veitarogitaka vakai ira ni ra sa la'ki tu ena Valenisoro, ka kaya, “A cava o ni nanuma? Ena lako beka mai o koya ki na Solevu?” 57Era sa vakarota oti o ira na bete levu kei ira na Farisi ni kevaka e dua e kila na vanua e tiko kina ko Jisu, me qai tukuna sara vei ira, ka me ra la'ki vesuki koya.
Currently Selected:
JONI 11: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.