TANIELA 11
11
Ijipita kei Siria
1O koya duadua ga sa dau veivuke vei au ka noqu i to talega. 2Ia na ka au sa na tukuna oqo vei iko e ka dina ga. Sa na tolu tale na tui e ratou na lewai Peresia, ia o koya ena qai kedratou i kava, sa na tamata vutuniyau duadua vei iratou kece. Ia ni sa kaukauwa cake ena vuku ni nona vutuniyau, sa qai bolea na matanitu o Kirisi.
3Sa na qai tubu cake e dua na tui qaqa ka dauvala. Na matanitu sa kena tui o koya sa na matanitu levu sara, ia o koya sa na dau vakayacora na veika ga e vinakata me cakava. 4Ia ni sa qai kaukauwa cake tikoga mai o koya, sa na wasei na nona matanitu ki na va na kena i wasewase. Era na sega ni kena tui o ira na nona kawa se soli na lewa ki na veivanua ka a taukena tu o koya e liu. Era na sosomitaki koya o ira na tani ka ni na cavuraki na nona matanitu.
5Ena kaukauwa na tui Ijipita. Ia ena dua vei ira na nona turaganivalu liu ena toro cake mai vua na nona kaukauwa ka na lewa e dua na matanitu e levu cake. 6Ni oti e vica na yabaki, e rau sa na qai to vata oi rau oqo; ia me i vakadei ni nodrau veiyalayalati, e rau sa qai veiwatini o tui Siria kei na luvei tui Ijipita yalewa, ka me yaco rawa kina e dua na veiwekani vakaivalu. Ia na tovata oqo kei na i naki ni vakawati ena sega ni dei, baleta ni ra qai vakamatei, na yalewa oqo, o ira na nona dauveiqaravi era a lako vata yani, na tagane lailai, kei na watina tagane. 7E sega ni dede ni sa na yaco me tui e dua na weka i yalewa. Ena qai valuta na mataivalu i tui Siria o koya, ena curuma na nona koro vakabai ni valu ka vakamalumalumutaka. 8Ena kauta lesu vakaitoki ki Ijipita o koya na i vakatakarakara ni nodra kalou na kai Siria kei na veiyaya koula kei na siliva vakamareqeti e vuqa. 9Sa na qai valuti Ijipita o tui Siria, ia ena tale suka na nona mataivalu ena kaukauwa ni veivorati a sota kaya.
10E ratou sa na qai vakavakarau tale na luve i tui Siria ka soqona vata e dua na mataivalu levu. E dua vei iratou sa na vaka na coka ni dobui na nona ravu vanua, ka na lako sara ka valuta e dua na koro vakaivalu ni meca. 11Ena waqa na cudru nei tui Ijipita, sa na qai vala lesu kei tui Siria ka vesuka sara na nona mataivalu levu. 12Sa na dokadokataka o koya na nona qaqa ena i valu kei na levu ni sotia ni meca sa vakamatea rawa, ia ena sega ni dede na nona qaqa tiko.
13Sa na qai lesu tale o tui Siria ka la'ki soqona vata e dua na mataivalu levu cake. Ia ni yaco mai na kena gauna sa vinaka vua, ena qai kauta lesu tale ki Ijipita o koya e dua na mataivalu levu ka vakaiyaragitaki vakavinaka. 14Sa na lewe vuqa talega mai Ijipita era saqata na nodra tui. Era na veisaqati talega eso na tamata ca mai na nomu vanua, Taniela, me vakadinadinataki kina na raivotu, ia era na vakamalumalumutaki ga. 15Sa na qai la'ki tuva i valu o tui Siria ka valuta e dua na koro taqomaki vakaivalu ka mani rawa. Sa na sega ni ra vala tikoga na sotia ni Ijipita; o ira sara mada ga na sotia vivinaka duadua vei ira sa sega na nodra kaukauwa me rawa kina ni ra vala tiko. Sa na qai kitaka na mataivalu kaba koro na ka ga e lomana me cakava vei ira ni sa sega ni veisaqati. 16Sa na qai tawana o tui Siria na vanua lagilagi o ya, me qai vakarorogo na vanua taucoko oqori ki na nona kaukauwa.
17Sa na qai vakarautaka tale o tui Siria e dua na i lakolako balavu me vakayagataki kina na nona mataivalu taucoko. Sa na qai cakava o koya e dua na veiyalayalati me kauta yani vua o tui Ijipita e dua na luvena yalewa me watina ena nona via vakamaduataka ga na kena meca. A sega ni mana na veiyalayalati o ya. 18Ni oti oqori sa na qai goleva na veimatanitu e baravi o tui Siria ka rawa e vuqa vei ira. Ia, sa na qai vakamalumalumutaki koya e dua na turaganivalu ni vanua tani, me na mudu kina vakadua na nona dokadokai koya. 19Sa qai golevi ira lesu tale na veikoro vakaivalu ni nona vanua o tui Siria, ia, a vakamalumalumutaki talega kina o koya, me sa na qai oti vakadua sara kina o koya.
20Sa na taravi koya e dua tale na tui, ia, o koya oqo ena tala e dua na daukumuni vakacavacava me rawa ni toro cake kina na vutuniyau ni nona matanitu. Ni oti ga e dua na gauna lekaleka, sa na vakamatei na tui oqo, ia ena sega ni mate ena rara ni valu.”
Na Tui Ca
21Na tui Siria ena taravi koya e tamata ca ka sega ga ni ganiti koya me tui; ia, ena lako lo ga mai o koya ka kovea sara na kaukauwa vakatui ena gaunisala vakavere. 22Na mataivalu kecega era saqati koya, na bete levu sara mada ga ni Kalou, sa na valuti ira ga o koya ka vakarusai ira. 23Na nona veiyalayalati kei ira na veimatanitu eso e cakava ena dela ni nona lawaki ca. Ia sa na tubu me kaukauwa cake o koya, e dina ga ni matanitu lailai wale sara na nona matanitu. 24Ena valuta e dua na yasana vutuniyau ni wele sara tu ga ena gauna ni sautu ka kitaka na veika era sa sega ni dau cakava na nona qase, o ya, ni dau wasea na i toki kecega ni valu vei ira era dina vua. Ena dau nakita o koya me valuta na veikoro ni i valu, ia ena dua na gauna lekaleka ga.
25Ena yalo ni qaqa sa na soqona vata o koya e dua na mataivalu levu me vala kei tui Ijipita; ia, o tui Ijipita sa na vakarautaka tiko mai e dua na mataivalu levu ka kaukauwa me vala kei koya. Sa na sega ni qaqa o tui Ijipita ena vuku ni veiverevereti. 26Era na vakacacani koya ga o ira na nona dau ni vakasala, ka na vuqa na nona sotia era na vakamatei me vaqeyavutaki kina vakadua na nona mataivalu. 27Era na qai dabe ka kana ena dua ga na teveli, oi rau na tui ruarua, ia, e tiko ena dui lomadrau ruarua na ca ka yaco kina me rau veilasulasuti. E rau na sega ni rawata na ka e rau dui vinakata baleta ni sa sega ni yaco na kena gauna dodonu. 28Sa na cavutu na tui Siria ka lesu tale ki na nona vanua, vata kei na i tokinivalu kecega sa rawata; ia sai naki ni lomana me la'ki vakawabokotaka vakadua na lawa ni nodra lotu na tamata ni Kalou. Ena la'ki vakayacora na lomana ni bera ni qai lesu tale ki na nona vanua.
29Ena qai la'ki valuti Ijipita tale o koya ena dua na gauna e muri ia na veika ena yaco sa na sega ni vaka na kena i lakolako e liu. 30Ni ra na lako mai ena waqa lelevu eso na kai Roma me ra mai veivorati kaya, ka sa vakasuka kina na nona i naki. Ena qai lesu tale o koya ena cudru kaukauwa ka la'ki tovolea me valuta ka tababokoca vakadua na nodra lawa ni lotu na tamata ni Kalou. Ena muria o koya na nodra i vakasala o ira era sa biuta tani na lawa ni lotu vaka-Jiu. 31#Tani 9.27; 12.11; Maciu 24.15; Mari 13.14Eso vei ira na nona matasotia era na la'ki tawana ka vakacacana na Valenisoro kei na kena veitikotiko ni yadra. Era na muduka na i soro ni veisiga ka ra vakatikora na Matakau Vakasisila.#11.31 na matakau vakasisila: Raica na 9.27. 32Sa na vakayagataka na nona vere ca na tui oqo me vagolei ira kina vua na tamata era sa biuta oti na nodra lawa ni lotu, ia o ira era dina tiko vua na Kalou era na kaukauwa tikoga ka vala lesu. 33O ira era vuku vei ira era na tamata era vakavulici ira e lewe vuqa na tamata. Ia, ena vakalailai mada, era na qai vakamatei eso ena i valu kei na bukawaqa, ka so tale ena butakoci na nodra i yau ka ra kau vakavesu. 34Ia, ni sa yaco tiko na veivakamatei, sa yaco vei ira eso na veivuke, ia sa vuqa na tamata era la'ki tovata kei ira era sa cakava ga ena yalo ni nanumi ira vakai ira. 35Eso vei ira na tamata vuku era na vakamatei. Na i naki ni ka oqo me ra vakavoui kina na tamata ni Kalou me yacova ni yaco mai na i Vakataotioti, na gauna sa lewa oti tu na Kalou.
36 #
2Cesa 2.3,4;
Vtaki 13.5,6 Sa na cakava o tui Siria na ka ga e lomana me cakava. Sa na boletaka tiko ni levu cake o koya mai vua e dua tale na kalou ka vosa vakadokadokai koya ni levu cake o koya mai vua na Kalou Cecere. Sa na rawa vua me kitaka tiko na veika vakaoqo me yacova na gauna sa na vakanakuitataki koya kina na Kalou. Ni sa na vakayacora dina ga na Kalou na veika sa lomana me cakava. 37Na tui oqo sa na lecava na kalou era sa dau qarava na nona qase, kei na kalou era dau domona na yalewa. Sa na lecava dina sara ga o koya na veikalou kecega, baleta ni sa nanuma tiko ni sa uasivi cake o koya mai vei ira kecega. 38Sa rokova duadua ga o koya na kalou sa dau taqomaka na koro vakaivalu me i sosomi ni nona rokovi ira na veikalou oqo. Ena vakacabora o koya na koula, na siliva, na veivatu talei tale eso vata kei na i loloma talei e vuqa vua e dua na kalou era a segasega sara ni dau bau soro kina na nona qase. 39Sa dau vakayagataki ira era vakalou ki na kalou ni vanua tani o koya me ra la'ki taqomaka na nona veikoro vakaivalu. A sa solia na ka ni veidokai vei ira era ciqomi koya me nodra tui, solia me ra tawana na i tutu lelevu, ka solia vakailoloma vei ira eso na tiki ni vanua.
40Ia ena kena i otioti ni gauna sa na qai valuti tui Siria o tui Ijipita; ia ena vala lesu o koya ena nona kaukauwa taucoko, ka vakayagataka na qiqinivalu, na i valu ose kei na vuqa na waqa ni vala. Era gumatua vua, me vaka na coka ni dobui. 41Ena valuta talega o koya na Vanua matalau ka na vakamatea e udolu vakaudolu na tamata. Ia, na vanua o Itomi, Moapi, kei na vo ni vanua o Amoni era na galala. 42Ena valuta o koya e vuqa na vanua, ka na sega talega ni dro rawa kina o Ijipita. 43Ena kauta o koya me i tokinivalu na i yau talei me vaka na koula, na siliva kei na i yau dredre tale eso ni Ijipita era sa vunitaki tu. Ena rawai Libiya kei Eciopea o koya. 44Ia, na i tukutuku ga ka lako mai vaka ki na tokalau kei na vualiku ena vakarerei koya, ia sa na qai vala vakaukauwa sara ga kina o koya ka vakamatea e vuqa sara na tamata. 45Sa na birika na nona veivalelaca lelevu vakatui ena kedrau veimama na waitui kei na ulunivanua tabu ka lagilagi. Ia, ena mate o koya, ka na sega e vukei koya.”
Currently Selected:
TANIELA 11: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.