OSEA 2
2
1O koya oqo mo ni kacivi ira kina na wekamuni na Isireli “Kawa Tamata ni Kalou” kei na “Lomani-mai-vua-na-Turaga”.
Komera Tawa Yalodina — Isireli Tawa Yalodina
2Kemuni na luvequ, ni vakamasuti tinamuni mada — ka dina ga ni sa sega ni qai watiqu o koya, ka'u sa sega ni watina oi au. Vakamasuti koya me tarova na nona dautagane kei na nona dauvolitaka na yagona. 3Ni kevaka sa sega ni vakakina, au na vakaluvawaletaki koya ka vakavotui koya me vaka na siga sa sucu kina, ka'u na vakayacori koya me vaka e dua na vanua lala sa mamaca ka na mate kina o koya ena karamaca. 4Au na sega ni lomani ira na luvena; era sa luve ni yalewa dauveibutakoci. 5Ni sa kitaka ga na dautagane na tinadra: o koya sa kunekunetaki ira sa ia ga na i valavala e veivakamaduataki, ni sa kaya, “Au na muri ira na tagane eso ka'u sa domona — era sa solia na qau madrai kei na mequ wai, na noqu vuti ni sipi kei na noqu lineni, na noqu waiwai olive kei na mequ waini.”
6O koya oqo au na latia kina na nona sala ena veiwavakavotona, ka viria na bai me na kakua kina ni kunea rawa o koya na nona i lakolako. 7Ena cicimuri ira na nona i tau ka sega ni tauri ira rawa, ka na qarai ira o koya ka sega ni kunei ira. Ena qai kaya vakaoqo, “Au na lesu tale vua na i matai ni watiqu — au a tiko vinaka sara ena gauna o ya mai na gauna oqo.”
8Ena sega ni vakatusa vakadua o koya ni sai au ga ka solia vua na sila, na waini, na waiwai olive, ka vakakina na siliva kei na koula sa la'ki vakayagataka ena sokalou vei Peali. 9O koya oqo au sa na kauta lesu tale kina na noqu i loloma sila kei na waini ena kena ni tatamusuki, ka'u na kauta tani na noqu vuti ni sipi kei na i sulu lineni au a solia vua me vakaisulu kina. 10Au na vakayacora me luvawale e matadra na nona veidomoni, ka sega ni dua ena rawa ni vueti koya mai na ligaqu kaukauwa. 11Au na muduka na nona soqo ni marau kecega — na nona solevu vakayabaki kei na veivula vou, na nona Siga ni Vakacecegu kei na nona soqoni vakalotu tale eso. 12Au na vakadravudravuataka na nona veivaini kei na nona veilolo ka a kaya kina vakaoqo ne, “Oqo na kequ i sau era sa solia vei au o ira ka'u sa veidomoni kaya ena vuku ni noqu veiqaravi.” Au na cakava vei ira e dua na veikau; ena kani ira kina na manumanu kila. 13Au na cudruvi koya talega baleta ni sa guilecavi au ena veigauna ni nona solevu vei Peali, ni sa ia kina o koya na vakamai ni ka boi vinaka, sa ukutaki koya ena mama kei na i ukuuku talei ka sa daumuri ira ga na nona veidomoni eso. Sa kaya vakaoqo ko Jiova.
Na Loloma i Jiova vei Ira na Nona Tamata
14O koya oqo ka'u na kauti koya tale kina ki na vanua lala; ia mai kea, ka'u na qai vosavakayalovinaka vua me'u rawai koya lesu tale mai kina. 15#Josua 7.24-26Au na solia lesu tale vua na nona veiwere ni vaini ka vakayacora na Buca ni Leqa me katuba ni dua na i nuinui vou. Mai kea ena rogoci au o koya me vaka na gauna ni nona a se goneyalewa, ena gauna sa lako cake mai kina mai na vanua o Ijipita. 16Ena siga o ya, sa kaya ko Jiova, o na kacivi au, “Na Watiqu”, o na sega ni kacivi au tale, “Noqu Peali.” 17Au na kauta tani na yacadra na Peali mai na gusuna, ena sega ni cavuti tale vakadua na dui yacadra.
18Ia ena siga o ya, au na ia na veiyalayalati ena vukumu kei ira na manumanu kila, na manumanu vuka, kei na ka sa qasi voli ena dela ni qele. Au na kauta tani talega na veiyaragi kece ni valu mai na vanua, na i selewau kece kei na dakaititi, ka'u na laivi ira na noqu tamata me ra tiko vakacegu ka taqomaki. 19I Isireli, au na tauri iko mo watiqu vakadua; o na watiqu vakadua ena yalosavasava kei na lewa dodonu, ena yalodina kei na yalololoma. 20Au na tauri iko mo watiqu ena lomadina ka o na vakatusa ni sai au ko Jiova. 21Ia ena siga o ya, au na sauma kina na nodra masu na noqu tamata na Isireli. 22Au na vakatauca na uca ki vuravura me na rawa kina na sila, na qerepi kei na olive ena vanua o Jesireli. 23#Roma 9.25; 1Pita 2.10Au na vakataudeitaki ira na noqu tamata ena loma ni vanua ka vakayacori ira me ra tiko sautu. Au na vakatakila na noqu loloma vei ira sa vakatokai “Sega-ni-Lomani”, ka'u na kaya vei ira sa vakatokai “Sega-ni-noqu-Tamata” ni ra sa noqu tamata ga; era na qai kaya, “O ni sa neimami Kalou.”
Currently Selected:
OSEA 2: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.