2 KORINICA 13
13
Na i Otioti ni Veivakasalataki kei na Vakanuinui Vinaka
1 #
Vrua 17.6; 19.15 Oqo na i katolu ni noqu lako yani me'u sikovi kemuni. Me vaka e kaya na i Vola Tabu, “Na veibeitaki kece me vakadinadinataki mai vei rau e lewe rua se lewe tolu na i vakadinadina.” 2Au vinakata me'u tukuna vei kemuni o ni sa cala oti ena noqu tiko mai keri e liu ena i karua ni noqu sikovi kemuni, ka'u tukuna talega oqo ni'u sa tiko tani: Ena gauna au na lako tale yani kina vei kemuni ena sega tale ni dua me na drotaka na i totogi. 3O ni sa via raica e dua na i vakadinadina kece ni sai Karisito sa vosa tiko ena gusuqu. Sa sega ni malumalumu na i tovo i Karisito vei kemuni, ka sa vakaraitaka na nona kaukauwa ena kemuni maliwa. 4Dina ga ni a mate mai na kauveilatai o koya ena malumalumu ia sa bula tiko ena kaukauwa ni Kalou. Oi keitou talega keitou sa vakaivotavota ena nona malumalumu, ia keitou sa bula vata kaya ena kaukauwa ni Kalou me keitou cakacaka kina vei kemuni.
5Ni dikevi kemuni mada se o ni sa bula tiko ena vakabauta se segai. O ni sa kila li ni sa tiko e lomamuni ko Karisito Jisu? Ke sa sega, ia o ni sa qai druka ga. 6Au nuitaka ni o ni na kila ni keitou sa sega ni tamata vakadrukai. 7Keitou sa masulaka vua na Kalou ni o ni na sega ni kitaka e dua na ka cala mo ni kakua ni cala — e sega ni baleta me laurai kina na neitou gumatua, ia mo ni cakava kina na ka dodonu, ka dina ga ni keitou sa vaka na i rairai ni tamata vakadrukai. 8Ni keitou sa sega ni rawa ni cakava e dua na ka me veisaqasaqa kei na dina, ia me keitou totaka ga. 9Keitou sa marau ni gauna keitou malumalumu kina ia o ni sa kaukauwa. Keitou sa masulaka talega mo ni vinaka taucoko sara. 10Na vuna au vola yani kina na ka oqo ni'u sa tiko tani me'u na kakua kina ni taurivaka vakasivia ni'u yaco yani na kaukauwa e solia vei au na Turaga me'u tara cake kina na bula ka sega ni veivakarusai.
11Me'u tinia kemuni na veiwekani ni sa moce mada. Ni vakavinavinakataka na nomuni lakolako, ni muria na noqu vosa, ni lomavata vaka i kemuni ka bula voli ena yalo vakacegu. Me na tiko vata kei kemuni na Kalou ni loloma kei na vakacegu.
12Ni veivakabulataki ena i regu savasava. 13Era sa loloma kece tu yani vei kemuni na tamata ni Kalou.
14Me tiko vata kei kemuni kecega na lolomasavu ni noda Turaga ko Jisu Karisito, na loloma ni Kalou, kei na veitokani ni Yalo Tabu.
Currently Selected:
2 KORINICA 13: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.