JEREMAIA 52
52
Bale o Jerusalemi
1A cabeta na i dabedabe vakatui o Setekaia ena i ka ruasagavulu ni yabaki ni nona bula, ka veiliutaki tiko e Jerusalemi ena loma ni tinikadua na yabaki. Na yaca i tinana o Lipina. 2A cakava o Setekaia na tui na veika ca ena mata ni Turaga ko Jiova me vaka e dau cakava o Jioiakimi. 3Sa toro sobu sara na veika e yaco e Jerusalemi kei Juta ka sa cudru sara kina ko Jiova ka lewa me ra kau tani vakabobula.
A bese ni vakarorogo o Setekaia vua na tui Papiloni. 4Ia ena i ka tini ni vula ena i kaciwa ni yabaki e tui kina o Setekaia e Juta, sa lako mai kina o Nepukanesa na tui Papiloni kei na nona mataivalu taucoko ka valuti Jerusalemi. Era sa mai tara na nodra i tikotiko ni valu ena taudaku ni koro ka tara cake na i kabakaba me ra samuta wavokita kina na bai ni koro. 5A valuti tiko na koro me yacova na i katini kadua ni yabaki i Setekaia. 6Ena i kaciwa ni siga ni ka va ni vula ena yabaki o ya a kaukauwa sara kina na viakana ka sa sega na ka me ra kania na tamata. 7Ia a qai kabasu na bai ni koro. Era a qai tovolea na sotia kece me ra dro ena bogi, ia era a wavokita tu na koro na kai Papiloni. Era a muria na sala ki na i teitei ni tui, ka lako ena veimama ni bai ka dro yani vaka ki na buca ki Joritani. 8Ia era a qai vakasavi Setekaia na tui na kai Papiloni ka la'ki vesuki koya ena buca volekati Jeriko. Era a drotaki koya kece na nona sotia. 9Era a vesuki Setekaia ka kauti koya vei Nepukanesa na tui ka tiko mai na koro o Ripila ena vanua o Emaci, ka veilewaitaki koya mai kea o Nepukanesa. A vakamatei iratou na luve i Setekaia mai Ripila o Nepukanesa ni rai tu ga o Setekaia. 10A vakamatei ira talega na turaga e Juta. 11A qai leuta tani na mata i Setekaia ka vesuki koya ena sinucodo me kau ki Papiloni. A tiko o Setekaia ena vale ni veivesu mai Papiloni me yacova na siga a qai mate kina.
Vakarusai ni Vale ni Soro
12Ena i katini ni siga ni kalima ni vula ni i katini kaciwa ni yabaki i Nepukanesa na tui Papiloni a curu kina ki Jerusalemi o Nipusaretani na dauvakasala ni tui ka i liuliu ni nona mataivalu. 13A vakama na Valenisoro, na valenitui kei na nodra vale kece na tamata cecere mai Jerusalemi, 14ka ra sa basuka sobu na bai ni koro na nona sotia. 15Ia a qai kauti ira yani vakabobula ki Papiloni o Nepusaratani na tamata era vo tu mai ena koro vata kei ira era a vuki me ra to vua na tui Papiloni kei ira kece na kila cakacaka era vo tu. 16Ia a qai biuta tu ga mai e Juta eso na tamata dravudravua sara, ka sega na ka era taukena, sa biuti ira tu me ra qarava na veivaini kei na i teitei.
17Era a vorolaka vakamatailalai na veiduru parasa na kai Papiloni kei na veitutu ena Valenisoro vata kei na beseni parasa ni wai ka tu e kea. Era a kauta kece na parasa ki Papiloni. 18Era a kauta talega na i sivi kei na ka e dau tawa kina na dravusa ka dau vakayagataki ena kena vakasavasavataki na i cabocabonisoro, na i bokoboko ni cina, na beseni era dau tawa kina na dra ni manumanu vakacabori, kei na beseni e dau tawa kina na ka boi vinaka me vakamai, kei na veiyaya parasa kecega e dau vakayagataki ena Valenisoro. 19Era a kauta kece yani na veiyaya e caka ena koula se na siliva: na beseni lalai, na miqa e dau kau kina na qilaiso waqa, na beseni era dau tawa kina na dra ni manumanu era vakacabori, na ka era dau tawa kina na dravusa, na i tutu ni cina, na disi ni ka boi vinaka kei na beseni era dau tawa kina na i soro liviraki. 20Na veiyaya parasa e a cakava na tui o Solomoni me baleta na Valenisoro, na duru e rua, na i tutu, na beseni levu, na bulumakau parasa e tini karua era sa tokona tu sa sivia sara na kena bibi. 21Sa tautauvata na duru ruarua e 8 na mita na kedrau balavu yadua ka 5.3 na mita wavokita na tolodrau. E rau sa vakalomana ka 75 na milimita na vavaku ni kaukamea. 22Ena ulu ni duru yadua sa yadua kina na i wasewase ni parasa, sa 2.2 na mita na kena cere ka sa ceuti wavoki ena talitali kei na pomekaraneti ena veiyasana. 23Sa 96 na pomekaraneti ena veiyasana; ka 100 na pomekaraneti era vakavolivolita na talitali.
Kau ki Papiloni na Jiu
24Ia na turaganivalu liu sa kauti Seraia na bete levu, o Sefanaia e dua tale na bete e taravi koya, kei na tolu tale na vakailesilesi cecere ena Valenisoro. 25A sa kauta tani mai na koro e dua na tamata sa liutaki ira na sotia, e vitu na dauvakasala ni tui era tiko ena koro, na turaganivalu liu veivuke, ka qarava na i tukutuku vakaivalu, kei na 60 tale na tamata vakailesilesi. 26A kauti ira o Nepusaratani vua na tui Papiloni ka tiko mai Ripila. 27A vakanakuitataki ira ka vakamatei ira na tui Papiloni mai Ripila ena vanua o Emaci.
Era a kau tani vakabobula na lewe i Juta mai na nodra vanua. 28Oqo na kedra i tukutuku na tamata a kauti ira vakabobula o Nepukanesa; ena i kavitu ni nona yabaki ena i tutu vakatui e a kauta tani kina e 3,023 na tamata; 29ena i ka 18 ni nona yabaki, era lewe 832 na tamata mai Jerusalemi; 30ia ena i ka 23 ni yabaki, a kauta tani kina o Nepukanesa e 745 na tamata. Na levu kece ni tamata era kau vakabobula era sa lewe 4,600 na tamata.
31Ena yabaki a tui kina e Papiloni o Ivilimirotaki, a qai yalololoma vei Jioiakini ka sereki koya mai na vale ni veivesu. E a yaco na ka oqo ena i ka 35 ni yabaki mai na gauna a kau kina vakabobula o Jioiakini. 32A sa caka vinaka vei Jioiakini o Ivilimirotaki ka solia vua e dua na i tutu dokai mai vei ira na tui kece era a vakabobulataki vata kaya mai Papiloni. 33A solia talega vei Jioiakini me veisau mai na nona i sulu ni bobula ni kai vesu ka me dau kana vata kei na tui ena vo ni nona gauna ni bula sa vo. 34A dau soli tiko vua e dua na i wase ni lavo me dau vakayagataka ena veisiga yadua me yacova sara na gauna a mate kina.
Currently Selected:
JEREMAIA 52: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.