OSEA 4
4
Sa Beitaki Isireli na Kalou
1Dou rogoca na vosa i Jiova, oi kemudou na Isireli: e dua na ka sa beitaki kemudou kina na lewenivanua ko Jiova. Sa sega na loma dina kei na loloma, ka sa sega ni kilai na Kalou ena vanua. 2Sa levu na vosavosa ca, na vosa lasu, na laba, na butako, na veibutakoci; na vakadave dra sa veitarataravi. 3O koya oqo sa tagi kina na vanua era sa vakacauoca na tiko kina, o ira kei na manumanu kila kei na manumanu vuka, na ika talega ni waitui era sa qeavu yani. 4Ia me kakua e dua vei kemudou me veilewai, me kakua e dua me veibeitaki, ni sai kemudou na matabete au sa beitaka. 5Dou sa taceba voli ga ena siga kei na bogi, era sa taceba vakakina kei kemudou o ira na parofita. Au na vakarau vakarusai Isireli, na marama tinamudou. 6O ira na noqu tamata era sa rusa ga ena vuku ni ra sa sega ni vakaliuci au. Oi kemudou na bete dou sa sega sara ni vakaliuci au ka sa besetaka na noqu i vakavuvuli, ka'u sa cati kemuni kina, ka'u na guilecavi ira talega na luvemuni ena cakacaka vakabete.
7“Ni sa tubu cake tikoga na kemudou i wiliwili na bete, sa tubu cake vata talega na nomudou i valavala ca, ka'u na vukica kina na nomudou lagilagi me ka ni veivakamadualaki. 8Dou sa kana mai na nodra i soro na noqu tamata ka garova ena vu ni yalomudou na nodra i valavala ca. 9Ia me vakataki ira ga na tamata ena vaka talega kina oi kemudou na bete, au na cudruvi kemudou ka totogitaki kemudou ena vuku ni nomudou i valavala. 10Dou na kana mai na nomudou i votavota ni vakacaboisoro, ia dou na sega ni mamau. Dou na qarava na kalou ni vuavuai eso, ia dou na sega ni vakaluveni rawa, baleta ni dou sa vuki tani vei au ka goleva na veikalou tani eso.”
Sa Cudruva ko Jiova na Qaravi Kalou Tani
11A sa kaya ko Jiova, “Sa vakaleqa vakalevu na nodra vakasama na noqu tamata na waini vou kei na waini makawa! 12Era sa dautaroga na matakau! Sa dau tukuna vei ira e dua na tiki ni kau na ka me ra cakava! Era sa biuti au. Me vaka e dua na yalewa sa yaco me dauvolitaka na yagona, era sa volitaki ira vakakina vei ira na kalou tani eso. 13Era daucaka i soro ena veiulunivanua, ka ra sa daucabo i madrali ena veidelana, ena ruku ni vuni oki, na ivi kei na baka, baleta ni sa rugurugua vinaka.
O koya oqo, era sa dauvolitaki ira kina o ira na luvemudou yalewa, ka ra ia na veibutakoci na vugomudou yalewa. 14Ia ka'u na sega ni cudruvi ira ena vuku ni veika oqo, baleta ni sai kemudou sara ga dou sa ia na veibutakoci kei ira na bete yalewa ni burekalou,#4.14 bete yalewa ni burekalou: Era sa dautiko o ira na yalewa oqo ena nodra burekalou na kai Kenani, ena vanua ni sokalou vei ira na kalou ni vuavuai. E vakabauti ni veiyacovi kei ira na yalewa dautagane oqo e kauta mai na vuavuai vinaka ki na i teitei vata kei na qele ni manumanu. ka dou sa vakacaboisoro vata kei ira. Me vaka sa kaya na vosa vakaibalebale, ‘Na tamata sa sega ni yalomatua ena rusa ga.’
15Ia kevaka o sa ia na veibutakoci o iko Isireli, me kakua ni beitaki kina o Juta. Kakua ni la'ki sokalou i Kilikali se i Peciaveni, se mo vosa bubului maikea ena yaca ni Kalou bula ko Jiova. 16O ira na Isireli era sa tamata yalo kaukauwa ga me vaka na meule. Ena qai rawa vakaevei me'u vakani ira me vaka na luve ni sipi ena dua na vanua vinaka? 17O ira na Isireli era sa vesuki tu mai na kaukauwa ni kalou matakau. Laivi ira me lako ga. 18Ni sa oti na nodra gunu, era sa ia na i tovo vakasisila ni veidauci, ni ra sa garova vakalevu cake na ka e veivakamadualaki mai na veika lagilagi. 19Ena caginataki ira laivi na cagi, ka ra na madua ena vuku ni nodra vakacaboisoro ki na kalou tani.
Currently Selected:
OSEA 4: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.