KALATIA 2
2
O Paula kei Iratou na i Apositolo Tale Eso
1 #
Caka 11.30; 15.2 Ni sa oti e tinikava na yabaki, keirau sa qai lako cake tale kei Panapasa ki Jerusalemi, ka keirau kauti Taito talega. 2Au a lako cake baleta ni a vakatakila vei au na Kalou ena raivotu ni dodonu me'u lako. Ena qaravi ni dua na bosebose-ka kei iratou na veiliutaki, au a qai vakamacalataka kina na i tukutuku vinaka ka'u sa vunautaka vei ira na kai matanitu tani. Au a sega ni vinakata me maumau wale na noqu veiqaravi mai na gauna sa oti se na gauna oqo. 3Ni o Taito mada ga, o koya keirau sa salavata voli, a sa sega ni vakasaurarataki me cilivi, ka dina ga ni sa kai Kirisi o koya. 4Ia ena vukudra ga na mataveiwekani vakabauta vakailasu era sa curu lo mai me vaka na yamata vuni me ra mai raica na galala sa soli vei keda ena noda sa tu vata kei Karisito Jisu, ni ra via vakabobulataki keda — 5keitou a sega kina ni bau vakamalumalumu vakadua vei ira, ka me tudei tikoga kina vei kemuni na dina ni kosipeli.
6 #
Vrua 10.17
Ia o ira sa okati me ra dauveiliutaki — ka'u sa kaya vakaoqo baleta ni sa sega ni dua na kedra duidui vei au o ira oqo; ka sa sega ni vakataulewa na Kalou mai na veika sa raici e taudaku — o ira na dauveiliutaki oqo, au sa kaya oqo, era sa sega ni vakaikuritaka tale vei au e dua na ka. 7Ia eratou sa raica ga ni sa lesi au na Kalou me'u vunautaka na i tukutuku vinaka vei ira na tawa cili, me vaka ni sa lesi o Pita vei ira sa cili. 8Ni sai koya ga na Kalou sa cakacaka tiko ena loma i Pita me i apositolo vei ira na cili, ka sa cakacaka talega vakakina e lomaqu me'u i apositolo vei ira na kai matanitu tani. 9Ia o iratou sa okati me ratou dauveiliutaki, oqo o Jemesa kei Pita vata kei Joni, eratou sa qai kila ni sa solia vei au na Kalou na i lesilesi oqo; eratou sa mai lululu sara kina vei keirau kei Panapasa, ka dusia oqo na neitou sa lomavata kina. Keitou sa vakadonuya vata kina me keirau sa lako vei ira na kai matanitu tani, ka me ratou lako o iratou vei ira na Jiu. 10E ratou sa qai kerea e duabulu ga na ka, o ya me keirau nanumi ira sa gadreva vakalevu na veivuke ena kedratou maliwa, a ka talega oqo ka'u sa gadreva vakalevu me'u cakava.
Sa Vunauci Pita o Paula Mai Anitioki
11Ia ni sa lako mai o Pita ki Anitioki, au a qai saqati koya e matadra na lewe levu, baleta ni sa cala dina ga o koya. 12Ni gauna eratou se bera ni yaco yani kina o iratou na talaki mai vei Jemesa, a sa dau kana voli o Pita vata kei ira na i tokani vakayalo era kai matanitu tani. Ia ni ratou sa yaco mai, a sa vakatikitiki ka tawasei koya tani sara mai, ni sa rerevaki ira era sa kaya ni dodonu me ra cilivi na tamata me ra qai okati me ra lotu Vakarisito. 13Era a muri Pita ena nodra vakadadamuria na i tovo veivakaisini oqo o ira na vo ni veiwekani vakayalo era Jiu, ka sa rawai talega o Panapasa ki na nodra i valavala. 14Ni'u sa raica ni ra sa sega ni lako vakadodonu me vaka na dina ni kosipeli, au a qai kaya vei Pita ena matadra kecega, “O iko e dua na Jiu, ia o sa bula voli tiko me vaka e dua na kai matanitu tani, ka sega ni vakataki ira na Jiu. Ia mo qai vakasaurarataki ira vakaevei na kai veimatanitu tani me ra bula vakataki ira na Jiu?”
Sa Vakabulai na Kai Matanitu Tani kei Ira na Jiu ena Vakabauta
15Oi keda vakataki keda sa Jiu ni da sucu mai ka sega ni “kai matanitu tani i valavala ca”, me vaka na ka era sa vakatokai kina. 16#Same 143.2; Roma 3.20; Roma 3.22Ia eda sa kila ga ni sa vakadonui na tamata mai vua na Kalou ena vuku ni nona vakabauti Jisu Karisito, ka segai ena vuku ni kena muri na veika e vinakata na Lawa. Oi keda talega sa vakabauti Jisu Karisito me da vakadonui kina mai vua na Kalou ena vuku ni noda vakabauti Karisito, ka sega ga ena vuku ni veivalavala e vakaroti ena Lawa. Ni sa sega ni vakadonui e dua na tamata vua na Kalou mai na nona muria na veika sa vakaroti ena Lawa. 17Ia, kevaka sa kunei tale ni da sai valavala ca me vakataki ira na kai matanitu tani, ka dina ga ni se toso tikoga na noda sasaga me da vakadonui mai vua na Kalou ena vuku i Karisito — sa kena i balebale beka oqo ni sa dau veivakayarayarataki ki na i valavala ca na Karisito? E sega sara ni vakakina! 18Kevaka au sa tekivu tara cake tale na veivakavuvuli me baleta na Lawa ka'u a talaraka sobu taumada, au sa qai dusimaka kina ni'u sa tamata talaidredre ki na Lawa. 19Ni'u sa mate oi au ena vuku ni Lawa, ka me'u bula kina vua na Kalou. Au sa vakoti vata kei Karisito ki na kauveilatai, 20ka'u sa sega ni bula oi au, ia na Karisito ga sa bula tiko e lomaqu. Ia na bula ka'u sa bula kina oqo, au sa bula ga ena vakabauta na Luve ni Kalou, o koya sa lomani au ka sa solia na nona bula ena vukuqu. 21Au sa sega kina ni vakawaletaka na lolomasavu ni Kalou. Ia kevaka sa vakadonui e dua mai vua na Kalou ena vuku ni Lawa, sa kena i balebale oqori ni sa sega sara ni yaga na mate i Karisito!
Currently Selected:
KALATIA 2: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.